VJS, Marika 14:20–26. Veidutaitaka Marika 14:22–25
Sa tekivutaka ko Jisu na sakaramede me ivakananumi ni Yagona kei na Nona dra.
20 Ia ni ra sa kana, sa taura ko Jisu na madrai ka vakalougatataka, ka dovia, ka solia vei ira, ka kaya, dou taura, ka kania.
21 Raica, mo dou dau vakayacora oqo me ivakananumi ni yagoqu, ena veigauna kece dou na vakayacora kina oqo dou na nanuma na gauna oqo au a tiko kina vata kei kemudou.
22 Sa qai taura na bilo, ia ni sa vakavinavinaka, sa qai solia vei iratou; ka ra sa gunu kece mai kina.
23 Ka sa kaya vei ira, Oqo na ivakananumi ni noqu dra ka sa dave me baleti ira e lewe vuqa, kei na veiyalayalati vou au sa solia vei kemudou; mo dou na dau vakadinadinataki au ki vuravura.
24 Ia ena veigauna kece dou na dau vakayacora kina na cakacaka vakalotu oqo, dou na dau nanumi au ena auwa oqo au a tiko kina vata kei kemudou ka gunuva vata kei kemudou na bilo oqo, io ena iotioti ni gauna ena noqu veiqaravi.
25 Au sa kaya vakaidina vei kemudou, na veika oqo mo dou kena ivakadinadina; niu na sega tale ni gunuva vata kei kemudou na vua ni vaini, me yacova na siga ko ya au na qai gunuva vou kina ena matanitu ni Kalou.
26 Ia oqo era sa lolosi, ka tagicaki koya.
VJS, Marika 14:36–38. Veidutaitaka Marika 14:32–34
Mai Kecisemani, eso sara mada ga vei ira na Le Tinikarua era sega ni taura vakavinaka sara na itavi vaka-Mesaia nei Jisu.
36 Eratou sa yaco yani ki na dua na vanua ka vakatokai ko Kecisemani, e dua na were; eratou sa rere vakalevu na tisaipeli, ka lomaleqa, ka vosakudrukudru e yalodratou ka vakataroga se o koya dina beka oqo na Mesaia.
37 Ia ko Jisu ni kila tu na lomadra, sa kaya vei ira na nona tisaipeli, Dou dabe tiko eke, meu masu mada.
38 Ka sa kauti Pita, kei Jemesa, kei Joni, ka vunauci iratou, ka kaya vei iratou, sa rarawa vakalevu na yaloqu, io me yacova sara na mate, dou wawa mada eke ka vakatawa.