3 Ug dihay mipakita ngadto kanila si Elias uban kang Moises, o sa lain nga mga pulong, si Juan Bautista ug si Moises; ug sila nakigsulti uban kang Jesus.

40 Busa, kon ang imong kamot nakasala kanimo, putla kini; o kon ang imong igsoon nga lalaki nakapasipala kanimo ug wala mokumpisal ug wala mag-usab, siya isalikway. Kini labaw pa nga maayo alang kanimo nga mosulod ngadto sa kinabuhi nga pungkol, kay sa adunay duha ka mga kamot, nga maadto sa impyerno.

41 Kay kini labaw pa nga maayo alang kanimo nga mosulod ngadto sa kinabuhi nga wala ang imong igsoon nga lalaki, kay kanimo ug sa imong igsoon nga lalaki nga itambug ngadto sa impyerno; ngadto sa kalayo nga dili gayud mapalong, diin ang ilang ulod dili mamatay, ug ang kalayo dili mapalong.

42 Ug usab, kon ang imong tiil nakasala kanimo, putla kini; kay siya nga imong sumbanan, pinaagi kang kinsa ikaw naglakaw, kon siya mahimo nga usa ka makasasala, siya kinahanglan pagaputlon.

43 Kini labaw pa nga maayo alang kanimo, nga mosulod ngadto sa kinabuhi, kay sa adunay duha ka tiil nga matambug ngadto sa impyerno; ngadto sa kalayo nga dili gayud mapalong.

44 Busa, himoa nga ang matag tawo mobarug o mapukan, pinaagi sa iyang kaugalingon ug dili tungod sa uban; o dili mosalig sa uban.

45 Pangita ngadto sa akong Amahan, ug kini mahimo diha niana gayud nga higayon unsa ang imong gipangayo, kon ikaw mangayo diha sa hugot nga pagtuo, nagtuo nga ikaw makadawat.

46 Ug kon ang imong mata nga nagtan-aw alang kanimo, kaniya nga gitudlo aron sa pagbantay kanimo aron sa pagpakita kanimo sa kahayag, mahimo nga usa ka makasasala ug nakasala kanimo, lugita siya.

47 Kini labaw nga maayo alang kanimo sa pagsulod ngadto sa gingharian sa Dios, nga usa ang mata, kay sa adunay duha ka mga mata nga matambug ngadto sa kalayo sa impyerno.

48 Kay kini labaw pa nga maayo nga ang imong kaugalingon kinahanglan maluwas, kay sa matambug ngadto sa impyerno uban sa imong igsoon nga lalaki, diin ang ilang ulod dili mamatay, ug diin ang kalayo dili mapalong.