FIS, Mataio 21:33 (faatusatusa i le Mataio 21:32–33)
(E ao ona salamō le tagata aʼo lei talitonu o ia ia Keriso.)
33 Aua o lē sa lē talitonu ia Ioane e uiga ia te aʼu, e lē mafai ona talitonu ia te aʼu, vaganā ua muai salamō o ia.
FIS, Mataio 21:47–56 (faatusatusa i le Mataio 21:45–46)
(Ua taʼutino mai e Iesu o ia o le maatulimanu sili. Ua tuuina atu le talalelei i tagata Iutaia ona oo atu lea i tagata o Nuuese. E faaumatia o e amioleaga pe a toe afio mai Iesu.)
47 Ma ina ua faalogo faitaulaga sili ma Faresaio i ana faataoto, na latou iloa na ia fetalai e faatatau ia te i latou.
48 Ma sa latou fai ane ia i latou lava, Pe manatu ea lenei tagata e mafai e ia e toatasi ona faaleagaina lenei malo tele? Ma sa latou ita ai ia te ia.
49 Ae ina ua latou saili e faaoo lima ia te ia, sa matataʼu i latou i le motu o tagata, aua ua latou iloa ua talitonu le motu o tagata o ia o se perofeta.
50 Ma sa o mai ona soo ia te ia, ma sa fetalai atu Iesu ia te i latou, Pe ua outou ofo ea i upu o le faataoto lea na ou tautala atu ai ia te i latou?
51 E moni, ou te fai atu ia te outou, O aʼu o le maa, ae ua teena aʼu e na tagata amioleaga.
52 O aʼu o le ulu o le maatulimanu. O nei tagata Iutaia o le a paʼuʼū mai i oʼu luga, ma lepetia ai.
53 Ma o le a aveesea le malo ai ia te i latou, ma e tuuina atu i se atunuu e aumaia ai ona fua; (o lona uiga o Nuuese.)
54 O le mea lea, soo se tasi e paʼū i ai lenei maa, e olopalaina ai o ia.
55 Ma o lea afai e oo mai le Alii o le tovine, na te ia faaumatia na tagata pagatia ma le amioleaga, ma na te toe tuuina atu lona tovine i isi tagata faifaatoaga, i aso gataaga lava, o e latou te tuuina atu fua i o latou tau.
56 Ona latou malamalama ai lea i le faataoto lea na ia fetalai atu ai ia te i latou, e tatau foi ona faaumatia Nuuese, pe a afio ifo le Alii mai le lagi e nofotupu i lona tovine, o le fogaeleele lea ma e o mau ai.