1 Ug dihay mipakita nga usa ka dako nga timailhan sa langit, diha sa panagway sa mga butang dinhi sa yuta; usa ka babaye nga gisul-uban og adlaw, ug ang bulan ilawom sa iyang mga tiil, ug diha sa iyang ulo usa ka korona nga may napulog duha ka mga bitoon.

2 Ug ang babaye nga nagsabak, mihilak, nagbati diha sa pagpanganak, ug gisakitan sa pagpanganak.

3 Ug siya nanganak og usa ka bata nga lalaki, kinsa mao ang magmando sa tanan nga mga nasud uban sa usa ka gunitanan nga puthaw; ug ang iyang anak gibayaw ngadto sa Dios ug sa iyang trono.

4 Ug dihay mipakita nga lain nga timailhan didto sa langit; ug tan-awa, usa ka dako nga dragon nga pula, nga adunay pito ka mga ulo ug napulo ka mga sungay, ug pito ka mga korona diha sa iyang mga ulo. Ug ang iyang ikog midala sa ikatulo ka bahin sa mga bitoon sa langit, ug mitambug kanila ngadto sa yuta. Ug ang dragon mibarug diha sa atubangan sa babaye nga nanganak, andam sa paglamoy sa iyang bata human kini matawo.

5 Ug ang babaye milayas ngadto sa kamingawan, diin siya adunay usa ka dapit nga giandam sa Dios, nga sila mopakaon kaniya didto sulod sa usa ka libo duha ka gatusan ug kan-uman ka mga tuig.

6 Ug dihay gubat sa langit; si Miguel ug ang iyang mga anghel nakig-away batok sa dragon; ug ang dragon ug iyang mga anghel nakig-away batok ni Miguel;

7 Ug ang dragon wala makabuntog batok kang Miguel, ni sa bata, ni sa babaye nga mao ang simbahan sa Dios, kinsa giluwas sa iyang mga kasakit, ug mipatunhay sa gingharian sa atong Dios ug sa iyang Kristo.

8 Ni adunay dapit nga makita sa langit alang sa dako nga dragon, kinsa gitambug; kanang tigulang nga bitin nga gitawag og yawa, ug usab gitawag og Satanas, nga naglimbong sa tibuok kalibutan; siya gitambug ngadto sa yuta; ug ang iyang mga anghel gitambug uban kaniya.

9 Ug ako nakadungog og usa ka makusog nga tingog didto sa langit nga nag-ingon, Karon miabut na ang kaluwasan, ug kalig-on, ug ang gingharian sa atong Dios, ug ang gahum sa iyang Kristo;

10 Kay ang tigpasangil sa atong mga kaigsoonan gitambug, kinsa mipasangil kanila sa atubangan sa atong Dios adlaw ug gabii.

11 Kay sila nakabuntog kaniya pinaagi sa dugo sa Kordero, ug pinaagi sa pulong sa ilang pagpamatuod; kay sila wala mahigugma sa ilang kaugalingon nga mga kinabuhi, apan naghupot sa pagpamatuod bisan ngadto sa kamatayon. Busa, paglipay O mga langit, ug kamo nga nagpuyo diha kanila.

12 Ug human niini nga mga butang ako nakadungog og lain nga tingog nga nag-ingon, Alaot ngadto sa mga lumulupyo sa yuta, oo, ug sila kinsa nagpuyo dinha sa mga isla sa kadagatan! kay ang yawa nanaog nganha kaninyo, nga adunay dako nga kaligutgut, tungod kay siya nasayud nga siya adunay mubo na lamang nga panahon.

13 Kay sa pagkakita sa dragon nga siya gitambug ngadto sa yuta, siya migukod sa babaye kinsa nanganak og bata nga lalaki.

14 Busa, ngadto sa babaye gihatag ang duha ka mga pako sa dako nga agila, nga siya unta makalayas ngadto sa kamingawan, ngadto sa iyang dapit, diin siya giamumahan sulod sa usa ka panahon, ug mga panahon, ug katunga sa panahon, gikan sa nawong sa bitin.

15 Ug ang bitin nagsabwag gikan sa iyang ba-ba og tubig ingon og usa ka lunop nga naggukod sa babaye, nga siya makahimo kaniya nga maanod sa lunop.

16 Ug ang yuta nagtabang sa babaye, ug ang yuta nagbuka sa iyang ba-ba, ug naglamoy sa lunop nga gisabwag sa dragon gikan sa iyang ba-ba.

17 Busa, ang dragon nasuko sa babaye, ug milihok aron makiggubat uban sa nahibilin sa iyang binhi, kinsa naghupot sa mga sugo sa Dios, ug adunay pagpamatuod kang Jesukristo.