1 Ma sa faaali mai le faailoga tele i le lagi, i le faatusa o mea o i luga o le fogaeleele; o le fafine ua ofu i le la, ma le masina i lalo ifo o ona vae, ma sa i luga o lona ulu se paleālii o fetū e sefululua.

2 Ma sa to le fafine, na alaga, ua faatīgā i le fanau mai, ma sa tīgāina ai ina o le a fanau.

3 Ma sa fanauina e ia se tama tane, o lē na te pule i atunuu uma i le tootoo uʼamea; ma sa segia aʼe lana tama i le Atua ma lona nofoālii.

4 Ma sa faaali mai foi le isi faailoga i le lagi; ma faauta, o le tarako mūmū tele, e fitu ona ulu ma ona seu e sefulu, ma paleālii e fitu i luga o ona ulu. Ma sa tosoina e lona siusiu le tasi vaetolu o fetū o le lagi, ma sa lafo ifo ai i latou i le lalolagi. Ma sa tu ai le tarako i luma o le fafine lea o le a fanau, ua saunia e ai i lana tama pe a fanau mai.

5 Ma sa sola le fafine i le vao, i le mea na saunia e le Atua e nofo ai o ia, ina ia latou fafaga ai ia te ia i lea mea i tausaga e tasi le afe ma le lua selau ma le onogafulu.

6 Ma sa tau foi le taua i le lagi; sa tau ai Mekaeli ma ana agelu e tetee i le tarako; ma sa tau foi le tarako ma ana agelu e tetee ia Mekaeli;

7 Ma sa lē manumālō le tarako ia Mekaeli, po o le tamaitiiti, po o le fafine, o le ekalesia lea a le Atua, o lē na laveaiina mai i ona tīgā, ma sa aumaia ai le malo o lo tatou Atua ma lona Keriso.

8 Sa le maua foi se nofoaga i le lagi mo le tarako tele, o lē na tuliese; o lena gata tuai na taʼua o le tiapolo, ma sa taua foi o Satani, lea e faasesēina le lalolagi atoa; na tuliese atu o ia i le fogaeleele; ma sa tulieseina ana agelu faatasi ma ia.

9 Ma sa ou faalogo i se leo tele ua faapea mai i le lagi, O lenei ua oo mai le faaolataga, ma le malosi, ma le malo o lo tatou Atua, ma le mana o lona Keriso;

10 Aua ua lafo ifo i lalo lē na molia o tatou uso, o lē na molia i latou i luma o lo tatou Atua i le ao ma le po.

11 Aua ua latou manumālō ia te ia e ala i le toto o le Tamai Mamoe, ma i le upu a la latou molimau; aua sa latou lē faapelepeleina o latou lava ola, ae na tausisi i le molimau e oo lava i le oti. O le mea lea, inā ʼoliʼoli ia outou i le lagi e, ma outou o e o nonofo ai.

12 Ma ina ua mavae nei mea, na ou faalogoina se isi leo ua faapea mai, Oi talofa i e nonofo i luga o le fogaeleele, ioe, ma latou o e nonofo i motu o le moana! aua ua sau i lalo le tiapolo ia te outou, ua lotoā tele, aua ua iloa e ia ua saasaa lona taimi.

13 Aua ina ua iloa e le tarako ua tuliese ifo o ia i luga o le fogaeleele, ona faasaua ai lea o ia i le fafine lea na fanaua le tama-tane.

14 O lea, na tuuina atu ai i le fafine apaau e lua o se aeto tele, ina ia mafai ai e ia ona sola atu i le vao, i lona nofoaga, i le mea e fafagaina ai o ia i se taimi, ma taimi, ma le afa o le taimi, mai luma o le gata.

15 Ma e luai atu e le gata o le vai mai lona gutu e pei o se lolo e mulimuli atu i le fafine, ina ia mafai ai e ia ona aveeseina o ia i le lolo.

16 Ma sa fesoasoani le laueleele i le fafine, ma ua faamaga e le laueleele lona gutu, ma ua foloina ai le lolo lea na luai mai e le tarako mai lona gutu.

17 O lea, sa ita tele ai le tarako i le fafine, ma sa alu atu ai e tau le taua ma e na totoe o lana fanau, o e ua tausi i poloaiga a le Atua, ma ua maua le molimau ia Iesu Keriso.