1 Li kik’utb’esiik chiru laj Jwan, jun xmoos li Dios, li kik’ehe’ re xb’aan li Jesukristo, re xk’utb’al chiruheb’ lix moos li k’a’aq re ru tento taak’ulmanq chi seeb’, li kixtaqla ut kireetali a’an rik’in ruq’ lix anjel, re laj Jwan lix moos,

2 Li kixch’olob’ resil li raatin li Dios, ut li yaal ch’olob’anb’il chirix li Jesukristo, ut chixjunil li k’a’aq re ru kiril.

3 Osob’tesinb’ileb’ chixjunil li neke’ilok ru, ut eb’ li neke’ab’ink re ut neke’xtaw ru li aatin re li profeetil yehom a’in, ut neke’xpaab’ li k’a’aq re ru tz’iib’anb’il chi sa’, xb’aan naq taanach’oq chaq xhoonal lix k’ulunik li Qaawa’.

4 Anajwan a’in lix ch’olob’ahom laj Jwan reheb’ li wuqub’ chi moos li wankeb’ sa’ xb’eeneb’ li wuqub’ chi iglees sa’ Asia. Li usilal chiwanq eerik’in, ut li tuqtuukilal chi k’eeb’il chaq xb’aan li ani wan, ut kiwan, ut toj taachalq; li kixtaqla chaq lix anjel chalen chaq chiru lix k’ojarib’aal, re xch’olob’ankil xyaalal chiruheb’ li ani wankeb’ choq’ wuqub’ chi moos sa’ xb’eeneb’ li wuqub’ chi iglees.

5 Jo’kan ut, laa’in, laj Jwan, laj ch’olob’anel li paab’ajel, ninch’olob’ xyaalaleb’ li k’a’aq re ru li ke’q’axtesiik we xb’aan li anjel, ut rik’in li Jesukristo li xb’een yo’lanejaq reheb’ li kamenaq, ut li Awa’b’ej reheb’ lix rey li ruchich’och’.

6 Ut re a’an li kooxra, chiwanq loq’alil; li kooxch’aj chirix li qamaak sa’ tz’aqal lix kik’el a’an, ut kooxk’e jo’ rey ut aj tij chiru li Dios, lix Yuwa’. Re a’an chiwanq loq’alil ut awa’b’ejil, chi junelik q’e kutan. Amen.

7 Xb’aan naq k’ehomaq reetal, taachalq sa’eb’ li choql rochb’een lajeeb’ mileb’ reheb’ lix santil paab’anel sa’ li awa’b’ejihom, tiqtookeb’ rik’in lix loq’alil lix Yuwa’. Ut li junjunq xsa’ uhej taa’iloq re; ut eb’ li ani ke’xk’ob’, ut chixjunileb’ li junkab’al re li ruchich’och’ te’yaab’aq sa’ xk’ab’a’ a’an. Chi jo’kan ajwi’, Amen.

8 Xb’aan naq a’an naxye, Laa’in li Alfa ut li Omega, lix tiklajik ut li roso’jik, li Qaawa’, li wan, ut li kiwan, ut li toj taawanq, li Nimajwal.