1 Ut kik’utun jun nimla eetalil sa’ choxa, chi chanchan li k’a’ru wan sa’ ruchich’och’; jun li ixq tiqto rik’in li saq’e, ut li po rub’el li roq, ut sa’ xb’een xjolom jun koroon re kab’laju chahim.

2 Ut li ixq, rik’in naq wan sa’ yu’am, kixjap re, sa’ xrahil li alank, ut tawasinb’il re taak’iraaq.

3 Ut kirala jun li al teelom, li tento taataqlanq re chixjunileb’ li tenamit rik’in jun b’aar ch’iich’; ut lix yum kixoke’ rik’in li Dios ut lix k’ojarib’aal.

4 Ut kik’utun jun chik eetalil sa’ choxa; ut k’ehomaq reetal, jun nimla josq’ aj xul kaq rix, wan wuqub’ xjolom ut lajeeb’ xxukub’, ut wuqub’ li koroon sa’ xb’eeneb’ lix jolom. Ut lix ye kixkelo chaq li rox jachal li chahim re choxa, ut kixkuteb’ chi ch’och’. Ut li josq’ aj xul kixaqli chiru li ixq li yoo chi alank, kawresinb’il chixnuq’b’al li ralal chirix naq taayo’laaq.

5 Ut li ixq ki’eelelik toj sa’ li yamyookil ch’och’, b’ar wan wi’ jun xna’aj kawresinb’il xb’aan li Dios, re te’xk’e xtzakemq chiru jun mil wiib’ cient rik’in oxk’aal chihab’.

6 Ut kiwan li pleet sa’ choxa; laj Miguel ut eb’ lix anjel ke’xpleeti li josq’ aj xul; ut li josq’ aj xul ut eb’ lix anjel ke’xpleeti laj Miguel;

7 Ut li josq’ aj xul moko kinumta ta sa’ xb’een laj Miguel, chi moko li al, chi moko li ixq, a’an lix iglees li Dios, li kik’ira chaq chiru xrahil, ut kirala li awa’b’ejihom re li qaDios ut lix Kristo.

8 Chi moko kitawman chik na’ajej sa’ choxa choq’ re li nimla josq’ aj xul, li ki’isiik chaq; li najter aj k’anti’ a’an aj tza yeeb’il re, ut jo’kan ajwi’ aj Satanas yeeb’il re, li nab’alaq’ink re chixjunil li ruchich’och’; a’an ki’isiik chaq toj sa’ li ruchich’och’, ut eb’ lix anjel ke’isiik chaq rochb’een.

9 Ut kiwab’i jun kawil xyaab’ kuxej chixyeeb’al sa’ choxa, Anajwan chalenaq li kolb’a-ib’, ut xnimal li metz’ew, ut lix awa’b’ejihom li qaDios, ut lix wankilal lix Kristo.

10 Xb’aan naq laj jitol reheb’ li qas qiitz’in ak kutb’il taq’a, li najitok chaq reheb’ chiru li qaDios chi kutan ut chi q’eq.

11 Xb’aan naq ke’numta sa’ xb’een rik’in lix kik’el li Karneer, ut rik’in li aatin re li yaal ch’olob’anb’il xb’aaneb’; xb’aan naq moko ke’xra ta tz’aqal lix yu’ameb’, ke’xpaab’ b’an li yaal ch’olob’anb’il toj reetal ajwi’ li kamk. Chi jo’kan, chisaho’q eech’ool ex choxa, ut laa’ex li wankex chi sa’.

12 Ut chirix li k’a’aq re ru a’in kiwab’i jun chik xyaab’ kuxej chixyeeb’al: Rahilal sa’ xb’eeneb’ li ani wankeb’ sa’ li ruchich’och’, relik chi yaal, ut eb’ li neke’wan sa’eb’ li ch’och’ sa’ xyi li palaw! xb’aan naq laj tza ak kub’enaq eerik’in, chi k’a’jo’ xjosq’il, xb’aan naq naxnaw naq yal ka’ch’in li kutan wan chiru.

13 Xb’aan naq chirix naq kiril li josq’ aj xul naq kutb’il chaq sa’ li ruchich’och’, kixrahob’tesi li ixq li ki’alank chaq re li teelom al.

14 Jo’kan naq re li ixq kik’eeman xkab’ichal lix xik’ jun nimla t’iw, re taa’eeleliq toj sa’ li yamyookil ch’och’, sa’ lix na’aj, b’ar wi’ ch’olaninb’il chiru jun q’ehil, ut eb’ li q’ehil, ut lix yijach jun q’ehil, chiru chaq li rilob’aal li k’anti’.

15 Ut li k’anti’ kixkut chaq sa’ li re li ha’ jo’ b’uut’iha’ chirix li ixq, re tixk’e chi kelook xb’aan li b’uut’iha’.

16 Ut li ch’och’ kixtenq’a li ixq, ut li ch’och’ kixte li re, ut kixnuq’ li b’uut’iha’ li kixkut li josq’ aj xul chalen sa’ li re.

17 Jo’kan naq li josq’ aj xul kichal xjosq’il rik’in li ixq, ut xko’o chixpleetinkil li rela’ li riyajil, li neke’paab’ank re lix taqlahom li Dios, ut li wan rik’ineb’ li yaal ch’olob’anb’il chirix li Jesukristo.