5 Bwa ngke ti maiu n te rabwata, tangiran te bure, are aki ira nanon te tua, a mwakuri i nanon bwain rabwatara ni kariki ua are tokina te mate.

6 Ma ngkai ti a kamaiuaki man te tua are ti tauaki i nanona, ibukina bwa ti mate n te tua, bwa ti riai ni beku n te tamnei ae boou, ao tiaki n te man ni koroboki ae bwainikawai.

7 Tera ae ti na taekinna ngkanne? Bon te tua te bure? Tiaki ngaia anne. Tiaki, I aki ata te bure, ma ti man te tua, bwa I aki ata kaibwabwarun te nano, ma ti ibukina bwa e taekinna te tua, Ko na tai mataai.

8 Ma te bure, e karekea taina man te tua, e karika inanou te nano ni kaibwabwaru ae korakora n aekana nako. Bwa n akean te tua te bure e mate.

9 Bwa rimoa I maiu n aki riaon te tua, ma ngke e roko ana tua Kristo, e a manga oki te bure, ao I mate.

10 Ao ngke I aki kakoaua ana tua Kristo are e roko, are e baireaki nakon te maiu, I kunea bwa e motika taekau nakon te mate.

11 Bwa te bure, e karekea taina, e kaakea te tua, ao e mwamwanaai; ao I kamateaki iai.

12 E ngae n anne, I kunea te tua bwa e tabu, ao te kaetieti bwa e tabu, ao e eti, ao e raoiroi.

13 Bon are e raoiraoi are e riki bwa te mate ibukiu? Tiaki ngaia anne. Bwa e aonga ni kaotaki te bure bwa te bure, n te bwai ae raoiroi are e karika te mate inanou; bwa man te tua, te bure e kona n riki bwa te bure ae kakaiaki.

14 Bwa ti ataia bwa te kaetieti bon bwain te tamnei; bwa ngke I mena i aan te tua, I bon bwaina te nano n rabwata, ae kaboaki nako i aan te bure.

15 Ma ngkai ngai bwain te tamnei; bwa are I tuangaki bwa N na karaoia, I karaoia; ao are I tuangaki bwa N na aki kariaia, I aki kariaia.

16 Bwa te bwai are I ataia bwa e aki eti, I aki karaoia; bwa te bwai are te bure, I ribaia.

17 Ngkanne ngkana I aki karaoa te bwai are I aki kariaia, I ira nanon te tua, bwa e bon raoiroi; ao I aki kabuakakaaki.

18 Ngkai ngkanne, bon tiaki ngai are karaoa te bure; ma I kataia n tautaekana te bure are maeka inanou.

19 Bwa I ataia bwa inanou, are, i nanon rabwatau, akea te bwai ae raoiroi ae maeka iai; ma te kani karaoia bon iai irou, ma e aki reke irou karaoan ae e raoiroi, ma ti iroun Kristo.

20 Bwa te raoiroi are N na tia ni karaoia ngke I mena i aan te tua, I kunea bwa e aki raoiroi; ngaia are, I aki karaoia.

21 Ma te buakaka are I aki kani karaoia i aan te tua, I kunea bwa e raoiroi; anne, I karaoia.

22 Ngkai ngkana I karaoa anne, rinanon ana ibuobuoki Kristo, I aki kani karaoia i aan te tua, I aki mena i aan te tua; ao I aki manga kataia ni karaoa ae kairua, ma N na tautaekana te bure are maeka inanou.

23 I kunea ngkanne bwa i aan te tua, bwa n te tai are I kani karaoa ae raoiroi te buakaka e mena irou, bwa I kimwareirei n ana tua te Atua ni kaineti ma nanon te aomata.

24 Ao ngkai I noora te tua riki teuana, are ana tua Kristo, ao e teimatoa n tiku n au iango.

25 Ma bwain rabwatau a buaka ni kaitara te tua are n au iango, ao ni uotai nakon te tautaekanaki n tuan te bure are e i nanon bwain rabwatau.

26 Ao ngkana I aki tautaekana te bure are i nanou, ma ni irikou I beku iroun tuan te bure; O te aomata ae buakaka ngai! antai ae na kamaiuai man rabwatan te mate aei?

27 I katituaraoa te Atua rinanon Iesu Kristo ara Uea, ngkai, bwa ngai I toro iroun ana tua te Atua ma nanou.