5 Mpo ntango tozalaki kati na mosuni, bamposa ya masumu, oyo ezalaki engebene na mobeko te, esalaki kati na binama na biso mpo na kobota mbuma ya liwa.

6 Kasi sikawa tokangolami uta na mobeko oyo wapi tokangamaki, mpo tozali bakufi engebene na mobeko, ete tosala makasi mpo na koyeisa molimo sika, mpe na konuna ya baletele te.

7 Bongo tokoloba nini? Mobeko ezali lisumu? Nzambe apekisi. Te, nalingaki nayeba lisumu te, soki na nzela ya mobeko te; mpo ete nalingaki nayeba bilula-lula te, longola se soki mobeko elobaki, Okolula te.

8 Kasi lisumu, lokola ezwaki libaku na motindo, ememisi kati na ngai mposa makasi ya lolenge nyonso. Mpo soki mobeko te lisumu esengelaki kozala te.

9 Mpo kala nazalaki na bomoi na kozangaka kobuka mobeko, kasi ntango motindo ya Klisto eyaki, lisumu ezongaki makasi, mpe nakufaki.

10 Mpe soki nandimi te motindo ya Klisto oyo eyaki, oyo ekulisamaki mpo na kopesa bomoi, nayebi ete ekweisaki ngai na kufa.

11 Mpo lisumu, lokola ezwaki libaku, ewanganaki motindo, mpe ekosaki ngai; mpe na nzela na yango nakufaki.

12 Nzokande, nayebaki ete mobeko ezalaki mosantu, mpe motindo ezalaki mosantu, mpe alima, mpe malamu.

13 Boye ezalaki ete eloko oyo ezali malamu emema kufa epayi na ngai? Nzambe apekisi. Kasi lisumu, mpo ete ekoka komonana lisumu na nzela ya oyo ezali malamu esali kufa kati na ngai; ete lisumu, na nzela ya motindo ekoka kokoma lisumu koluta.

14 Mpo toyebi ete motindo ezali eloko ya molimo; kasi ntango nazalaki na nse ya mobeko, nazalaki ya mosuni, natekamaki na nse ya lisumu.

15 Kasi sikawa nazali ya molimo; mpo ete oyo natindami kosala, nazali kosala; mpe ete oyo natindami kopesa nzela te, nazali kopesa nzela te.

16 Mpo oyo nayebi ezali alima te, nakosala te; mpo nazali koyina oyo ezali lisumu.

17 Soki bongo nasali te oyo nakoki kopesa nzela te, nandimi mpo na oyo etali mobeko, ete ezali malamu; mpe nakweisami te.

18 Bongo sikawa, ezali lisusu te ngai nde nasali lisumu; kasi nazali koluka kokonza lisumu oyo ezali kati na ngai.

19 Mpo nayebi ete kati na ngai, elingi koloba, na mosuni na ngai, eloko ya malamu ezali te; mpo mposa ya kosala ezali kati na ngai, kasi kosala oyo ezali malamu nayebi te, bobele na Klisto.

20 Mpo bolamu boye nalingaki kosala ntango nazalaki na nse ya mobeko, nayebi ezali bolamu te; boye, nasali yango te.

21 Kasi nayebi mabe oyo nalingaki te kosala na nse ya mobeko, kozalaka malamu; yango, nde nasalaka.

22 Sikawa soki nasali yango, na lisalisi ya Klisto, nalingaki te kosala na nse ya mobeko, nazali te na nse ya mobeko; mpe ezali lisusu te ete naluka kosala mabe, kasi nazali koluka kokonza lisumu oyo ezali kati na ngai.

23 Nayebi bongo ete na nse ya mobeko, ete ntango nalingi kosala bolamu mabe ezali wana; mpo nasepelaka na mobeko ya Nzambe engebene na moto ya kati.

24 Mpe sikawa namoni mobeko mosusu, kutu motindo ya Klisto, mpe monyatami kati na mayele na ngai.

25 Kasi binama na ngai ezali kobunda na mobeko ya mayele na ngai, mpe komemaka ngai na bokangemi ya mobeko ya lisumu oyo mozali na binama na ngai.

26 Mpe soki nakonzi lisumu oyo ezali kati na ngai te, kasi na nzela ya mosuni nasaleli mobeko ya lisumu; O moto ya mawa oyo nazali! Nani akokangola ngai uta na nzoto oyo ya kufa?

27 Natondi Nzambe na nzela ya Yesu Klisto Nkolo na biso, boye, ete bongo na mayele ngai moko nasalela mobeko ya Nzambe.