5 Ni ena gauna ni noda bula vakayago, na toso ni ivalavala ca, ka a sega ni vaka na lawa, e a cakacaka ena veitiki ni yagoda, me vua ka basika kina na mate.

6 Ia oqo eda sa sereki mai na lawa eda a tauri tu kina, ni da sa mate ki na lawa, me da veiqaravi kina ena yalo vakavoui, ka sega ena ivalavala makawa ni tiki ni lawa lailai duadua.

7 Na cava beka me da kaya? E ivalavala ca beka na lawa? E vakatabuya na Kalou. E sega, au sega ni se kila na ivalavala ca, ia mai na lawa ga; niu a sega ni kila na gagano, vakavo ga ni a kaya na lawa, Mo kakua ni kocokoco.

8 Ia sa yaco na ivalavala ca ena vuku ni ivakaro, sa kauta mai vei au na ivalavala kecega ni gagano. Ni sega na lawa sa ka mate na ivalavala ca.

9 Niu a bula ka sega ni talaidredre ki na lawa, ia ni yaco mai na ivakaro nei Karisito, sa tu tale na ivalavala ca, kau mani mate.

10 Ia niu sega ni vakabauta na ivakaro nei Karisito ka a yaco mai, ka lesi me baleta na bula, au raica ni sa vakarusai au ki na mate.

11 Ni sa yaco na ivalavala ca, sa cakitaki na ivakaro, kau rawai kina; ia ena vuku ni ka oqo au sa vakamatei kina.

12 Ia, au raica ni sa savasava na lawa, ia na ivakaro e sa savasava, ka dodonu, ka vinaka.

13 Ia na veika vinaka sa yaco me ka e rawa ni vakamatei au? Sa vakatabuya na Kalou. Ia na ivalavala ca, me na vaka na irairai ni ivalavala ca ena veika vinaka ka na vakavuna na mate vei au; na ivalavala ca ena vuku ni ivakaro, ena rawa ni yaco me ivalavala ca levu sara.

14 Ni da sa kila ni sa ka vakayalo na ivakaro; ia niu a tiko ena ruku ni lawa, au se vakayago tikoga, kau sa volitaki ki na ivalavala ca.

15 Ia oqo au sa ka vakayalo; ni veika sa vakaroti meu cakava, au sa cakava; ia na veika sa vakaroti meu kakua ni vakatara, au sa sega ni vakatara.

16 Na veika au kila ni sega ni dodonu, au na sega ni cakava; ia na veika e ivalavala ca, au sa cata sara.

17 Ia kevaka au sa sega ni vakayacora na veika au sega ni vakatara, au sa duavata kina kei na lawa, ni sa vinaka; ka’u sa sega kina ni cudruvi.

18 Ia oqo, sa sega ni koi au sa ivalavala ca; ia au sa segata me’u vakamalumalumutaka na ivalavala ca sa tiko vei au.

19 Ni’u sa kila ni sa sega ni tu vei au e dua na ka vinaka, oya ena yagoqu; ia sa tu vei au na kaukauwa me’u lewa, ia me’u cakava na ka e vinaka au sega ni kunea rawa, vei Karisito ga.

20 Na vinaka au na cakava ni’u vauci tu ena lawa, au raica ni sega ni vinaka; o koya au sa sega kina ni cakava.

21 Ia na veika ca au na sega ni cakava niu vauci tu ena lawa, au raica ni vinaka; oqori, au na cakava.

22 Ia kevaka au sa vakayacora na veika ka’u na sega ni vakayacora ni’u vauci tu ena lawa, ena veivuke nei Karisito, au sa sega kina ni vauci ena lawa; o koya au sa sega kina ni segata tale me’u cakava na ca, ia me’u vakamalumalumutaka na ivalavala ca sa tu vei au.

23 Au raica kina ena ruku ni lawa, ena gauna au na cakava kina na veika vinaka sa tu vata kei au na ca; ni’u sa dau taleitaka na lawa ni Kalou e lomaqu dina.

24 Ia oqo au sa raica e dua tale na lawa, io na ivakaro i Karisito, ka sa volai tu ena noqu vakasama.

25 Ia na veitikiqu sa veivala kei na lawa sa tu e lomaqu, ka vesuki au ki na lawa ni ivalavala ca sa tu ena veitikiqu.

26 Ia kevaka au sega ni vakamalumalumutaka na ivalavala ca sa tu vei au, ia me’u qarava na lawa ni ivalavala ca ena yagoqu; Isa a tamata vakaloloma koi au! Ko cei me na sereki au mai na yago ni mate oqo?

27 Au vakavinavinaka vua na Kalou mai vei Jisu Karisito na noda Turaga, ia, sa vakakina ena vakasama au qarava kina na lawa ni Kalou.