Koe Tohi ae Balofita ko Joeli

¶ 1 NAE hoko ae folofola a Jihova kia Joeli koe foha o Betueli.

2 Fanogo ki he mea ni, akimoutolu koe kau mātua, bea tokaga ho mou teliga, ae kakai oe fonua. Kuo ai ha mea behe ni i ho mou gaahi aho, be i he gaahi aho o hoo mou gaahi tamai?

3 Tala ia ki hoo mou fānau, bea ke nau tala ki he e nau fānau, bea moe fānau anautolu ki he toutagata e taha.

4 Koia nae tuku e he hee kuo kai e he hee maumau; bea koia nae tuku e he hee maumau kuo kai e he unufe fulufulu, bea koia nae tuku e he unufe fulufulu, kuo kai e he unufe.

5 Ae kau kona, mou a, bea tagi; bea fakatagiloloa, akimoutolu ae kau inu uaine, koeuhi koe uaine foou; he kuo motuhi ia mei ho mou gutu.

6 He kuo alu hake ha buleaga ki hoku fonua, oku malohi bea taefaalaua, ko hono nifo koe nifo oe laione, bea ko hono kouahe koe kouahe oe laione lahi.

7 Kuo ne fakalala eku vaine, bea fohi‘i ae kili o eku akau koe fiki; kuo ne fakamolemole ia o maa; kuo fakahinehina hono gaahi vaa.

¶ 8 Tagi, o hage koe taahine boloi kuo kofu aki ae tauagaa, koeuhi koe unoho o ene kei jii.

9 Koe hifo aki ae mea kai, bea moe hifo aki ae mea inu kuo motuhi ia mei he fale o Jihova; oku tagi ae kau taulaeiki, ae kau faifekau a Jihova.

10 Oku maumau ae goue, oku tagi ae fonua; he kuo maumau‘i ae koane; oku maha ae uaine foou, oku vaivai ae lolo.

11 Mou ma, ae kau tagata goue; fakatagiloloa, e kau tauhi vaine, koeuhi koe uite moe baale; he kuo auha ae ututa‘u i he goue.

12 Oku momoa ae vaine, oku vaivai ae akau koe fiki; koe akau koe bomikaniti, moe akau koe boga, moe akau koe abele foki, io, koe akau kotoabe oe goue oku mae; koeuhi oku mate ae fiefia mei he loto oe gaahi foha oe tagata.

13 Nootaki ho mou vala, bea tagi, ae kau taulaeiki: tagi fakaloloa, ae kau faifekau oe feilaulauaga; ha‘u, o tokoto i he bo katoa i he tauagaa ae kau tamaioeiki a hoku Otua: he koe feilaulau meakai bea moe feilaulau inu, kuo taofi mei he fale o ho mou Otua.

¶ 14 Mou tuutuuni ae aukai, fanogonogo ae fakataha mamafa, tanaki ae kau mātua, bea moe kakai kotoabe oe fonua ki he fale o Jihova ko ho mou Otua, bea tagi kia Jihova, o behe.

15 Oiaue ae aho! he kuo ofi ae aho o Jihova, bea e hoko mai ia o hage koe fakaauha mei he Mafimafi.

16 Ikai kuo motuhi ae mea kai mei ho tau mata, io, koe fiefia moe nekeneka mei he fale o ho tau Otua?

17 Oku bobo ae tega i he loto kelekele, oku lala ae gaahi feleoko, kuo holoki ae gaahi fale koloa; he kuo mae ae koane.

18 Oiaue ae to‘e ae faga manu! oku feiga ae faga bulu, koeuhi oku ikai ha nau mohuku; io, oku tuutamaki ae faga sibi.

19 E Jihova, teu tagi kiate koe: koeuhi kuo kai e he afi ae mohuku oe toafa, bea kuo tutu e he ulo afi ae gaahi akau kotoabe oe goue.

20 Oku tagi foki kiate koe ae faga manu oe vao: koeuhi oku momoa ae gaahi tafeaga vai, bea kuo kai e he afi ae mohuku oe toafa.