¶ 1 VAKAI teu fekau a hoku fakamelomelo, bea te ne teuteu ae hala i hoku ao: bea ko Jihova aia oku mou kumi ki ai, e haele fakafokifa mai ki hono fale tabu, io, ae talafekau oe fuakava, aia oku mou fiefia ai: vakai, oku behe e Jihova oe gaahi kau tau. E na‘u ia.

2 Ka kohai ia te ne faa tali ae aho o ene ha‘u? bea kohai e faa tuu oka ne ka ha mai? he oku ne hage koe afi oia oku fakamaa ukamea, bea tatau moe mea fakamaa ae kau fo babalagi.

3 Bea te ne nofo o hage koe tagata oku ne fakamaa mo fakahaohaoa ae siliva: bea te ne fakamaa ae gaahi foha o Livai, mo ne fakamaa akinautolu o hage koe koula moe siliva, koeuhi ke nau atu kia Jihova ha feilaulau oku maonioni.

4 Bea e toki lelei ae feilaulau a Juta mo Jelusalema kia Jihova, o tatau moe gaahi muaki aho, bea hage koe gaahi ta‘u i mua.

5 Bea teu unuunu atu kiate kimoutolu ke fakamāu; bea teu fakamooni tootoo ki he kau kikite kākā mo kinautolu oku fuakava loi, bea kiate kinautolu oku fakamalohi ae totogi oia oku gaue, ae fefine kuo mate a hono unoho, bea moe tamai mate, bea mo kinautolu oku kākā‘i ae muli, bea mo ia oku ikai ke manavahe kiate au, oku behe e Jihova oe gaahi kau tau.

6 He ko au ko Jihova oku ikai teu liliu; koia oku ikai auha ai akimoutolu ae gaahi foha o Jekobe.

¶ 7 Io talu mei he gaahi aho o hoo mou gaahi tamai, kuo mou hehe mei he eku gaahi tuutuuni, o ikai fai ki ai. Tafoki mai kiate au, beu teu tafoki kiate kimoutolu, oku behe e Jihova oe gaahi kau tau. Ka naa mou behe, Te mau tafoki koeha?

¶ 8 E kaihaa ae tagata mei he Otua? Ka kuo mou kaihaa meiate au. Ka oku mou behe ekimoutolu, Kuo mau kaihaa meiate koe i he ha? I hono vahe hogofulu oe mea, bea moe gaahi feilaulau.

9 Oku fakamalaia aki akimoutolu ae malaia: koeuhi kuo mou kaihaa meiate au, io, ae buleaga ni kotoa.

10 Mou omi ae gaahi vahe hogofulu oe mea ki he tukuga koloa, koeuhi ke ai ha mea kai i hoku fale, bea mou ahiahi ai au, oku behe e Jihova, oe gaahi kau tau, be teu fakaava ae gaahi mataba oe lagi be ikai, beau liligi hifo kiate kimoutolu ha tabuaki, e ikai ha botu e faa hao ia ki ai.

11 Bea teu valoki‘i ae fai fakaauha koeuhi ko kimoutolu, bea e ikai te ne maumau ae fua o ho mou kelekele; bea e ikai foki li mai e he vaine a hono fua ki he goue oku heeki ke motua, oku behe e Jihova oe gaahi kau tau.

12 Bea e ui akimoutolu koe monuia e he buleaga kotoabe: he te mou hoko koe fonua matamatalelei, oku behe e Jihova oe gaahi kau tau.

¶ 13 Kuo fielahi mai hoo mou lea kiate au, oku behe e Jihova. Ka oku mou behe ekimoutolu, Koeha e mau lea kuo fai kiate koe?

14 Kuo mou behe, Koe mea taeaoga ae tauhi ki he Otua: bea koeha kuo tau ma‘u i he fai ki he ene gaahi fekau, moe tau alu fakaagavaivai i he ao o Jihova oe gaahi kau tau?

15 Bea oku tau ui eni ae fielahi koe monuia: io, oku fakalaga hake akinautolu oku fai agahala: io, naa mo ia oku ahiahi kovi ki he Otua, oku hao be akinautolu.

¶ 16 Bea ko kinautolu nae manavahe kia Jihova naa nau toki lea fetokoniaki iate kinautolu: bea nae ogo‘i ia e Jihova, bea ne fanogo ki ai, bea nae tohi i hono ao ae tohi fakamanatu, onautolu nae manavahe kia Jihova, mo nau faa fakalaulauloto ki hono huafa.

17 Bea oku behe e Jihova oe gaahi kau tau, e hoko akinautolu ko eku koloa mahuiga fau, i he aho koia teu gaohi ki ai; bea teu mamae kiate kinautolu, o hage koe mamae ha tagata ki hono foha oona oku gaue kiate ia.

18 Bea te mou toki liliu mai, bea ilo hono fai kehekehe ae maonioni moe agahala, mo hono fai kehekehe, aia oku gaue ki he Otua, mo ia oku ikai ke gaue ki ai.