¶ 1 KA e hoko o behe i he gaahi aho amui, e fokotuu mau ae mouga oe fale o Jihova i he tumutumu oe gaahi mouga, bea e hakeaki‘i ia ke maoluga i he gaahi tafugofuga; bea e tafe atu ki ai ae kakai.

2 Bea e ha‘u ae kakai toko lahi mo nau behe, Ha‘u ke tau alu hake ki he mouga o Jihova, bea ki he fale oe Otua o Jekobe; bea te ne akonaki‘i akitautolu i hono gaahi hala, bea te tau eveeva i hono gaahi hala; he koe fono e alu atu mei Saione, moe folofola a Jihova mei Jelusalema.

¶ 3 Bea te ne fakamāu i he lotolotoga oe gaahi kakai, mo valoki‘i ae gaahi buleaga malohi oku mamao atu; bea te nau tuki e nau gaahi heleta, koe gaahi huo toho, bea moe nau gaahi tao, koe gaahi hele auhani: e ikai hiki e ha buleaga ae heleta ki ha buleaga, bea e ikai te nau toe ako ki he tau.

4 Ka te nau nofo taki taha ae tagata i he malumalu o hono vaine, moe malumalu o hono fiki; bea e ikai ha niihi ke fakamanavahe‘i akinautolu: he koe fofoga o Jihova oe gaahi kau tau kuo ne folofola ai.

5 He koe kakai kotoabe e eveeva taki taha i he higoa o hono Otua, bea te mau eveeva i he huafa o Jihova ko ho mau Otua o lauikuoga mo taegata.

6 Oku behe e Jihova, i he aho koia teu tanaki aia nae lotolotoua bea teu fakataha aia nae kabuji kitua, bea mo ia kuou fakamamahi;

7 Bea teu gaohi ia koe toega aia nae lotolotoua, bea koe buleaga malohi aia nae jiaki ki he mamao: bea e bule a Jihova kiate kinautolu i he mouga ko Saione, o gata mei heni, o a‘u o taegata.

8 Bea ko koe, e fale leo o Iteli, koe botu malohi oe ofefine o Saione, e hoko kiate koe, io, ae uluaki bule: e hoko ae buleaga ki he ofefine o Jelusalema.

9 Koeni, koeha oku ke tagi kalaga ai? oku ikai ha tu‘i kiate koe? kuo auha hoo tagata ako fono? he koe mamahi kuo ne ma‘u koe, o hage ha fefine laga.

10 Io, te ke mamahi, bea ke feiga ke faele‘i, e ofefine o Saione, o hage ha fefine oku laga: he koeni, te ke toki alu atu i he kolo, bea te ke nofo i he goue, bea te ke alu, io, ki Babilone; e fakahaofi koe i ai; e huhui koe i ai e Jihova, mei he nima o ho gaahi fili.

¶ 11 Kuo fakataha ni foki ae gaahi buleaga kiate koe, aia oku nau behe, ke fakauli‘i ia, bea ke jio ho tau mata ki Saione.

12 Ka oku ikai te nau ilo ae gaahi fakakaukau a Jihova, bea oku ikai te nau boto i he ene gaahi filio‘i: he te ne tanaki akinautolu o hage koe gaahi u koane ki he feleoko.

13 Tuu, bea ke haha, e ofefine o Saione: he teu gaohi ho nifo, koe ukamea, mo ho geejiva‘e, koe balasa; bea te ke laiki ae gaahi kakai toko lahi: bea teu fakatabu‘i ki he Otua, e nau koloa tubu, moe nau koloa, kia Jihova o mamani kotoabe.