Koe Tohi ae Balofita ko Obataia

¶ 1 KOE mea ha mai kia Obataia. Oku behe ae Eiki koe Otua ki Itomi; Kuo tau fanogo ki ha ogoogo mei a Jihova, bea kuo alu ha tagata talafekau ki he kakai hiteni, Mou tuu, bea te tau tuu hake kiate ia ke tau.

2 Vakai, kuou fakajiijii koe i he lotolotoga oe hiteni: oku lahi ho manuki‘i.

¶ 3 Kuo kākā‘i koe e he laukau a ho loto, akoe oku nofo i he gaahi ana‘i maka, bea oku maoluga ho nofoaga; aia oku behe i hono loto, Kohai e fakahifo au ki lalo ki he kelekele?

4 Oku behe e Jihova, Ne ogo oku ke hakeaki‘i koe o hage koe ikale, bea oku ke fokotuu ho bunuga i he lotolotoga oe gaahi fetuu, ka teu fakahifo koe mei ai.

5 He ka ne ha‘u kiate koe ae kau kaihaa, ae kau kaihaa i he bo, (oiaue ho motuhi!) ikai te nau kaihaaji ke oua ke lahi e nau mea? ka ne ha‘u kiate koe ae kau toli kalebi, ikai kuo nau fakatoe ha gaahi kalebi?

6 Oiaue hono vakili oe gaahi mea a Isoa! hono hakule o ene gaahi mea fufu!

7 Koe kau tagata kotoabe nae kau fakataha mo koe, kuo nau omi koe o a‘u ki he mata fonua, kuo kākā‘i koe e he kau tagata nae melino mo koe, bea kuo iku‘i koe; akinautolu nae kai hoo ma kuo nau ai ae tauhele i lalo iate koe: oku ikai jii ha boto iate ia.

8 Oku behe e Jihova, ikai teu fakaauha i he aho koia ae kau tagata boto mei Itomi, bea moe ilo mei he mouga o Isoa?

9 Bea e ilifia hoo kau tagata malohi, e Timani, koeuhi ke auha i he tamate akinautolu kotoabe oku i he mouga o Isoa.

¶ 10 Koeuhi ko hoo fai fakamalohi ki ho tokoua ko Jekobe, e ufiufi aki koe ae ma, bea te ke auha o lauikuoga.

11 I he aho koia naa ke tutuu moe faahi e taha, i he aho koia nae ave bobula e he kakai muli a ene gaahi kogakau, bea nae hu ae kau muli ki hono gaahi mataba, bea nau talotalo ki Jelusalema, ko koe naa ke hage koe toko taha okinautolu.

12 Ka nae ikai totonu hoo jio ki he aho o ho tokoua, i he aho koia naa ne hoko koe muli; bea nae ikai totonu hoo vikiviki ki he fānau a Juta i he aho o ho nau fakaauha; bea nae ikai totonu hoo lea fielahi i he aho oe nau mamahi.

13 Nae ikai totonu hoo hu i he mataba o hoku kakai, i he aho oe nau tuutamaki; io, nae ikai totonu hoo jio ki he e nau mamahi i he aho oe nau tuutamaki, be ala ki he e nau koloa i he aho oe nau tuutamaki;

14 Bea nae ikai totonu hoo tutuu i he maga‘i hala, ke motuhi akinautolu i ai nae hao; bea nae ikai totonu hoo tukuage akinautolu i ai nae toe i he aho oe mamahi.

15 He oku ofi ae aho o Jihova ki he kakai hiteni; o hage koia kuo ke fai e fai behe kiate koe: e foki mai hoo totogi ki ho ulu oou.

16 Hage kuo mou inu i hoku mouga tabu, e behe ae inu mau ai be e he hiteni kotoabe, io, te nau inu mo folo hifo, bea te nau hoko o hage koe kakai nae ikai.

¶ 17 Ka e i ai ae fakahaofi i he mouga ko Saione, bea moe maonioni; bea e ma‘u e he fale o Jekobe a ho nau tofia.

18 Bea e hoko ae fale o Jekobe koe afi, bea moe fale o Josefa koe ulo afi, bea koe fale o Isoa koe veve, bea te nau vela iate kinautolu, mo fakaauha kinautolu; bea e ikai toe ha niihi i he fale o Isoa, he kuo folofola behe e Jihova.

19 Bea e ma‘u ekinautolu oe botu toga ae mouga o Isoa; bea ko kinautolu oe toafa, ae kakai Filisitia, bea te nau ma‘u ae gaahi goue o Ifalemi, moe gaahi goue o Samelia: bea e ma‘u e Benijimani a Kiliati.

20 Bea e ma‘u e he kau bobula i he kau tau ni oe fānau a Isileli,  ae fonua oe kakai Kenani o a‘u ki Salefati; bea e ma‘u e he kau bobula o Jelusalema, aia oku i Sefalati, ae gaahi kolo oe botu toga.

21 Bea e alu hake ae kau fakamoui ki he mouga ko Saione, ke fakamāu ae mouga o Isoa; bea e hoko ia koe buleaga o Jihova.