1 Im N̄a, Ebream, Urim im Tumim eo eaar pād ippa, eo me Irooj aō Anij eaar letok n̄an eō, ilo Ōr eo an riKaldia;

2 Im iaar lo iju ko, bwe rekar kanooj ļap, im bwe juon iaer eaar epaaktata n̄an tūroon eo an Anij; im ekar lōn̄ ko reļļap me rekar epaakļo̧k n̄an e;

3 Im Irooj eaar ba n̄an eō: Erkein rej ripepe ro; im etan eo eļap iaer ej Kolob, kōnke ej epaaktata n̄an Eō, bwe N̄aij Irooj am̧ Anij: Iaar likūt e n̄an peeke aolep ro me rej pād ilo ejja ekkar eo wōt me kwōj pād ie.

4 Im Irooj eaar ba n̄an eō, jān Urim im Tumim eo, bwe Kolob eaar ilo̧kan jekjek eo an Irooj, ekkar n̄an iien im tōre ko an ilo erro̧o̧lo̧l ko an; bwe juon ero̧o̧lol ej juon raan n̄an Irooj, ilo̧kan jekjek in An watwat, im ej juon to̧ujin iiō ko ekkar n̄an iien eo jitōn̄e n̄an ijo me kwōj pād ie. En̄in ej watwat in iien an Irooj, ekkar n̄an watwat eo an Kolob.

5 Im Irooj eaar ba n̄an eō: Planet eo me edikļo̧k meram in; edikļo̧k jān eo me ej irooj ilo raan, em̧ool bon̄ eo, ej ilōn̄in ak ļapļo̧k jān eo me ioon kwōj jutak ilo jekjek in watwat, bwe ej em̧m̧akūt ilo ekkar eo ilo an batļo̧k, en̄in ej ekkar eo kōnke ej pād ilōn̄in laļ in ijo me ioon kwōj jutak; kōn menin watwat in iien ko an ej jab lōn̄ āinwōt raan ko an, im allōn̄ ko an, im iiō ko an.

6 Im Irooj eaar ba n̄an eō: Kiiō, Ebream, m̧ool kein ruo rej pād, lo mājam̧ rej lo e, em̧ōj lewōj n̄an eok n̄an jeļā watwat in iien ko, im iien eo em̧ōj karōke, aaet, iien eo em̧ōj karōke an laļ eo me ioon kwōj jutak, im iien eo em̧ōj karōke an meram eo eļapļo̧k me kar likūti bwe en irooj in raan eo, im iien eo em̧ōj karōke an meram eo edikļo̧k me likūti n̄an irooj ilo bon̄.

7 Kiiō iien eo karōke an meram eo edikļo̧k ej juon iien eaetokļo̧k n̄an watwat eo an jān watwat in iien eo an laļ eo me ioon kwōj jutak.

8 Im ijo m̧ool kein ruo rej pād, enaaj bar wōr juon m̧ool ilōn̄ier, en̄in bwe, enaaj wōr bar juon planet eo watwat in iien ko an enaaj aetokļo̧k wōt;

9 Im āindein enaaj wōr watwat in iien eo an juon planet ioon bar juon, m̧ae am tōpartok Kolob, Kolob eo me ej ilo̧kan watwat in iien an Irooj; Kolob eo likūti n̄an tūroon an Anij, n̄an peek aolep planet ko me rej pād ilo ejja ekkar eo wōt an eo me ioon kwōj jutak.

10 Im em̧ōj lewōje n̄an eok n̄an jeļā karkan iien an aolep iju ko kar likūti n̄an leļo̧k meram, m̧ae kwōj itok epaak n̄an tūroon eo an Anij.

11 Āindein n̄a, Ebream, iaar ekkōnono ippān Irooj, jelm̧ae doon, āinwōt juon armej ej ekkōnono ippān bar juon; im Eaar ba n̄an eō jerbal me Pein rekar kōm̧m̧ani;

12 Im Eaar ba n̄an eō: Nejū, nejū (im Pein rekar erļo̧k ļo̧k), lo Inaaj kwaļo̧k n̄an eok aolep men kein. Im Eaar likūt Pein ioon māj ko meja, im iaar lo men ko me Pein rekar kōm̧m̧ani, ko me rekar lōn̄, im rekar wōrļo̧k im̧aan meja, im iaar ban lo jem̧ļo̧kier.

13 Im Eaar ba n̄an eō: En̄in ej Shinehah, eo ej al. Im Eaar ba n̄an eō: Kokob, eo ej iju. Im Eaar ba n̄an eō: Olea, eo ej allōn̄. Im Eaar ba n̄an eō: Kokaubeam, eo ej bōk jikin iju ko, ak aolep meram ko reļļap, ko rekar pād ilo mejatoto in lan̄.

14 Im ekar ilo bon̄ ke Irooj eaar ekkōnono naan kein n̄an eō: I naaj koorļo̧k eok, im ineem ālikin kwe, āinwōt rein; im eļan̄n̄e kwo maron̄ bwine oran bok ko, āindein enaaj āinwōt oran ro ineem.

15 Im Irooj eaar ba n̄an eō: Ebream, Ij kwaļo̧k men kein n̄an eok m̧okta jān an etal n̄an Ijipt, bwe kwōn maron̄ kabun̄bun̄ļo̧k aolep naan kein.

16 Eļan̄n̄e ruo men rej pād, im ewōr juon ilōn̄in eo juon, enaaj wōr men ko reļļapļo̧k ioer; kōn menin Kolob ej ļaptata ian aolep Kokaubeam eo kwaar loe, kōnke e epaaktata n̄an Eō.

17 Kiiō, eļan̄n̄e ewōr ruo men ko, juon ilōn̄in eo juon, im allōn̄ ej pād ilōn̄in laļ, innām emaron̄ bwe juon planet ak juon iju emaron̄ pād ioon; im ejjeļo̧k men Irooj am Anij enaaj bōke ilo būruōn n̄an kōm̧m̧ane a men eo E naaj kōm̧m̧ane.

18 Mekarta Eaar kōm̧m̧ane iju eo eļapļo̧k; āinwōt in, barāinwōt, eļan̄n̄e ewōr ruo jetōb, im juon enaaj ļapļo̧k an mālōtlōt jān eo juon, ijoke jetōb kein ruo, jekdo̧o̧n n̄e juon ej ļapļo̧k an mālōtlōt jān eo juon, ejjeļo̧k jinoin, rekar pād m̧oktaļo̧k, renaaj ejjeļo̧k jem̧ļo̧kier, im renaaj pād tokālik, bwe er rej gnolaum, ak indeeo.

19 Im Irooj eaar ba n̄an eō: M̧ool kein ruo rej pād, ewōr ruo jetōb ko, juon eļapļo̧k an mālōtlōtļo̧k jān eo juon; ewōr bar juon enaaj ļapļo̧k an mālōtlōt jān er; N̄aij Irooj am̧ Anij, N̄aij mālōtlōtļo̧k jān er aolep.

20 Irooj am Anij eaar jilkintok An enjeļ n̄an kōtļo̧k eok jān pā ko pein pris eo an Elkena.

21 Ij jokwe ilo ilubwiljier aolep; Ij kiiō, kōn menin, kar wanlaļtak n̄an ippam̧ n̄an kwaļo̧k n̄an eok jerbal ko me Peiū eaar kōm̧m̧ani, men eo kake Aō mālōtlōt eaar eļļā jān er aolep, bwe Ij irooj ilo lan̄ ko ilōn̄, im ilo laļ ium̧win, im aolep mālōtlōt im koļmānļo̧kijeņ, ioon aolep mālōtlōt ko mejam̧ rekar loi jān jinoin; Iaar wanlaļtak ilo jinoin ilo ilubwiljin aolep mālōtlōt ko kwaar loi.

22 Kiiō Irooj eaar kwaļo̧k n̄an eō, Ebream, mālōtlōt ko kar karōki m̧okta jān kar laļ; im ilubwiljin aolep rein ekar lōn̄ ko iaer rekar rajimjim im ro reļļap;

23 Im Anij ar lo bwe jetōb kein rekar em̧m̧an, im Eaar jutak ilo ilubwiljier, im Eaar ba: Erkein I naaj kōm̧m̧an Aō ripepe; bwe Eaar jutak ilubwiljin ro rekar jetōb, im Eaar lo bwe rekar em̧m̧an; im Eaar ba n̄an eō: Ebream, kwe kwōj juon iaer; kwe kar kāālet eok m̧okta jān am kar ļotak.

24 Im eaar jutak juon ilubwiljier ekar āinwōt Anij, im Eaar ba n̄an ro rekar pād Ippān: Jenaaj wanlaļļo̧k, bwe ewōr jikin ijeņ, im jenaaj bōk jān kein bobo kein, im jenaaj kōm̧m̧an juon laļ eo ioon rein remaron̄ jokwe;

25 Im jenaaj mālejjon̄e er kake, n̄an lale eļan̄n̄e renaaj kōm̧m̧ani aolep men ko jabdewōt Irooj aer Anij enaaj jiron̄ er;

26 Im ro rekar kōjparok pād eo aer kein kajuon renaaj kobaļo̧k ioon; im ro rekar jab kōjparok pād eo aer kein kajuon reban bōk aiboojoj ilo ejja aelōn̄ in kiin̄ in wōt ippān ro rekar kōjparok pād eo aer kein kajuon; im rekar kōjparok pād eo aer kein karuo renaaj bōk aiboojoj kobaikļo̧k ioon bōraer n̄an indeeo im indeeo.

27 Im Irooj eaar ba: Wōn I naaj jilkinļo̧k? Im juon ar uwaak āinwōt eo Nejin Armej: N̄a e, jilkinļo̧k eō. Im bar juon ar uwaak im ba: N̄a e, jilkinļo̧k eō. Im Irooj eaar ba: I naaj jilkinļo̧k eo m̧oktata.

28 Im eo kein karuo eaar illu, im kar jab kōjparok pād eo an kein kajuon; im, ilo raan eo, elōn̄ rekar ļooreļo̧k e.