1 Pea ko ia te tau fakaʻosi ʻa e ngaahi langí mo e māmaní pea mo e ngaahi meʻa kotoa pē kuo fakatupú.

2 Pea naʻe fefolofolai ʻa e ngaahi ʻOtuá ʻiate kinautolu: ʻI he taimi hono fitú te tau fakaʻosi ʻa ʻetau ngāue, ʻa ia kuo tau aleaʻí; pea te tau mālōlō ʻi he taimi hono fitú mei heʻetau ngāue kotoa pē ʻa ia kuo tau aleaʻí.

3 Pea naʻe tuku ʻa e ngāue ʻa e ngaahi ʻOtuá ʻi hono fitu ʻo e taimí, koeʻuhí he te nau mālōlō ʻi he taimi hono fitú mei heʻenau ngaahi ngāue kotoa pē ʻa ia naʻa nau alēlea ʻiate kinautolu (ko e ngaahi ʻOtuá) ke faʻú; mo nau fakamāʻoniʻoniʻi ia. Pea naʻe pehē ʻa e anga ʻo ʻenau ngaahi tuʻutuʻuní ʻi he taimi naʻa nau alēlea ai ʻiate kinautolu ke faʻu ʻa e ngaahi langí pea mo e māmaní.

4 Pea naʻe hāʻele hifo ʻa e ngaahi ʻOtuá ʻo ngaohi ʻeni ʻa ia ko e ngaahi hokohoko ʻo e ngaahi langí mo e māmaní, ʻi he taimi naʻe ngaohi ai ia ʻi he ʻaho naʻe ngaohi ai ʻe he ngaahi ʻOtuá ʻa e māmaní pea mo e ngaahi langí,

5 ʻO fakatatau ki he meʻa kotoa pē kuo nau folofola ʻaki ʻo kau ki he ʻakau kotoa pē ʻo e fonuá ʻi he teʻeki ai ke tuʻu ia ʻi he kelekelé, mo e ʻakau iiki kotoa pē ʻo e fonuá ʻi he teʻeki ai ke tupu iá; he naʻe teʻeki ai ke pule ʻe he ngaahi ʻOtuá ke ʻuha ki he māmaní ʻi heʻenau alēlea ke fai iá, pea naʻe teʻeki ai ke nau fakatupu ha tangata ke ngoueʻi ʻa e kelekelé.

6 Ka naʻe ʻalu hake ʻa e vai vao mei he fonuá, ʻo fakaviviku ʻa e funga hono kotoa ʻo e kelekelé.

7 Pea naʻe ngaohi ʻe he ngaahi ʻOtuá ʻa e tangatá mei he efu ʻo e kelekelé, ʻo nau toʻo hono laumālié (ʻa ia ko e pehē, ko e laumālie ʻo e tangatá), ʻo fakahū ia kiate ia; ʻo mānava ki hono avaʻi ihú ʻa e mānava ʻo e moʻuí, pea naʻe hoko ʻa e tangatá ko e laumālie moʻui.

8 Pea naʻe tō ʻe he ngaahi ʻOtuá ha ngoue, ʻi he fakahahake ʻo ʻĪtení, pea naʻa nau tuku ai ʻa e tangatá, ʻa ia kuo fakahū hono laumālié ki he sino kuo nau ngaohí.

9 Pea naʻe pule ʻe he ngaahi ʻOtuá ke tupu mei he kelekelé ʻa e ʻakau kotoa pē ʻa ia ʻoku matamatalelei ke mamata ki ai pea lelei ki he kaí; mo e ʻakau foki ʻo e moʻuí, ʻi he lotolotonga ʻo e ngoué, pea mo e ʻakau ʻo e ʻilo ʻo e leleí mo e koví.

10 Naʻe ai ha vaitafe naʻe tafe atu mei ʻĪteni, ke fakaviviku ʻa e ngoué, pea naʻe mavahevahe atu ia mei ai ki he mangaʻi vai ʻe fā.

11 Pea naʻe ʻave ʻe he ngaahi ʻOtuá ʻa e tangatá ʻo tuku ia ʻi he Ngoue ko ʻĪtení, ke ngoueʻi ia mo tauhi ia.

12 Pea naʻe fekau ʻe he ngaahi ʻOtuá ki he tangatá, ʻo pehē: ʻOku ngofua ke ke kai tauʻatāina mei he ʻakau kotoa pē ʻo e ngoué,

13 Ka ko e ʻakau ʻo e ʻilo ʻo e leleí mo e koví, ʻe ʻikai te ke kai mei ai; he ko e taimi te ke kai ai mei aí, kuo pau ke ke mate. Ko ʻeni ko au, ʻĒpalahame, naʻá ku vakai, naʻe fakatatau ia ki he lau taimi ʻa e ʻEikí, ʻa ia ʻoku fakatatau ki he taimi ʻo Kolapá; he naʻe teʻeki ai ke tuʻutuʻuni ʻe he ngaahi ʻOtuá kia ʻĀtama ʻa ʻene lau taimí.

14 Pea naʻe folofola ʻa e ngaahi ʻOtuá: Tau ngaohi ha tokoni moʻó e tangatá, he ʻoku ʻikai lelei ke toko taha pē ʻa e tangatá, ko ia te tau ngaohi ha tokoni moʻona.

15 Pea naʻe pule ʻe he ngaahi ʻOtuá ke hoko ha mohe maʻu kia ʻĀtama; peá ne mohe, pea nau toʻo ha taha ʻo hono ngaahi hui vakavaká, ʻo toe tāpuniʻi ʻa e kakanó ke fetongi ʻa e huí;

16 Pea mei he hui vakavaka naʻe toʻo ʻe he ngaahi ʻOtuá mei he tangatá, naʻa nau ngaohi ʻa e fefiné, ʻo nau ʻomi ia ki he tangatá.

17 Pea naʻe pehē ʻe ʻĀtama: Ko e hui ʻeni ʻo hoku ngaahi huí, pea ko e kakano ʻo hoku kakanó; ko ʻeni ʻe ui ia ko e Fefiné, koeʻuhí he naʻe toʻo ia mei he tangatá;

18 Ko ia ʻe tuku ai ʻe he tangatá ʻa ʻene tamaí mo ʻene faʻeé, pea pīkitai ia ki hono uaifí, pea te na kakano pē taha.

19 Pea naʻá na fakatou telefua, ʻa e tangatá mo e hono uaifí, pea naʻe ʻikai te na mā ai.

20 Pea naʻe ngaohi ʻe he ngaahi ʻOtuá mei he kelekelé ʻa e fanga manu kotoa pē ʻo e fonuá, pea mo e manupuna kotoa pē ʻo e ʻataá, pea ʻomi ʻa kinautolu kia ʻĀtama ke vakai pe ko e hā te ne ui ʻaki ʻa kinautolú; pea ʻilonga ʻa e hingoa naʻe ui ʻaki ʻe ʻĀtama ʻa e meʻa moʻui kotoa pē, ʻe hoko ia ko hono hingoa ʻoʻoná.

21 Pea naʻe fakahingoa ʻe ʻĀtama ʻa e fanga pulu kotoa pē ʻi hono faʻahingá, mo e fanga manupuna ʻo e ʻataá, mo e manu kotoa pē ʻo e fonuá; pea kia ʻĀtama, naʻe maʻu ha tokoni kiate ia.