ສຳເນົາຈາກໜັງສືອັບຣາຮາມ
ເລກທີ 2
ຄຳອະທິບາຍ
ຮູບທີ 1. ໂຄລອບ, ໝາຍເຖິງການສ້າງຄັ້ງທຳອິດ, ໃກ້ໂລກຊັ້ນສູງ, ຫລື ທີ່ປະທັບຂອງພຣະເຈົ້າ. ອັນດັບໜຶ່ງໃນການປົກຄອງ, ອັນດັບສຸດທ້າຍກ່ຽວກັບການວັດແທກເວລາ. ວັດແທກເວລາຕາມຂອງໂລກຊັ້ນສູງ, ຊຶ່ງເວລາຂອງໂລກຊັ້ນສູງໝາຍເຖິງໜຶ່ງວັນເທົ່າກັບໜຶ່ງສອກ. ໜຶ່ງວັນໃນໂຄລອບແມ່ນເທົ່າກັບໜຶ່ງພັນປີ ຕາມການວັດແທກເວລາຂອງແຜ່ນດິນໂລກນີ້, ຊຶ່ງຖືກເອີ້ນໂດຍຊາວເອຢິບວ່າ ຢາ-ໂອ-ເອ.
ຮູບທີ 2. ຕັ້ງຢູ່ຖັດຈາກໂຄລອບ, ຖືກເອີ້ນໂດຍຊາວເອຢິບວ່າ ໂອລິບລິດ, ຊຶ່ງເປັນການປົກຄອງແຫ່ງການສ້າງອັນຍິ່ງໃຫຍ່ທີ່ລອງລົງມາ ຢູ່ໃກ້ໂລກຊັ້ນສູງ ຫລື ສະຖານທີ່ບ່ອນພຣະເຈົ້າປະທັບຢູ່; ມີຂໍກະແຈແຫ່ງອຳນາດນຳອີກ, ກ່ຽວກັບດາວພະເຄາະດວງອື່ນໆ; ດັ່ງທີ່ພຣະເຈົ້າໄດ້ເປີດເຜີຍຕໍ່ອັບຣາຮາມ, ໃນຂະນະທີ່ລາວຖວາຍເຄື່ອງບູຊາຢູ່ທີ່ແທ່ນບູຊາ, ຊຶ່ງລາວໄດ້ສ້າງແດ່ພຣະຜູ້ເປັນເຈົ້າ.
ຮູບທີ 3. ຖືກເຮັດຂຶ້ນເພື່ອສະແດງເຖິງພຣະເຈົ້າ, ປະທັບນັ່ງຢູ່ເທິງພຣະບັນລັງຂອງພຣະອົງ, ຫຸ້ມຫໍ່ດ້ວຍອຳນາດ ແລະ ສິດອຳນາດ; ໂດຍມີມົງກຸດແຫ່ງຄວາມສະຫວ່າງນິລັນດອນຢູ່ເທິງພຣະສຽນຂອງພຣະອົງ; ສະແດງເຖິງຄຳໄຂທີ່ສຳຄັນທີ່ສຸດຂອງຖານະປະໂລຫິດສັກສິດນຳອີກ, ດັ່ງທີ່ໄດ້ເປີດເຜີຍຕໍ່ອາດາມຢູ່ໃນສວນເອເດນ, ຕໍ່ເຊດນຳອີກ, ໂນອາ, ເມນຄີເສເດັກ, ອັບຣາຮາມ, ແລະ ທຸກຄົນຜູ້ທີ່ຖານະປະໂລຫິດໄດ້ຖືກເປີດເຜີຍຕໍ່.
ຮູບທີ 4. ກົງກັບຄຳຂອງເຮັບເຣີທີ່ວ່າ ຣໍຄີຢາງ, ໝາຍເຖິງຄວາມກວ້າງໃຫຍ່ໄພສານ, ຫລື ທ້ອງນະພາແຫ່ງຟ້າສະຫວັນ; ເປັນຕົວເລກນຳອີກ, ໃນພາສາເອຢິບໝາຍເຖິງໜຶ່ງພັນປີ; ກົງກັບການວັດແທກເວລາຂອງໂອລິບລິດ, ຊຶ່ງເທົ່າກັນກັບໂຄລອບໃນການໝຸນວຽນຂອງມັນ ແລະ ໃນການວັດແທກເວລາຂອງມັນ.
ຮູບທີ 5. ຖືກເອີ້ນໃນພາສາເອຢິບວ່າ ອີນິຊ໌-ໂກ-ອອນ-ດອຊ໌; ນີ້ເປັນດາວພະເຄາະປົກຄອງດວງໜຶ່ງຄືກັນ, ແລະ ຖືກເອີ້ນໂດຍຊາວເອຢິບວ່າ ດວງຕາເວັນ, ແລະ ຢືມຄວາມສະຫວ່າງຈາກໂຄລອບຜ່ານທາງ ແຄ-ອີ-ວັນແຣຊ໌, ຊຶ່ງເປັນຂໍກະແຈທີ່ສຳຄັນ, ຫລື, ອີກຄຳໜຶ່ງ, ອຳນາດປົກຄອງ, ຊຶ່ງປົກຄອງດາວພະເຄາະ ຫລື ດວງດາວອື່ນໆສິບຫ້າດວງ, ດັ່ງຟະໂລອີຊີ ຫລື ດວງເດືອນນຳອີກ, ແຜ່ນດິນໂລກ ແລະ ດວງຕາເວັນໃນການໝຸນວຽນປະຈຳປີຂອງມັນ. ດາວພະເຄາະດວງນີ້ໄດ້ຮັບພະລັງຂອງມັນຜ່ານ ຄລິ-ຟລອສ໌-ອິສ໌-ເອສ໌, ຫລື ຮາ-ໂຄ-ຄໍ-ບິມ, ດວງດາວທີ່ສະແດງໃຫ້ເຫັນໂດຍເລກທີ 22 ແລະ 23, ໄດ້ຮັບຄວາມສະຫວ່າງຈາກການໝຸນວຽນຂອງໂຄລອບ.
ຮູບທີ 6. ສະແດງເຖິງແຜ່ນດິນໂລກນີ້ໃນສີ່ມຸມຂອງມັນ.
ຮູບທີ 7. ສະແດງເຖິງພຣະເຈົ້າປະທັບນັ່ງຢູ່ເທິງພຣະບັນລັງຂອງພຣະອົງ, ເປີດເຜີຍຜ່ານຟ້າສະຫວັນເຖິງຄຳໄຂທີ່ສຳຄັນທີ່ສຸດຂອງຖານະປະໂລຫິດ; ດັ່ງເຊັ່ນ, ເຄື່ອງໝາຍຂອງພຣະວິນຍານບໍລິສຸດ ແກ່ອັບຣາຮາມ, ເຊັ່ນກັນ, ໃນຮູບຂອງນົກເຂົາ.
ຮູບທີ 8. ບັນຈຸການຂຽນທີ່ບໍ່ສາມາດເປີດເຜີຍແກ່ໂລກ; ແຕ່ສາມາດຮັບໄດ້ຢູ່ໃນພຣະວິນຍານທີ່ສັກສິດຂອງພຣະເຈົ້າ.
ຮູບທີ 9. ບໍ່ຄວນເປີດເຜີຍໃນເວລາປະຈຸບັນ.
ຮູບທີ 10. ເຊັ່ນດຽວກັນ.
ຮູບທີ 11. ເຊັ່ນດຽວກັນ. ຖ້າຫາກໂລກສາມາດຄົ້ນພົບເລກເຫລົ່ານີ້, ກໍໃຫ້ເປັນໄປຕາມນັ້ນ. ອາແມນ.
ຮູບທີ 12, 13, 14, 15, 16, 17, 18, 19, 20, ແລະ 21 ຈະຖືກມອບໃຫ້ໃນເວລາອັນເໝາະສົມຂອງພຣະຜູ້ເປັນເຈົ້າ.
ການແປເບື້ອງເທິງໄດ້ໃຫ້ໄວ້ເທົ່າທີ່ພວກເຮົາສາມາດມີສິດມອບໃຫ້ໃນເວລາປະຈຸບັນ.