O se Kopi o Ata Faatusa mai le Tusi a Aperaamo

Ata 1. O Kolape, ua faailoa mai ai le uluai foafoaga, e aupito latalata atu i le malo selesitila, po o le afioaga o le Atua. E tulaga muamua i le pule, ae tulaga mulimuli i le faitauga o lona taimi. O le faitauga o lona taimi e tutusa ma le faitauga o le taimi selesitila, ma o le faitauga o le taimi selesitila e tasi le aso i le kupita. O le aso e tasi i Kolape e tusa lena ma le afe tausaga i le faitauga o le taimi o le lalolagi lenei, lea ua ta’ua e tagata Aikupito o Ia-o-i.

Ata 2. Ua tu pito ane ia Kolape, ua ta’ua e tagata Aikupito o Olipelesi, ma o le foafoaga lea e tulaga lua i le pule ma lona latalata atu i le malo selesitila po o le mea e afio ai le Atua; ua umia foi le ki o le mana, e faatatau i isi paneta; e pei ona sa faaali mai le Atua ia Aperaamo, a’o osia e ia se taulaga i luga o le fatafaitaulaga, lea na fausia e ia mo le Alii.

Ata 3. Ua faia e faatusa i le Atua, o loo afio i luga o lona nofoalii, ua faalaeiina i le mana ma le pule; ma se palealii o le malamalama e faavavau i luga o lona ao; ua avea foi ma sui o Upu-tatala sili o le Perisitua Paia, e pei ona sa faaalia ia Atamu i le Faatoaga o Etena, e pei ona sa faaali foi ia Setu, Noa, Mekisateko, Aperaamo, ma ia i latou uma o e na faaali i ai le Perisitua.

Ata 4. Ua tusa ma le upu Eperu o Raukiaga, o lona uiga o le vateatea, po o le vanimonimo o le lagi; o se fuainumera foi i le Faa-Aikupito o lona uiga o le tasi le afe; e tusa ma le fuaina o le taimi o Olipelesi, lea ua tutusa ma Kolape i lona taamilosaga ma le fuaina o lona taimi.

Ata 5. Ua ta’ua i le Faa-Aikupito o Enise-ko-oni-tosi; o se tasi foi lenei o paneta pule, ma sa ta’ua e tagata Aikupito o le La, ma ua maua mai ia Kolape lona malamalama e ala mai ia Ke-e-vaneresi, o le Ki sili lea, po o, i ni isi upu, o le mana pule, lea e pulea isi paneta po o fetu tumau e sefululima, e pei foi o Foloese po o le Masina, le Lalolagi ma le La ia latou taamilosaga faaletausaga. O lenei paneta e maua lona mana e ala mai ia Keli-felo-si-isa-esa po o Ha-ko-kau-pi, o fetu ua faatusa mai i le numera 22 ma le 23, ua maua le malamalama mai taamilosaga a Kolape.

Ata 6. Ua faatusa i le lalolagi lenei i ona itu e fa.

Ata 7. Ua faatusa i le Atua o loo afio i luga o lona nofoalii, ua faaali mai le lagi Upu-tatala sili o le Perisitua; faapea, foi, le faailoga o le Agaga Paia ia Aperaamo, i foliga o se lupe.

Ata 8. Ua i ai tusitusiga e lē mafai ona faaali mai i le lalolagi; ae o le a maua i le Malumalu Paia o le Atua.

Ata 9. E lē tatau ona faaali mai i le taimi nei.

Ata 10. Ua faapea foi lea.

Ata 11. Ua faapea foi lea. Afai e mafai e le lalolagi ona iloa le uiga o ia fuainumera, ia faapea lava. Amene.