Ol Skripja
Fas Toktok

Fas Toktok

Buk blong Perel we I Gat Bigfala Praes i tekem samfala bigfala toktok we oli bin raetem, we i tokbaot plante impoten saed blong fet mo doktrin blong Jos Ia blong Jisas Kraes blong Ol Lata-dei Sent. Ol toktok ia, Profet Josef Smit i bin transletem olgeta mo i bin putum olgeta tugeta, mo plante long ol toktok ia, hem i bin pablisim insaed long niuspepa blong Jos long taem blong hem.

Fas buk we i tekem tugeta ol toktok ia, mo oli bin singaotem Perel we I Gat Bigfala Praes, Elda Franklin D. Rijads, we long tetaem ia i bin wan memba blong Kaonsel blong Olgeta Twelef mo semtaem presiden blong Britis Misin, i bin mekem long 1851. Stamba tingting biaen long hem i blong mekem se fulap man i save ridim sam impoten toktok we i no kasem plante man long taem blong Josef Smit. Taem we membasip blong Jos i bin stap kam antap raon long Yurop mo Amerika, i bin gat nid blong ol memba oli save ridim ol toktok ia. Ol memba blong Jos oli bin yusum fulap Perel we I Gat Bigfala Praes, mo afta, hem i kam wan standet tabu wok blong Jos tru long desisen blong Fas Presidensi mo jeneral konfrens long Sol Lek Siti long namba 10 Oktoba 1880.

Jos i bin lukluk mo i bin jenisim wanem i stap insaed long buk ia, folem ol nid blong Jos. Long yia 1878, ol pat blong buk blong Moses oli no bin stap long fas edisen, mo oli bin ademap. Long 1902, samfala pat blong Perel we I Gat Bigfala Praes, we i kopi blong sam toktok we oli bin stap insaed long Doktrin mo Ol Kavenan, oli tekemaot olgeta. Oli bin stretem ol toktok ia, mo putum olgeta folem ol japta mo ol ves, wetem ol futnot, mo hemia i hapen long 1902. Fasfala taem we oli bin pablisim buk ia, we insaed i gat tufala kolom long wan pej, wetem wan indeks, i bin kamaot long 1921. I no bin gat eni narafala jenis i bin hapen long buk ia kasem Epril 1976, mo long tetaem ia oli bin ademap 2 revelesen. Long yia 1979, oli bin karemaot tufala revelesen ia long Perel we I Gat Bigfala Praes, mo oli bin putum i go insaed long Doktrin mo Ol Kavenan, mo oli stap naoia olsem ol seksen 137 mo 138. Insaed long edisen blong naoia, i gat sam jenis i bin hapen blong mekem nomo se toktok oli go wetem ol toktok we i bin kamaot bifo.

Hemia hem i wan sot fas toktok long wanem i stap insaed long buk ia naoia:

  1. Samfala pat we oli kam long Buk blong Moses. Wan pat blong buk blong Jenesis we i kamaot long translesen blong Baebol we i kam long Josef Smit, we hem i bin statem long Jun 1830.

  2. Buk blong Ebraham. Wan translesen blong ol raeting blong Ebraham we oli kam tru long insperesen. Josef Smit i statem translesen ia long yia 1835 afta we hem i kasem ol pepa we oli kam long Ijip. Translesen ia, oli pablisim long smolsmol pat insaed long niuspepa ia, Times and Seasons, stat long namba 1 Maj 1842, long Nauvu, Ilinoa.

  3. Josef Smit—Matiu. Wan smol pat blong testemoni blong Matiu insaed long translesen blong Baebol we i kam long Josef Smit (luk long Doktrin mo Ol Kavenan 45:60–61 blong luk oda we i kam long God blong statem translesen blong Niu Testeman).

  4. Josef Smit—Histri. Sam smol pat we oli kam long ofisol testemoni mo histri blong Josef Smit, we hem mo ol man blong raet blong hem oli bin putum tugeta long 1838 kasem 1839, mo oli bin pablisim long smolsmol pat insaed long niuspepa ia, Times and Seasons, long Nauvu, Ilinoa, stat long 15 Maj 1842.

  5. Ol Toktok blong Bilif blong Jos Ia blong Jisas Kraes blong Ol Lata-dei Sent. Wan toktok we Josef Smit i bin pablisim insaed long niuspepa, Times and Seasons, long namba 1 Maj 1842, wetem wan sot histri blong Jos we man i save gud long hem olsem Wentwot Leta.