Ñepyrũmby

Pérla Hepyetéva haʼe matéria ha téma poravopyre hepyetéva, ohóva heta Jesucristo Tupao Santokuéra Ára Pahapegua jerovia ha doctrina imbaʼeguasúvare. Proféta José Smith ombohasa ha ombosakoʼivaʼekue koʼã téma ha hetave oñeguenohẽvaʼekue umi Tupao kuatiahai hiʼárape.

Peteĩha jehaipyre aty osẽvaʼekue Pérla Hepyetéva título reheve, ojapovaʼekue elder Franklin D. Richards, upe jave haʼevaʼekue Dóse Konsého miembro ha Misión Británica presidente. Oñeguenohẽkuri koʼã jehai imbaʼeguasúva, saʼi oñemosarambivaʼekue José Smith árape, hasyʼỹve hag̃ua opavavépe ohupyty. Hetavévo ohóvo Tupao miembro Europa ha Amérikape, tekotevẽkuri ojehupytyʼuka koʼã téma. Pérla Hepyetéva ojeporúkuri heta hendápe, ha upéi oiko chugui peteĩva umi Tupaogua kuatiajehaipyre kanóniko oñemoneĩvaʼekue Primera Presidencia-re ha conferencia general-re, ojejapovaʼekue Salt Lake City-pe, octubre 10, 1880-pe.

Tupao oikotevẽháicha, ojejapókuri heta jehechajey ipypeguágui. Ary 1878-pe, oñemoĩkuri Moisés Kuatiañeʼẽ párte, noĩrivaʼekue edisiõ peteĩháme. Ary 1902-pe ojepeʼákuri Pérla Hepyetéva párte jehai oñeguenohẽmavaʼekue avei Doctrina ha Konveniokuérape. Kapítulo ha versíkulo ñembojaʼo, nóta reheve páhina guýpe, ojejapókuri 1902-pe. Peteĩha ñeguenohẽ páhinape mokõi kolumnape, ha índise reheve, ojejapókuri 1921-pe. Ndojejapóikuri mbaʼevéichagua ñemoambue abril 1976 peve, oñemoĩrõguare mokõi rrevelasiõ. Ary 1979-pe, ojepeʼákuri umi mokõi rrevelasiõ Pérla Hepyetévagui ha oñemoĩ Doctrina ha Konveniokuérape, koʼág̃a oĩva umi sección 137 ha 138 ramo. Ojejapókuri saʼi ñemoambue edisiõ koʼág̃aguápe, upe jehaipy ohoporãve hag̃ua umi dokuménto upemboyveguándi.

Ko oúva haʼe mbykymi ñepyrũmby upe matéria koʼág̃a oguerekóvagui ipype:

1. Moisés Kuatiañeʼẽguigua jeporavo. Peteĩ Génesis kuatiañeʼẽgui ñemombyky, José Smith ñembohasa ojapovaʼekue Biblia-gui, upe haʼe omoñepyrũvaʼekue junio 1830-pe.

2. Abraham Kuatiañeʼẽ. Peteĩ ñembohasa oñeinspiráva Abraham ohaivaʼekuégui. José Smith omoñepyrũvaʼekue upe ñembohasa 1835-pe, ohupyty rire umi papíro egipcio. Upe ñembohasa oñeguenohẽ ojoapykuéri Times and Seasons-pe, oñepyrũvo marzo 1, 1842-pe, Nauvoo, Illinois-pe.

3. José Smith—Mateo. Peteĩ Mateo testimónio ñemombyky, ojepeʼavaʼekue José Smith ñembohasa ojapovaʼekue Biblia-gui (tojehecha Doctrina ha Konveniokuéra 45:60–61, oĩháme mboʼepy divíno oñemoñepyrũ hag̃ua Testaménto Pyahu ñembohasa).

4. José Smith—Historia. José Smith testimonio ha historia oficial jeporavokuéra, pe haʼe ha umi ihaiharakuéra ombosakoʼivaʼekue 1838–1839-pe, ha oñeguenohẽvaʼekue ojoapykuéri Times and Seasons-pe, Nauvoo, Illinois-pe, oñepyrũvo marzo 15, 1842-pe.

5. Fe rehegua Artikulokuéra, Jesucristo Tupao Santokuéra Ára Pahapeguáva. Peteĩ José Smith deklarasiõ oñeguenohẽvaʼekue Times and Seasons-pe, marzo 1, 1842-pe, Tupao rembiasa mbyky reheve, opavave oikuaavaʼekue Wentworth kuatiáramo.