José Smith—Mateo

1 Che haʼégui peẽme, koʼag̃aite guive ndapecherechamoʼãvéima, ni ndapeikuaamoʼãvéima Che haʼeha umi proféta ohaihague, upe ára peje peve: Ojehovasapyre pe oúva Ñandejára rérape, yvága araípe, ha opa anhelkuéra marangatu hendive. Upérõ idisipulokuéra oikũmby haʼe oujeytaha yvy ári, ojeglorifika ha oñekorona rire Tupã akatúape.

2 Ha osẽ Jesús ha oñemombyry upe témplogui; ha ou hendápe idisipulokuéra ohendu hag̃ua chupe, heʼívo: Mboʼehára, emombeʼu oréve umi témplo rogaguasu rehegua, nde ningo erékuri—Umíva ojeitýta ha itaperetaha.

3 Ha Jesús heʼi chupekuéra: Pehecha ningo opa koʼã mbaʼe, ha ndapeikũmbýi koʼãva? Añetehápe Che haʼe peẽme, ndopytamoʼãiha koʼápe, ko témplope, ita ojoʼári ojeitypaʼỹtava.

4 Ha Jesús oñemomombyry chuguikuéra, ha ojupi Olivo Monte-pe. Ha oguapy jave Olivo Monte-pe, disipulokuéra ou ñemiháme hendápe, heʼívo: Eréna oréve, arakaʼépa ojehúta koʼã mbaʼe erevaʼekue pe témplo ñehundíre, ha Hudiokuérare; ha mbaʼépa pe techauka nde jeju ha múndo ñembopaha rehegua, térã umi iñañáva ñehundi, haʼéva múndo paha?

5 Ha Jesús ombohovái ha heʼi chupekuéra: Pemaʼẽ porãke ani avave penembotavy;

6 Heta oútagui che rérape, heʼívo—Che haʼe Cristo—ha ombotavýta hetápe;

7 Upérõ penemeʼẽta peñembohasaʼasy hag̃ua, ha pendejukáta hikuái, ha opa tetãnguéra ndaijaʼemoʼãi penderehe che réra rupi;

8 Ha upérõ heta oñemyrõta, ha oñotraisionáta ojupe, ha ndaijaʼemoʼãi ojuehe;

9 Ha heta proféta japu opuʼãta, ha ombotavýta hetápe;

10 Ha hetátagui tembiapovai, heta mborayhu hoʼysãmbáta;

11 Ha katu pe opytáva ñemovãʼỹme ha ndaikatúiva rehe ojepuʼaka, upéva ojesalváta.

12 Upévare, pehecha vove upe mbaʼevaiete oporohundíva Daniel upe proféta oñeʼẽhague, Jerusalén ñehundi rehegua, upérõ pepyta tenda marangatúpe; upe omoñeʼẽva, toikũmby.

13 Upérõ toñani yvtytyguasukuérape umi Judea-pe oikóva;

14 Ha upe oĩva óga ári toñani, ha ani ojevy oguenohẽ hag̃ua mbaʼeve hógagui;

15 Ha upe ñúme oĩva ani avei ojevy ijaokuéra rekávo;

16 Ha ái umi hyeguasúvagui, ha imemby kambúvagui umi árape;

17 Upévare, peñemboʼe Ñandejárape ani hag̃ua peñani araroʼy jave, ni pytuʼu árape;

18 Umi árape oútagui tuicha jeikoʼasy hudiokuéra ári, ha umi Jesuralén-pe oikóva ári, Tupã arakaʼeve ombouʼỹ haguéicha Israel ári, irréino ñepyrũmby guive ko ára peve; nahániri, ni arakaʼeve noñembou jeymoʼãvéimava Israel ári.

19 Opa mbaʼe ojehuvaʼekue chupekuéra ndahaʼéi térã umi jeikoʼasy ñepyrũmbýnte oútava hiʼarikuéra.

20 Ha ndahaʼéiramo oñemombykyrõ umi ára, avave retekuérava ndojesalvamoʼãi; ha katu umi ojeporavopyréva ñeimeporãrã, konvéniope oĩháicha, umi ára oñemombykýta.

21 Péina ápe, koʼã mbaʼe Che haʼékuri peẽme judío-kuérare; ha avei, umi jeikoʼasy ára rire oútava Jerusalén ári, oĩramo heʼíva peẽme, Péina ápe Cristo, térã péina pépe, ani peguerovia chupe;

22 Umi árape opuʼãtagui avei Cristo añeteguaʼỹva, ha proféta añeteguaʼỹva, ha ohechaukáta tuicha techaukaha ha techapyrãnguéra, ha upéicha rupi oporombotavýta, ikatúramo, umi ojeporavopyrévape jepe, haʼéva umi ojeporavopyréva konvéniope oĩháicha.

23 Péina ápe, Che haʼe peẽme koʼã mbaʼe umi ojeporavopyréva mbaʼeporãrã; ha pehendúta avei ñorairõguasu ha norairõguasu rerakuã; pejesarekóke ani pejepyʼapy, opa Che haʼevaʼekue peẽme oikótagui; ha katu ndahaʼéi gueteri ipaha.

24 Péina ápe, Che haʼémakuri peẽme;

25 Upévare, heʼíramo hikuái peẽme: Péina ápe, haʼe oime taveʼỹme; ani peho: Péina ápe, haʼe oime umi kámara ñemíme; ani peguerovia;

26 Pe tesape pyharevegua osẽháicha kuarahyresẽme, ha omimbi kuarahyreike peve, ha ojahoʼipaite yvy, upéichata avei Kuimbaʼe Raʼy jeju.

27 Ha koʼág̃a Che amombeʼu peẽme peteĩ parávola. Péina ápe, upe teʼõngue oĩháme, upépe ijatýta umi taguatoguasu; upéicha avei oñembyatýta umi che aiporavopyréva irundy yvy rembeʼýgui.

28 Ha ohendúta hikuái ñorairõguasu ha ñorairõguasu rerakuã.

29 Péina ápe Che añeʼẽ umi che aiporavopyréva rehehápe; tetã opuʼãtagui tetã rehe; ha rréino rréino rehe; oĩta ñembyahýi, mbaʼasyvai, ha yvy ryrýi heta henda rupi.

30 Ha avei, hetaiterei rupi tembiapovai, heta mborayhu hoʼysãmbáta; ha katu pe ojepuʼakaʼỹva hese, kóva ojesalváta.

31 Ha avei, ko Rreinogua Evanhélio oñemboʼéta opa múndore, testimónioramo opa tetãnguérape, ha upérõ oúta ñembopaha, térã pe iñañáva ñehundi;

32 Ha avei, upe mbaʼevaiete oporohundíva, Daniel upe proféta oñeʼẽhague, oñekumplíta.

33 Ha umi aragua jeikoʼasy rirete, pe kuarahy iñypytũta, ha jasy ndohesapemoʼãi, ha mbyjakuéra hoʼáta yvágagui, ha yvagagua puʼakakuéra oryrýita.

34 Añetehápe Che haʼe peẽme, ko ñemoñareaty, koʼã mbaʼe ojehechaukahápe, ndohasamoʼãi umi mbaʼe Che haʼevaʼekue peẽme oñekumplipa peve.

35 Og̃uahẽtarõ jepe umi ára, pe yvága ha yvy opataha; upevére, che ñeʼẽnguéra ndopamoʼãi, opaitéva katu oñekumplíta.

36 Ha Che haʼéma haguéicha, umi aragua jeikoʼasy rire, ha umi yvagagua pokatu ojeityvyro rire, upérõ ojekuaáta upe Kuimbaʼe Raʼy rechaukaha yvágape, ha upérõ opa trívu yvy arigua ojaheʼóta; ha ohecháta hikuái Kuimbaʼe Raʼy oúva umi yvága araípe, pokatu ha tuicha glória reheve;

37 Ha pe oñongatúva che ñeʼẽ noñembotavymoʼãi, upe Kuimbaʼe Raʼy oútagui ha omboúta henonderã hiʼanhelkuéra turupu atã reheve, ha ombyatýta hikuái ijeporavopyrekuéra irundy yvytúgui, peteĩ yvága apýra guive ambue peve.

38 Koʼág̃a peikuaa igéra parávola—Hakãnguéra ikyrỹivo gueteri, ha oñepyrũ hogue heta, peikuaa arahaku hiʼag̃uimaha;

39 Upeichaite umi che aiporapyréva, ohecha vove hikuái opa koʼã mbaʼe, oikuaáta hikuái haʼe hiʼag̃uimaha, héẽ, jepe pe okẽmema;

40 Ha katu upe ára ha aravógui, avave ndoikuaái; nahániri, ni Tupã anhelkuéra yvágape, ha katu Che Ru añónte.

41 Ha katu Noé arapeguáicha, upéichata avei Kuimbaʼe Raʼy jejúpe;

42 Hendivekuéra haʼétagui, haʼe haguéicha umi ára amaguasu mboyve; upe ára Noé oike peve árkape, okaru ha hoyʼu hikuái, omenda ha oñomomenda;

43 Ha ndoikuaáikuri hikuái og̃uahẽ meve amaguasu ha oguerahapaite chupekuéra; upéichata avei Kuimbaʼe Raʼy jeju.

44 Upérõ oñekumplipáta upe ojehaíva, umi ára pahápe, mokõi oĩtaha upe ñúme, ha peteĩ ojegueraháta, ha ambue ojehejáta;

45 Mokõi oñembisotahína molínope, peteĩ ojegueraháta, ha ambue ojehejáta;

46 Ha upe Che haʼéva peteĩme, Che haʼe opavavépe; pejesarekóke upévare, ndapeikuaáigui aravo pende Jára ouha.

47 Ha katu peikuaa kóva, pe kuimbaʼe óga jára oikuaávoraʼe mbaʼe vihíliape oúta pe mondaha, haʼe oñangarekótakuri, ha ndohejamoʼãi ojeike hógape, ha katu oĩtakuri ñembosakoʼípe.

48 Upévare, peime avei peẽ ñembosakoʼípe, upe ára peimoʼãʼỹ jave oútagui upe Kuimbaʼe Raʼy.

49 Mávapa, upérõ, pe tembiguái ijeroviareko ha iñarandúva, ijára omoĩvaʼekuépe hóga majordómo ramo, omeʼẽ hag̃ua chupekuéra tembiʼu hiʼárape?

50 Ojehovasapyre upe tembiguái, ijára ou vove, ojejuhúva chupe upéicha ojapóvo; ha añetehápe Che haʼe peẽme, haʼe ojapóta chugui sãmbyhyhára opa imbaʼerepykuéra ári.

51 Ha katu upe tembiguái aña heʼíramo ikorasõme: Che jára omboʼare ijeju,

52 Ha oñepyrũ ojopy ikonsiervokuérape, ha okaru ha hoyʼu umi okaʼúvandi.

53 Upe tembiguái jára oúta ára kóva ohaʼarõʼỹ jave chupe, ha aravo haʼe oikuaaʼỹvape,

54 Ha ombojaʼóta chupe pehẽnguépe, ha ohechaukáta chupe ipehẽngue umi hovamokõivandi; upépe oĩta jaheʼo ha tãi pururũ.

55 Ha upéicha ou umi iñañáva paha, Moisés profesíape oĩháicha, heʼíva: Ojepeʼáta hikuái tavayguakuéra apytégui; ha katu ndahaʼéi gueteri yvy paha, ha katu hiʼag̃uíma.