ჯოზეფ სმითი – მათეს სახარება

1 ვინაიდან გეუბნებით: ვეღარ მიხილავთ ამიერიდან და ვერ გაიგებთ, რომ ვარ იგი, რომელზეც დაწერეს წინასწარმეტყველებმა, სანამ არ იტყვით: კურთხეულია იგი, რომელიც ზეცის ღრუბლებზე მოდის უფლის სახელით და მასთან ერთად ყოველი წმინდა ანგელოზი. მაშინ მიხვდნენ მისი მოწაფეები, რომ იგი კვლავ მოვა დედამიწაზე მას შემდეგ, რაც იგი გაბრწყინდება და დაგვირგვინდება ღმერთის მარჯვენა მხარეს.

2 და იესო გამოვიდა ტაძრიდან და წავიდა; და მივიდნენ მასთან მისი მოწაფეები, რათა მოესმინათ მისთვის და ამბობდნენ: მეუფევ, გვითხარი ტაძრის შენობებზე, როგორც შენ თქვი – ისინი ჩამოიქცევა და დარჩება გაპარტახებული თქვენთვის.

3 და იესომ მათ უთხრა: ნუთუ ვერ ხედავთ ყოველივე ამას და არ გესმით? ჭეშმარიტად გეუბნებით: აქ, ამ ტაძრიდან ერთი მეორეზე დადებული ქვაც კი არ დარჩება ისე, რომ არ ჩამოიქცეს.

4 და იესომ მიატოვა ისინი და წავიდა ზეთისხილის მთაზე და იჯდა ზეთისხილის მთაზე, მიუახლოვდნენ მოწაფეები განმარტოებით და უთხრეს: გვითხარი, როდის მოხდება ის, რაც შენ გვითხარი ტაძრისა და იუდეველების განადგურების შესახებ; და რა იქნება შენი მოსვლის ნიშანი და ქვეყნის აღსასრულის ან ბოროტთა განადგურებისა, რაც არის ამაქვეყნის დასასრული?

5 მიუგო იესომ და უთხრა მათ: გაფრთხილდით, რომ არავინ შეგაცდინოთ;

6 ვინაიდან მრავალნი მოვლენ ჩემი სახელით და იტყვიან: მე ვარ ქრისტეო და მრავალს შეაცდენენ;

7 მაშინ გადაგცემენ სატანჯველად და დაგხოცავენ და მოგიძულებთ ყოველი ერი ჩემი სახელის გამო;

8 და მრავალი შეცდება მაშინ, ერთმანეთს გასცემენ და შეიძულებენ ერთმანეთს;

9 და მრავალი ცრუ წინასწარმეტყველი აღდგება და ბევრს შეაცდენენ;

10 და ურჯულოების მომრავლების გამო მრავალს გაუნელდება სიყვარული;

11 ხოლო ვინც ბოლომდე იქნება მტკიცე და ვერ სძლევენ – გადარჩება.

12 ამიტომ, როცა იხილავთ აოხრების სისაძაგლეს, როგორც წინასწარმეტყველმა დანიელმა თქვა იერუსალიმის განადგურების შესახებ, მაშინ იდგებით წმინდა ადგილზე; მკითხველმა გაიგოს.

13 მაშინ, ვინც იუდეაშია, მთებს მიაშურონ;

14 დაე, ვინც ერდოზე იქნება, ნუ ჩამოვა თავისი სახლიდან რაიმეს გამოსატანად;

15 დაე, ვინც ყანაში იქნება, ნუ დაბრუნდება უკან თავისი ტანისამოსის წასაღებად;

16 ხოლო ვაი ორსულებს და მეძუძურებს იმ დღეებში;

17 ამიტომ, ილოცეთ უფლისადმი, რათა არ მოგიწიოთ გაქცევა ზამთარში ან შაბათ დღეს;

18 ვინაიდან იმ დღეებში იქნება დიდი გასაჭირი იუდეველებთან და იერუსალიმის მცხოვრებლებთან, როგორიც მანამდე არ ყოფილა ისრაელზე მოვლენილი ღვთის მიერ, მათი სამეფოების დასაბამიდან დღემდე და არც არასოდეს იქნება მოვლენილი ისრაელზე.

19 ყოველივე, რაც მათ თავს დაატყდათ, არის მხოლოდ დასაწყისი მწუხარებისა, რაც მათზე იქნება მოვლენილი.

20 და ის დღეები რომ არ შემოკლდეს, ვერცერთი ხორციელი ვერ გადარჩება; მაგრამ რჩეულთა გულისათვის, აღთქმის შესაბამისად, შემოკლდება ის დღეები.

21 აჰა, ყოველივე ეს გითხარით იუდეველებზე; და კიდევ, იმ განსაცდელის დღეების შემდეგ, რომელიც დაატყდება იერუსალიმს, თუ ვინმე გეტყვით: აჰა, აქ არის ქრისტე ან იქ – არ დაიჯეროთ;

22 ვინაიდან იმ დღეებში აღდგებიან ასევე ცრუ ქრისტენი და ცრუწინასწარმეტყველნი და მოახდენენ დიდ სასწაულებს და ნიშნებს, იმდაგვარად, რომ თუკი შეძლებენ, ყველაზე რჩეულებსაც შეაცდენენ, რომლებიც არჩეულნი არიან აღთქმის შესაბამისად.

23 აჰა, გეუბნებით ყოველივე ამას რჩეულთა გულისთვის; თქვენც ასევე გაიგებთ ომებზე და ამბებს ომებზე; ნუ შეძრწუნდებით, ვინაიდან ყოველივე, რაც გითხარით, უნდა ახდეს; მაგრამ ეს არ იქნება ჯერ დასასრული.

24 აჰა, წინასწარ გითხარით;

25 ამიტომ, თუ გითხრან: აჰა, ის უდაბნოშიაო – ნუ გამოხვალთ. აჰა, ის შიდა ოთახებშიაო – ნუ ერწმუნებით;

26 ვინაიდან, როგორც დილის სინათლე გამოდის აღმოსავლეთიდან და თვით დასავლეთამდე ანათებს და დაფარავს მთელ დედამიწას, ასევე იქნება კაცის ძის მოსვლაც.

27 და ახლა, გეტყვით იგავს: აჰა, ლეში სადაც არის, იქ მოგროვდებიან ერთად არწივები; ასევე, ამდაგვარად შეიკრიბებიან ჩემი რჩეულნი დედამიწის ოთხივე კიდიდან.

28 და გაიგებენ ომებზე და ამბებს ომების შესახებ.

29 აჰა, ვლაპარაკობ ჩემს რჩეულთათვის; ვინაიდან ერი აღდგება ერის წინააღმდეგ და სამეფო – სამეფოს წინააღმდეგ; იქნება შიმშილი, ჭირი და მიწისძვრები სხვადასხვა ადგილებში.

30 და კიდევ, ურჯულობის მომრავლების გამო განელდება ადამიანთა სიყვარული; მაგრამ რომელსაც ვერ სძლევენ – გადარჩება.

31 და კიდევ, სასუფევლის სახარება ნაქადაგები იქნება მთელ ქვეყანაზე, ყოველი ერისთვის დასამოწმებლად და შემდეგ მოვა დასასრული ანუ ბოროტთა განადგურება.

32 და კიდევ: აოხრების სიბილწე, რომელზეც ლაპარაკობდა წინასწარმეტყველი დანიელი – აღსრულდება.

33 და მყისვე, გასაჭირის იმ დღეების შემდგომ, მზე დაბნელდება და მთვარე აღარ გამოსცემს თავის ნათელს, ვარსკვლავები ჩამოცვივდებიან ზეციდან და ციური ძალები შეირყევა.

34 ჭეშმარიტად გეუბნებით, ეს თაობა, რომლის ჟამსაც გამოვლინდება ყოველივე ეს, არ ჩაივლის, სანამ ის რაც გითხარით, არ ახდება.

35 თუმცა დადგება დღეები, როდესაც ზეცა და დედამიწა გაქარწყლდება; მაგრამ ჩემი სიტყვები არ გაქარწყლდება, არამედ ახდება.

36 და როგორც აქამდე ვთქვი, გასაჭირის იმ დღეების შემდგომ, როდესაც ციური ძალები შეირყევა, გამოჩნდება კაცის ძის ნიშანი ზეცაში და მაშინ მოჰყვება მოთქმას დედამიწის ყველა ტომი და იხილავენ კაცის ძეს, ცის ღრუბლებზე მომავალს, ძალითა და დიდებით.

37 და ვინც ჩემს სიტყვას დაიუნჯებს – ვერ შეაცდენენ, ვინაიდან მოვა კაცის ძე და მოავლენს თავის ანგელოზებს დიდხმიანი საყვირით და შეკრებენ მისი რჩეულების დანარჩენს ოთხივე ქართაგან, ცათა ერთი კიდიდან მეორე კიდემდე.

38 შეიტყვეთ ლეღვის ხის იგავი – როცა მისი რტოები დარბილდება და ფოთლებს გამოისხამს იცით, რომ ახლოა ზაფხული;

39 ამდაგვარად, ჩემს რჩეულებს, როცა ისინი იხილავენ ყოველივე ამას, ეცოდინებათ, რომ იგი არის ახლოს, კარზეა მომდგარი.

40 მაგრამ იმ დღეზე და საათზე არავინ იცის; არა, არც ღვთის ზეციურმა ანგელოზებმა, მხოლოდ მამამ.

41 მაგრამ, როგორც ეს იყო ნოეს დღეებში, ისევე იქნება კაცის ძის მოსვლისას;

42 ვინაიდან, ასე იქნება მათთან, როგორც ეს იყო წარღვნამდელ დღეებში; ვინაიდან, კიდობანში ნოეს შესვლის დღემდე ჭამდნენ, სვამდნენ, ქორწინდებოდნენ და აქორწინებდნენ;

43 და არ იცოდნენ, სანამ წარღვნა არ მოვიდა და ყველა არ წალეკა; ასევე იქნება კაცის ძის მოსვლაც.

44 მაშინ აღსრულდება, რაც დაწერილია, რომ უკანასკნელ დღეებში ორნი იქნებიან მინდვრად: ერთი წარიტაცება და ერთი დარჩება;

45 ორნი დაფქვავენ წისქვილში: ერთი წარიტაცება და ერთი დარჩება;

46 რასაც ერთს ვეუბნები, ვეუბნები ყველას: იფხიზლეთ, რადგან არ იცით, რომელ საათს მოვა თქვენი უფალი.

47 მაგრამ ეს იცოდეთ: სახლის პატრონმა რომ იცოდეს, რომელ სადარაჯოზე მოვა ქურდი, იფხიზლებდა და თავის სახლს ძირს არავის გამოათხრევინებდა, არამედ მზად იქნებოდა.

48 ამიტომ, თქვენც მზად იყავით, ვინაიდან, რომელ საათზეც არ ფიქრობთ, მაშინ მოვა კაცის ძე.

49 ვინ არის მაშინ ერთგული და გონიერი მონა, რომელიც დაუყენა ბატონმა თავის სახლეულს, რომ დროულად აძლევდეს მათ საზრდოს?

50 კურთხეულია მონა, რომლის ბატონიც მოვა და ამგვარად მოქმედს ჰპოვებს მას; და ჭეშმარიტად გეუბნებით: მთელ თავის საბადებელზე მმართველად დააყენებს მას.

51 ხოლო თუ ეს ბოროტი მონა თავის გულში იტყვის: იგვიანებსო ჩემი ბატონი,

52 და ცემას დაუწყებს თავის თანამონებს და ლოთებთან ჭამას და სმას,

53 მოვა იმ მონის ბატონი იმ დღეს, როცა არ ელის და იმ საათს, როცა არ იცის,

54 და შუაზე გაჰკვეთს მას და თვალთმაქცებთან დაუდებს წილს. იქ იქნება გოდება და კბილთა ღრჭენა.

55 და ასე მოვა ბოროტთა დასასრული, მოსეს წინასწარმეტყველებისამებრ: ისინი იქნებიან ხალხისგან მოკვეთილნი, მაგრამ დედამიწის დასასრული ჯერ კიდევ არ არის, მაგრამ მოხდება მალე.