Iosepha Timeti—Mataio

1 E te karanga atu nei au kia kotou, e kare kotou e kite mai iaku e e kite katoa e ko au teia ta te au peroveta i tata, e tae ua atu i te rā e tuatuaʼi kotou e: Kia ora aia tei aere mai ma te ingoa o te Atu, i roto i te mareva o te rangi, ma te au angela tapu e aru mai iaia. E mārama akera tana au pipi e ka oki akaou mai aia ki te enua nei, i muri ake i tona akakakāangaia e akakoronaangaia ki te rima katau o te Atua.

2 E tei te aerenga a Iesu ki vao i te iero ra; e kua aere maira tana au pipi kiaia, kia akarongo iaia, i te na ko anga e: E te Orometua, e akakite mai kia matou i te patu o taua iero ra, mei taau i tuatua na—Ka uriia te reira ki raro, e ka vai tanea te reira.

3 E kua karanga atura a Iesu kia ratou: Te kite nei kotou i teianei au mea katoa, e kare ainei kotou i mārama i te reira? Koia mou taku e karanga atu kia kotou na, kare rava tetai o teianei au toka o te iero e vai ki rungaʼo i tetai, e ope rava i te uriia ki raro.

4 E kua akaruke maira a Iesu ia ratou, aere atura ki runga i te Maunga ko Oliveta. E te noo ra aia ki runga i te Maunga ko Oliveta, kua aere ngaro ua maira te au pipi kiaia, na ko maira: E akakite mai koe ia matou i te tupuanga o teia au mea nei mei taau i tuatua, no runga i te takoreanga o te iero, e te ngati Iuda; e eaa te akairo o toou aerenga mai, e te openga o teianei ao, me kore ra te akapouangaia o te aronga kino, koia oki te openga o te ao nei?

5 E kua karanga atura Iesu kia ratou, na ko atura: Kia matakite ia kotou, ko te vare aea kotou i te tangata;

6 E manganui te ka aere mai ma toku nei ingoa, e te na ko anga mai e—Ko au te Mesia—e manganui oki te ka vare;

7 Ei reira e tuku ei ratou ia kotou no te mate, e ka tamate rava ia kotou; e e makitakitaia mai kotou e to te iti tangata ravarai no toku nei ingoa;

8 Ei reira e riri mai ei tetai pae, e ka rave pikikaa mai tetai ki tetai, e ka makitakita mai,

9 E tu mai oki te au peroveta pikikaa e manganui, e manganui te ka vare ia ratou;

10 E no te mea e maata te kino i te tupuanga, ka riro te rai o te tangata i te meangiti te anoano;

11 Kareka te tapu tikai e tae uatu ki te openga ra, ka ora ïa.

12 No reira, kia akara atu kotou i te mea rikarika e taneaʼi ra, tei tuatuaia mai e Daniela te peroveta, no runga i te akapouanga o Ierusalema, ka tu kotou i te ngai tapu ra; ko tei tatau ra, e akonoia kia kite.

13 Te aronga e noo i Iudea ra, ka oro ratou ki te au maunga;

14 E te tangata i rungaʼo i te are ra, auraka aia e eke ki raro e rave i tana apinga i roto i te are ra;

15 Eiaa tei te kainga ra, e oki mai e tiki i tona kakau;

16 E aue oki kia ratou tei tu i te tamaiti, e kia ratou e angai ra ki te u i tei reira tuatau.

17 No reira, e pure oki kotou, kia kore to kotou oroanga e riro i te tuatau paroro, auraka katoa i te Sabati;

18 E mate maata tei taua au rā ra ki runga i te ngati Iuda, e tei noo i Ierusalema, tei kore rava i kitea ana mei muatangana tei tonoia mai e te Atua ki runga ia Iseraela, mei te akamataanga mai o to ratou basileia e tae mai ki teianei; kare, kare rava e tonoia akaou ia mai ki runga ia Iseraela.

19 E ko te au mea tei tae ki runga ia ratou, ko te akamata ua anga tei reira o te taitaia te ka tae mai ki runga ia ratou.

20 Naringa oki kare taua au rā ra i tapotoia, kare rava te tangata e ora; no te aronga i ikiia ra, no ratou te koreromotu, i tapotoia ai taua au rā ra.

21 I na, ko teia au mea taku e tuatua atu kia kotou, no runga i te ngati Iuda; e teia oki tetai, i muri ake i taua mate maata ra tei tae ki runga ia Ierusalema, me tuatua mai tetai tangata kia kotou, I na, teia te Mesia, e i na, tera, auraka rava e akarongo atu;

22 E i taua au rā ra, e tu mai ei te au Mesia pikikaa, e te au peroveta pikikaa e ka akaari mai i te au akairo e te au ravenga umere, e tae uatu te vare ki te aronga ikiia ra, ko tei ikiia no te koreromotu, naringa e tika.

23 I na, te tuatua nei au i teia au mea kia kotou no te aronga tei ikiia; e akarongo oki kotou i te tuatua tamaki, e te rongo tamaki; kia matakite ra eiaa kotou e taitaia, ka tupu pouroa te au mea tei tuatuaia e au kia kotou, kare ra i vaitata te openga.

24 I na, kua akakite takere ana au kia kotou;

25 No reira, me tuatua mai ratou kia kotou e: I na, aia tei te medebara; auraka e aere: I na, tei roto i te au pia ngaro; auraka e akarongo atu;

26 E tau oki te aereanga mai o te Tamaiti a te Tangata nei, mei te mārama o te popongi i te itinga o te rā ra, e kakā ua atu ki te opunga o te rā, te tapokianga i te ao katoa.

27 E teianei ka akakite atu au kia kotou i tetai parabole. I na, ei te ngai kopapa mate ra, e putuputu mai ei te au aeto; mei te reira katoa te akaputuputuanga o tei ikiia e au mei nga tuanga e ā o te ao nei.

28 E akarongo ratou i te tuatua o te tamaki, e te rongo tamaki.

29 I na te tuatua nei au ki tei ikiia e au; ka tu mai tetai iti tangata ka tamaki mai i tetai iti tangata, e tetai basileia ki tetai basileia; e onge oki, e te maki mate, te ngaruerue enua, i tera ngai, i tera ngai.

30 E pera katoa, no te mea e maata te kino i te tupuanga, ka riro te rai o te tangata i te meangiti te anoano; kareka tei tapu marie e tae ua atu ki te openga, ka ora ïa.

31 E pera katoa, e tutu aere ia te Evangelia o te Basileia nei e kako rava ake to te ao katoa nei, ei kite no te iti tangata ravarai, ko te openga iora ïa, me kore ra te takoreangaia o te aronga kino;

32 Ei reira te mate rikarika e tae mai ei, mei ta Daniela te peroveta i tuatua mai e tupu ei.

33 E i muringao i taua tuatau mate ra, e akapoiriia te rā, e kare te mārama e kakā mai, e topa mai oki te au etu mei te rangi mai, e te au mea mana o te rangi ra, ka ruruia ïa:

34 Tika tikai taku e karanga atu kia kotou, no teia uki, tei akakiteia mai no teia au mea e tupu nei; kare te reira e ngaro ke mei taku i tuatua kia kotou, ka tupu pouroa te reira.

35 Noatu e te tae maira te au rā e takake atu ei te rangi e te enua; kareka taku au tuatua kare te reira e takake, ka tupu pouroa te reira.

36 Mei taku oki i tuatua ana i mua ake, i muri ake i taua au rā mate rikarika ra, e ka ruruia te au mea mana o te au rangi, ei reira te akairo o te Tamaiti a te Tangata i te rangi e mama mai ei, e ei reira te au kopu tangata ravarai o te enua nei e aue ei, kia kite ratou i te Tamaiti a te Tangata i te aereanga mai na roto i te tiao rangi, ma te mana e te kakā maata;

37 E ko tei mou marie i taku nei tuatua, kare rava aia e vare, ka aere mai oki te Tamaiti a te Tangata, e nana e tono i tana au angela ki mua iaia ma te pu tangi maata ra, e na ratou e akaputuputu mai i te toenga o tona aronga ikiia ra, mei nga matangi mai e ā, mei tetai ope o te rangi ki tetai ope.

38 E teianei kia kite kotou i te parabole o te suke—Kia tupu te kao, e kia puera te rau, te kite ra kotou e, te vaitata ra te akaū i reira;

39 Koia katoa tei ikiia e au, me kite ratou i taua au mea nei, ka kite ratou e te vaitata ra aia, tei te ngutupa rava;

40 Kareka taua rā ra e te ora, kare rava tetai i kite; kare, kare oki te au angela a te Atua i te rangi, mari ra ko toku Metua anake ra.

41 E mei te tuatau ia Noa ra, koia katoa te aerenga mai o te Tamaiti a te Tangata nei;

42 Ka pera rai oki ratou, mei te au rā i mua ake i te diluvi ra; e tae ake ra ki te rā i tomo ei a Noa ki roto i te araka te kaikai ra ratou te inuinu ra, te akaipoipo ra e te orongaia ra kia akaipoipoia;

43 Kare oki i kite, e na te tae rava mai te diluvi, e kua apai ke rava ia ratou; mei te reira katoa te aerenga mai o te Tamaiti a te Tangata nei.

44 Ei reira tei tataia e tupu ei, i te au rā openga, toko rua i roto i te kainga, e riro tetai e ora atu tetai;

45 Toko rua i roto i te tavirianga sitona, e riro tetai e ora atu tetai;

46 E me tuatua au ki tetai tangata, ka tuatua au ki te tangata ravarai; kia matakite, kare oki kotou i kite i te ora e tae mai ei to kotou Atu.

47 Kua kite ra kotou e, naringa i kite te tangata kainga i te ora e tae mai ei te keia, kua tapapa aia, kare i akaruke ua i tona are kia vavai uaia, no reira kia teateamamao rai.

48 No reira kia vai teateamamao rai kotou, no te mea, ei te ora manako kore ia e kotou, e tae mai ei te Tamaiti a te Tangata.

49 Koai te tavini meitaki e te pakari, i ta tona pu i iki ei akaaere i tona ngutuare, ei tua i te kai na ratou i te ora mou ra?

50 E ao to te reira tavini, tei rokoia mai e tona pu, te pera ra; tika tikai taku e karanga atu kia kotou e akariro aia iaia ei akaaere i te au apinga ravarai nana ra.

51 I na ra, me tuatua tera tavini kino i roto i tona ngakau: Kare taku pu e tae vave mai,

52 Kua timata atura i te pāpā i te aronga taeake tavini nona ra, e kai iora i te kai, inu iora, koia e te aronga katoa e akakona ra,

53 Kia tae ki te rā manako kore ia e ïa, e te ora kitea kore ia e ïa ra, e tae mai ei te pu o taua tavini ra,

54 E akatakake atu ei iaia, ka tuku atu ei i tana tuanga i roto i te aronga pikikaa; tei reira te aue e te pakatianga nio.

55 Ko te openga oki te reira o te aronga kino, mei ta Mose i totou takere na, i te na ko anga mai e: E tipu ke ia oki ratou mei rotopu i te au tangata, kareka te openga o te enua, kare te reira i tae mai ake, i na, ka tae mai, ka tae mai.