Scriptures
Tuatua No Te Akamataanga

Tuatua No Te Akamataanga

Ko te Poe Oko Maata e koikoianga no tetai au apinga manea tei piri atu ki te maataanga o tetai au manako no runga i te akarongo e te kite apii o Te Akonoanga a Iesu Mesia o te Aronga Tapu i te Au Rā i Muri Nei. Ko teia au tuanga nei kua akaputuia e te Peroveta Iosepha Timeti e kua neneiia i roto i te au puka akapapaanga a te Akonoanga i tona tuatau.

Ko te au koikoianga mua tei karangaia e ko Te Poe Oko Maata, kua angaangaia i te mataiti 1851 e Elder Franklin D. Richards, i reira e mema no te Pupu Konitara Tino Ngauru Ma Rua e e peresideni no te mitiona o Paretane. Ko te akakoroanga koia oki ko te akamaataanga i te neneianga o tetai au tataanga puapinga tei kore i rauka i te maataanga o te tangata i te tuatau o Iosepha Timeti. Kia maata te au mema o te Akonoanga i Europe e Marike, kua anoanoia kia taangaangaia teia au tumu tuatua. Kua maata te taangaangaia anga o te Poe Oko Maata i teia nei ao e no reira kua riro mai ei angaanga akaraanga ki roto i te Akonoanga na roto i te taangaanga anga a te Ruru Peresideni Mua e te uipaanga maata i Salt Lake City i roto ia Okotopa i te rā 10, 1880.

E manganui te au akatanotanoanga i raveia no roto i te au tumu mamaata mei tei anoanoia i roto i te Akonoanga. I te mataiti 1878 ko te au tuanga o te Puka a Mose tei kore i kapitiia mai i te neneianga mua, kua topiriia atu te reira. I te mataiti 1902 ko tetai au tuanga o te Poe Oko Maata tei taikuia i roto i te Apiianga e te Au Koreromotu, kua kiritiia ki vao. Ko te akapapaanga o te au pene e te au irava e to ratou au akairo kua raveia i te mataiti 1902. Ko te neneianga mua o te koramu takirua e to ratou akairo kua raveia i te mataiti 1921. Kare e akatukeanga ke i raveia e tae uatu ki Aperira 1976, i reira e rua eeuanga tei topiria mai. I te mataiti 1979 ko teia nga eeuanga nei kua kiritiia atu mei roto i te Poe Oko Maata e kua tukuia ki roto i te puka o te Apiianga e te Au Koreromotu, i reira kua riro mai e ko te nga tuanga 137 e te 138. I roto i teia neneianga ou e au akatukeanga tetai i raveia no te akatanoanga i te tumu tuatua ki te au tataanga i mua ana.

Ka aru mai tetai akamāramaanga poto no runga i te au tumu tuatua o roto:

  1. Koikoianga no roto i te Puka a Mose. E kiritianga no roto i te puka a Genese i roto i te Akaurianga a Iosepha Timeti i te Bibilia Tapu, tana i akamata atu i roto ia Tiunu 1830 (History of the Church, 1:98–101, 131–139).

  2. Te Puka a Aberahama. E akaurianga no roto i tetai papiri Aiphiti tei tae mai ki roto i te rima o Iosepha Timeti i te mataiti 1835, no tetai au tataanga no runga i te patereareka ko Aberahama. Kua neneiia te akaurianga ki roto i te Times and Seasons na mua i roto ia Mati i te rā 1, 1842, i Nauvoo, Illinois. (History of the Church, 4:519–534.)

  3. Iosepha Timeti—Mataio. E kiritianga no roto i te kite o Mataio i roto i te Akaurianga a Iosepha Timeti i te Bibilia Tapu (akara ki te Apiianga e te Au Koreromotu 45:60–61 no runga i ta te Atua akaue kia akamata i te akaurianga o te Koreromotu Ou).

  4. Tua o Iosepha Timeti. E kiritianga no roto i te kite o Iosepha Timeti e te tua taito, tana i teateamamao i te mataiti 1838 e tei nenei putuputu ia ki roto i te Times and Seasons i Nauvoo, Illinois, akamata ia Mati i te rā 15, 1842 (History of the Church, 1:1–44).

  5. Te Au Akatinamouanga Akarongo o Te Akonoanga a Iesu Mesia o te Aronga Tapu i te Au Rā i Muri Nei. E tuatua na Iosepha Timeti tei neneiia ki roto i te Times and Seasons i roto ia Mati i te rā 1, 1842, tei topiriia ki te tua poto o te Akonoanga tei matauia i te ingoa e ko te Wentworth Letter, (History of the Church, 4:535–541).