1 I te rā toru o Okotopa, i te mataiti tai tauatini e iva anere tai ngauru ma varu, te noo ua ra au i roto i toku pia ma te manakonako no runga i te au irava tapu;

2 Te akamanakonakoanga no runga i te atinga tarangaara maata tei raveia e te Tamaiti a te Atua, no te akaoraanga i to te ao;

3 E te inangaro maata e te umere tei akaariia mai e te Metua e te Tamaiti i te aereanga mai te Akaora ki roto i te ao nei;

4 E na roto oki i tana tarangaara, e na roto i te kauraro ki te au ture o te evangelia, e akaoraiaʼi te tangata.

5 Iaku ra e manakonako ua ra, kua oki toku manako ki te au tataanga a Petero te aposetolo, e ki te aronga tapu i te tuatau mua tei pueurikiriki ki Ponoto, Galatia, Kapadokia, e tetai au tuanga i Asia, i tutuiaʼi te evangelia i muri ake i to te Atu akasatauroangaia.

6 Kua akatuera au i te Bibilia e kua tatau au i te pene toru e te ā o te episetole mua a Petero, e iaku e tatau ra, kua maata tikai toku mareka, tei kore rava au i pera ana i mua, teia i reira te au irava:

7 “I mate na oki te Mesia uaorai i te mateanga okotai no te ara, te tangata tuatua-tika no te aronga tuatua-tika kore, kia tae tatou kiaia i te Atua ra; i tamate ravaia aia i te kopapa ra, i akakeuia ra e te Vaerua:

8 “Ko tana ïa i ako atu i te au vaerua e vai i roto i te are tapekaanga i teianei;

9 “Ko tei kore i akarongo i muatangana, i te akakoromakianga roa o te Atua, ka tatari ei aia i te tuatau ia Noa ra, i te taraianga i te araka ra, i oraʼi e tokotai puke tangata i te vai, koia oki nga tangata toko varu ra.” (1 Petero 3:18–20.)

10 “I ako katoa ia atu ei te evangelia i te aronga i mate ra, akaapa ua rai te tangata ia ratou i te kopapa nei, te ora ra ratou i te Atua i te vaerua.” (1 Petero 4:6.)

11 Iaku e manakonako ua ra no runga i teia au mea tei tataia, kua akapueraia mai ra te nga mata o toku nei māramarama, e kua noo mai te Vaerua o te Atu ki rungaʼo iaku, e kite atura au i te urupu o tei mate, te rikiriki e te mamaata.

12 Kua akaputuputu mai ki te ngai okotai te urupu maata o te au vaerua o te aronga tuatuatika, tei tu akarongo meitaki i roto i te kite papu o Iesu i to ratou nooanga i te oraanga kopapa;

13 E ko tei oronga atu i te atinga ei akatauanga ki te atinga maata o te Tamaiti a te Atua, e kua mamae i te takingakinoia i roto i te ingoa o to ratou Akaora.

14 Kua takake pouroa teia mei roto i te oraanga kopapa e te tinamou i roto i te manakonakoanga o te tuakaouanga kakā, na roto i te aroa ua o te Atua te Metua e tana Tamaiti Anau Tai ko Iesu Mesia.

15 E kite atura au e kua kī ratou i te rekareka e te mataora, e kua rere ua ratou i te rekareka no te mea kua tae te rā o to ratou akaoraangaia.

16 Kua akaputuputu ratou no te tiakianga i te aereanga atu te Tamaiti a te Atua ki roto i te ao vaerua, kia akakite atu i to ratou akaoraanga mei te tapekaanga o te mate.

17 To ratou moeanga one pueu ka akaoki akaou ia mai ki to ratou turanga tikai, te ivi ki tona ivi, te au uaua e te kiko ki runga ia ratou, e ko te vaerua e te kopapa ka kapitiia e kare e takake akaou, kia rauka ia ratou te kīanga o te rekareka.

18 I teia urupu maata i tiaki nei ma te tuatua, e te rekareka i te ora e akaoraia mai ei ratou mei te mate mai, kua mama mai te Tamaiti a te Atua, i te akakiteanga mai ki te au tuikaa e kua ora ratou tei noo akarongo ua ana;

19 I reira tona akoanga atu i te evangelia openga kore kia ratou, te apiianga o te tuakaouanga e te akaoraanga o te oraanga tangata mei te ingaanga e mei te ara a te tangata tatakitai kia tau ki te tataraara.

20 Kare aia i aere ana ki te aronga kino, e i rotopu i te aronga patoitoi e te tataraara kore tei akaviivii ia ratou uaorai i te kopapa nei, e kare tona reo i tuatua na;

21 Kare katoa oki tei kai tamaki atu e tei kopae atu i te au kite papu e te au akamatakiteanga a te au peroveta i taito i kite ana i tona mata.

22 Kua tutara te poiri i te ngai e noo ra ratou, kareka i rotopu i te aronga tuatua-tika kua vai te au;

23 Kua rere ua te aronga tapu i te rekareka i to ratou akaoraangaia, kua tuturi ki raro e kua akangateitei i te Tamaiti a te Atua e kua aaki e ko to ratou Akaora mei te mate e te au vivi o ade.

24 Kua mārama to ratou au mata, e kua topa mai ra te kakā o te aroaro o te Atu ki rungaʼo ia ratou, e kua imene akameitaki atu ra ratou i tona ingoa tapu.

25 Kua umere tikai au, kua mārama oki au e kua pou i te Akaora e toru mataiti i tona angaanga anga i rotopu i te ngati Iuda e ratou te ngutuare o Iseraela, iaia e apii ra ia ratou ki te evangelia openga kore e te kapiki mai ia ratou kia tataraara;

26 E i na, noatu rai tana au angaanga umere, e te semeio, e te akakiteanga o te tuatua-mou, na roto i te mana maata e te tikaanga, e toko iti ua rai tei akarongo mai ki tona reo, e kua rekareka ki mua i tona aroaro, e kua rauka te akaoraanga mei tona nga rima.

27 Kareka tana angaanga i rotopu i te aronga mate kua akakotinga ua ia te reira no te poto o te tuatau koia oki mei rotopu i te akasatauroangaia e tona tuakaouanga;

28 E kua umeremere au i te au tuatua a Petero—tei na ko mai e, kua ako atu te Tamaiti a te Atua i te au vaerua e noo i roto i te are tapekaanga, tei kore i kauraro ana, e te roa i to te Atua tiakianga i te au rā o Noa—i naea i raukaʼi iaia kia apii i taua au vaerua ra e te rave i te angaanga tau i rotopu ia ratou i te taime poto roa.

29 E iaku e manakonako ua ra, kua puera akera toku mata, e kua akakeuia mai toku mārama, e kua kite au e kare e ko te Atu uaorai tei aere ki rotopu i te aronga kino e te aronga kauraro kore e tei patoi i te tuatuamou, kia apii ia ratou;

30 E i na, kua akapapu aia i tona pupu mei roto mai i te aronga tuatua-tika, e kua iki i te au karere, ma te kakauia ki te mana e te tikaanga, e kua akaue ia ratou kia aere ki mua kia apai i te mārama o te evangelia kia ratou e noo ra i roto i te poiri, koia te au vaerua katoatoa o te tangata; i na reira te apiiangaia te evangelia ki tei mate.

31 E kua aere atura te au karere i ikiia kia akakite e kua tae te rā o te Atu e ma te tutu atu i te mataraanga mai te au tuikaa tei tapekaia, e pera katoa kia ratou pouroa te ka tataraara i ta ratou au ara ma te ariki i te evangelia.

32 I akaperaia te apiiangaia te evangelia ki te aronga i mate i roto i ta ratou au ara, ma te kite kore i te tuatua-mou, me kore ra i te aatianga ture, e kua kopae atu i te au peroveta.

33 Kua apiiia ratou ki te akarongo i roto i te Atua, te tataraanga i te ara, te bapetizo tua no te akakoreanga o te ara, te orongaanga o te Vaerua Tapu na roto i te tukuanga rima,

34 E te au ture katoatoa o te evangelia tei tau no ratou kia kite e raukaʼi ia ratou uaorai kia akavaia ratou kia tau ki te au tangata i te kopapa nei, kia ora ra i te Atua i roto i te vaerua.

35 I na reira oki i kite ei tei mate, te aronga rikiriki e te aronga mamaata, te aronga tika kore e ratou te aronga akarongo, e kua rauka mai te akaoraanga na roto i te akaatingaanga o te Tamaiti a te Atua ki runga i te satauro.

36 No reira na roto i teia i kiteaʼi e i te tuatau o to tatou Akaora i te ao o te au vaerua, i te akoanga e te akateateamamaoanga i te au vaerua akarongo o te au peroveta tei akapapu no runga iaia i te kopapa nei;

37 Kia apai ratou i te karere o te akaoraanga kia ratou katoatoa tei mate, kia ratou oki tei kore i rauka iaia uaorai i te aere, no to ratou tu taitoito e te aatianga ture, e na roto i te araveianga a tona au tavini e akarongo ei ratou i tana au tuatua.

38 E i rotopu i te au aronga ngateitei e te ririnui tei akaputuputuia mai ki roto i teia urupu maata o te aronga tuatua-tika, tei reira te Metua Tane a Adamu te Au Rā Taito e te metua o te katoatoa,

39 E to tatou Metua Vaine ko Eva e te kakā, e te manganuianga o tana au tamaine akarongo tei noo ana na roto i te au tuatau e kua akamori i te Atua ora e te tika.

40 Ko Abela, te tangata mua i tāiaia, tei reira aia, e tona teina ko Seta, koia tetai o te au tangata ririnui, i te tutu tikai o tona metua ko Adamu.

41 Ko Noa, tei oronga i te akamatakiteanga o te diluvi; ko Sema, te taunga teitei maata; ko Aberahama, te metua o te aronga akarongo; Isaaka, Iakoba, e Mose te oronga ture mamaata o Iseraela;

42 E ko Isaia, tei akakite atu na roto i te totou e kua akatainuia te Akaora kia akamou i te ati ngakau, e kia tutuia te au ki te au tuikaa, e te tueraanga o te are tapekaanga kia ratou tei tapekaia i reira.

43 Pera katoa, ko Ezekiela, tei akaariia kiaia na roto i te orama te ō maata o te au ivi marō, te ka akakakauia ki te kiko, e kia aere akaou mai i te tuatau o te tuakaouanga o tei mate, ei au kopapa ora;

44 Ko Daniela, tei kite e tei akakite mai na mua ake i te akamouanga te basileia o te Atua i te au rā openga nei, e kare rava te reira e takoreia, e kare e orongaia atu ki tetai uatu au tangata ke;

45 Ko Elia, tetai i te pae ia Mose i runga i te Maunga o te Akatukeanga;

46 Tei reira katoa a Malaki, te peroveta, tei akapapu mai i te aereanga mai o Elia te peroveta—ta Moronai i tuatua ana ki te Peroveta Iosepha Timeti, i te na ko anga mai e, ka na mua mai aia i te aere mai i mua ake ka tae mai ei te rā maata e te mataku o te Atu—tei reira katoa.

47 E ko te Peroveta ko Elia te ka tanu ki roto i te au ngakau o te au tamariki i te taputouanga tei papauia ki to ratou au metua,

48 I te akaarianga o te angaanga maata te ka raveia ki roto i te au iero o te Atu i te tuatau o te kīanga o te au tuatau, no te akaoraanga o tei mate, e te topirianga o te au tamariki ki to ratou au metua, kia kore te enua katoa e takore takiri ia ki te taumaa, i tona aerenga mai.

49 Pouroa teia e te vai atu rai, pera te au peroveta tei noo ki rotopu i te ngati Niphai e tei akapapu mai i te aerenga mai o te Tamaiti a te Atua, tei rotopu i teia urupu maata ma te tiaki atu i to ratou akaoraangaia mai,

50 Kua akara oki te au tangata tei mate i te roa o te akarukeanga to ratou au vaerua i to ratou au kopapa mei te tuikaa rai.

51 Ko teia ta te Atu i apii, e kua oronga atu kia ratou i te mana kia aere mai ki vao, i muri ake i tona tuakaouanga mai mei te mate, kia tomo ki roto i te basileia o tona Metua, kia akakoronaia i reira ki te kopapa mate kore e te ora mutukore,

52 E kia rave tamou atu rai i ta ratou angaanga mei tei taputouia e te Atu, e kia mou ratou i te au akameitakianga ravarai tei akonoia no ratou tei inangaro iaia.

53 Ko te Peroveta ko Iosepha Timeti, e taku metua, ko Hyrum Smith, Brigham Young, John Taylor, Wilford Woodruff, e tetai au vaerua ikiia tei akonoia e kia aere mai ratou i roto i te kīanga o te au tuatau kia piri ki roto i te akamouanga i te tango o te angaanga maata o te au rā i muri nei,

54 Pera katoa i te akatuanga o te au iero, e te raveanga o te au angaanga oroa i roto i reira no te akaoraanga o tei mate, tei roto katoa i te ao vaerua.

55 Kua kite katoa au e, ko ratou tetai i rotopu i te au tangata ngateitei e te rongo nui tei ikiia mai mei te akamataanga ei au tutara i roto i te Akonoanga a te Atua.

56 E i mua katoa ake ka anauia mai ei ratou, ko ratou, e tetai aronga ke atu e manganui, tei rauka ta ratou au apiianga mua i roto i te ao vaerua, e kua teateamamao no te aere mai i te tuatau o te Atu kia angaanga i roto i tana kainga vine no te akaoraanga o te au tangata.

57 E kua kite atu au i te au ereta akarongo o teia tuatau nei, e me akaruke atu ratou mei teia oraanga kopapa nei ka rave uatu rai ratou i ta ratou angaanga tutu evangelia no te tataraara e te akaoraanga, na roto i te atinga a te Tamaiti Anau Tai a te Atua, i rotopu i te aronga e noo ki roto i te poiri e i raro ake i te tuikaa o te ara i roto i te ao maata maata o te au vaerua o tei mate.

58 Ko tei mate e kua tataraara ka ora ïa, na roto i te kauraro i te au angaanga oroa o te are o te Atua,

59 E i muri ake i to ratou tutakianga i te utunga o ta ratou rave ara, e kua tamāia ratou kia mā meitaki, ka rauka i reira ta ratou tutaki kia tau ki ta ratou au angaanga, e ka riro ratou ei aronga tuanga no te akaoraanga.

60 Mei teia oki te orama o te akaoraanga o tei mate tei eeuia mai kiaku, e te akakite nei au i taku i kite, e kua kite au e e tuatua-mou teia, na roto i te akameitakianga a te Atu te Akaora, ko Iesu Mesia, koia ïa. Amene.