Tuanga 49
Te eeuanga tei orongaia mai na roto ia Iosepha Timeti te Peroveta, kia Sidney Rigdon, Parley P. Pratt e Leman Copley, i Kirtland, Ohio, Mati 1831 (History of the Church, 1:167–169). (Te karanga nei tetai au tata tua e ko te rā o teia eeuanga ko Me 1831.) Kua oti a Leman Copley i te ariki mai i te evangelia, i na ra, te irinaki rai aia ki tetai au apiianga a te au Shaker (United Society of Believers in Christ’s Second Appearing), e no roto mai ana oki aia i reira. Ko tetai pae o te irinakianga o te au Shaker, koia oki kua tupu takere te oki rua anga mai o te Mesia, e kopapa vaine tona i te mamaanga mai, e ko Ann Lee; kare ratou i manako e ka anoanoia te bapetizo ki te vai; kua araiia te kai i te puaka, e manganui tei kore e kai i tetai uatu kiko manu; e kua manako ratou e kia noo ua ma te kore e akaipoipo, e meitaki atu ïa i te oraanga o te akaipoipo. I roto i te akamataanga o teia eeuanga, ko teia ta te Peroveta i tata, “No te anoano kia rauka tetai mārama apa kore no runga i teia tumu tuatua, kua ui au ki te Atu e teia tei rauka mai” (History of the Church, 1:167). Kua akaari mai teia eeuanga e kua tarevakē tetai pae o te au tumu manako o te au Shaker. Ko te au taeake i taikuia i runga ake nei, kua apai ratou i tetai kapi o te eeuanga ki te putuputuanga o te au Shaker (i vaitata atu ki Cleveland, Ohio) e kua tatau kia ratou i te au mea katoa, i na ra, kua patoi mai ratou.
1–7, Ko te rā e te ora e aere mai ei te Mesia, kia vai rai te reira ma te kore e kitea e tae ua mai aia; 8–14, Kia tataraara te tangata, e irinaki ki te evangelia, ma te kauraro ki te au angaanga oroa kia rauka te akaoraanga; 15–16, Kua iki oki te Atua i te akaipoipoanga; 17–21, Kua akatikaia te kai i te kiko; 22–28, Ka tupu ruperupe a Ziona e ka puera mai te ngati Lamana mei te tiare roti i mua ake i tona Oki Rua Anga Mai.
1 E akarongo mai ki taku tuatua, e taku au tavini e Sydney e pera a Parley e Leman katoa; e i na, tika tikai taku e karanga atu kia kotou, te oronga atu nei au i tetai akaueanga kia aere kotou kia tutu aere i taku nei evangelia tei rauka ia kotou, e kia apiiia atu te reira ki te au Shaker.
2 I na, te karanga atu nei au kia kotou, te anoano nei oki ratou kia kite i tetai pae o te tuatuamou, auraka ra te katoatoa rava, e kare oki ratou i tika ki mua iaku e ka anoanoia kia tataraara.
3 No reira, te tono nei au ia korua e taku nga tavini ko Sydney e Parley kia tutu atu i te evangelia kia ratou.
4 E ka akataonga katoa ia taku tavini ko Leman ki teia angaanga, kia tuatua oki aia kia ratou, auraka oki e kia tau tikai ki tei rauka iaia no ko mai ia ratou, mari ra kia tau ki te ka apiiia atu kiaia e korua e taku nga tavini; e me rave aia ka akameitaki atu au iaia, me kore ra kare aia e manuia.
5 Te tuatua maira te Atu; ko au te Atua, e kua tono mai i taku Tamaiti Anau Tai ki te ao nei ei akaora i te ao nei, e kua akaue mai oki e ko tei ariki mai iaia ra ka ora aia, e ko tei kore i ariki mai iaia ra ka akaapaia aia—
6 E kua rave ratou ki te Tamaiti a te Tangata nei mei ta ratou i inangaro; e kua rave oki aia i tona mana ki te rima katau o tona ra kakā, e te tutara nei aia i te rangi, e ka tutara uatu rai aia e tae uatu ki tona tuatau e oki akaou mai ei ki te ao nei, e tuku ei aia i te au enemi katoatoa ki raro ake i tona vaevae, e te vaitata mai nei oki taua tuatau ra—
7 Naku oki, na te Atu ra ko te Atua, i tuatua atu i te reira; i na ra, ko te ora e te rā kare rava e tangata i kite i te reira, kare katoa te au angela i te rangi, kare oki ratou e kite kia tae rava mai aia.
8 No reira, te anoano nei au kia tataraara te au tangata katoatoa, no te mea tei roto te katoatoa rava i te ara, mari ua ra ko te aronga taku i akono ki konei iaku, e aronga tapu kare kotou i kite ia ratou.
9 No reira, te karanga atu nei au kia kotou e kua tuku atu au i taku koreromotu mutukore kia kotou, koia tei tupu mei muatangana mai.
10 E ko taku oki i taputou atu, kua akatupu oki au e ka tupou oki te au iti tangata o te enua ki raro i te reira; e me kare ratou e anoano i te rave, ka taakaaka rava ia ratou ki raro, e ko tei akateiteiia i teianei, ka taakaakaia ïa na roto i te mana.
11 No reira, te oronga atu nei au i tetai akaueanga kia kotou kia aere atu kotou ki rotopu i teia iti tangata, ma te karanga atu kia ratou, mei te tu o taku aposetolo i taito, koia oki a Petero:
12 E irinaki ki te ingoa o te Atu ko Iesu, ko tei noo ana ki te enua nei, e te ka oki akaou mai, te momua e te akaopenga;
13 E tataraara e kia bapetizoia na roto i te ingoa o Iesu Mesia, kia tau ki te akaueanga tapu, no te akakoreanga o te ara;
14 E ko te ka rave i teia ka rauka mai iaia te orongaanga o te Vaerua Tapu, na roto i te tukuanga rima o te au ereta o te akonoanga.
15 E i na, tika tikai taku e karanga atu kia kotou, ko tei patoi i te akaipoipo kare aia i akataongaia e te Atua, no te mea ko te akaipoipoanga e mea ikiia te reira e te Atua ki te tangata nei.
16 No reira, kua tika i te ture kia rave mai aia e tai vaine nana, e kia riro oki raua ei kopapa okotai, e ko teia au mea katoa nei oki kia tupu te akakoroanga i angaiaʼi te ao nei;
17 E kia akakīia oki e te tangata nei, kia tau ki tona angaia anga i mua ake ka angaiaʼi te ao nei.
18 E ko te ka akaue kia patoi i te kiko manu, e auraka te tangata nei e kai i te reira, kare aia i tau i te Atua;
19 E, i na, ko te au manu vavae ā o te kainga e te au manu o te reva, e to roto mai i te enua, kua tamāia oki te reira ei kai e ei kakau no te tangata nei, e kia maata ua rai tana.
20 I na ra, kare i orongaia mai kia maata atu ta tetai tangata i runga ake i ta tetai, no reira i noo ara uaʼi te ao nei.
21 E tumatetenga maata to te tangata tei akamaringi i te toto, e me kore ra tei kaimoumou i te kiko e kare ona e inangaro.
22 E i na, tika tikai taku e karanga atu kia kotou, kare oki te Tamaiti a te Tangata nei i aere mai na roto i te kopapa o te vaine, e kare oki i te kopapa o tetai tangata e aaere nei i te enua nei.
23 No reira, auraka e vavare, mari ua ra kia aere atu rai ma te tiratiratū, ma te akara atu ki mua ki te tuatau e ru ei te rangi, e te ruketeketeanga o te enua nei, e tauriuri ei mei tera ngai ki tera ngai mei te tangata kona kava te tu, e kia akateiteiia te au ō, e kia taakaakaia te au maunga, e te au ngai pukupuku kia akamaniaia—e ka tupu pouroa teia me akatangi te angela i tana pu.
24 I na ra, i mua ake ka tae mai ei te rā maata o te Atu, ka tupu ruperupe a Iakoba i roto i te medebara, e ka puera mai te ngati Lamana mei te tiare roti te tu.
25 Ka ruperupe mai oki a Ziona ki runga i te au tuaivi e ka pereperekavana ki rungaʼo i te au maunga, e ka uipa kapiti ia ki te ngai taku i akataka.
26 I na, te karanga atu nei au kia kotou, e aere ki mua mei taku i akaue atu ia kotou; e tataraara i ta kotou au ara katoatoa; e pati, e orongaia mai kia kotou; e topapa atu, e kiritiia mai kia kotou.
27 I na, ka aere au na mua ia kotou e ka na muri; e tei rotopu au ia kotou, e kare kotou e akama.
28 I na, ko au a Iesu Mesia, e te aere vave mai nei au. Koia ïa. Amene.