Tuanga 52
Te eeuanga tei orongaia mai na roto ia Iosepha Timeti te Peroveta, ki te au ereta o te Akonoanga i Kirtland, Ohio, i te rā 7 o Tiunu, 1831 (History of the Church, 1:175–179). Kua raveia tetai uipaanga maata ki Kirtland, akamata i te rā 3, e akamutu atu i te rā 6 o Tiunu. I roto i teia uipaanga maata nei i raveiaʼi te nga akataongaanga mua ki te taonga taunga teitei; e kua kitea e kua patoiia atu oki tetai au vaerua pikikaa e te vavare.
1–2, Ko te uipaanga maata ki mua ka raveia ki Missouri; 3–8, Kua ikiia tetai nga ereta kia aere kapiti atu mei tei akatakaia; 9–11, Ka apii atu te au ereta iʼ ta te au aposetolo e te au peroveta i tata; 12–21, Ko te aronga tei akamāramaia e te Vaerua, ka apai mai ratou i te ua o te ngateitei e te pakari; 22–44, Kua ikiia tetai au ereta kia aere kia tutu i te evangelia, ia ratou e aere ra ki te uipaanga maata i Missouri.
1 I na, kua tuatua atura te Atu ki te au ereta tana i kapiki e tana i iki i teia au rā openga nei, na roto i te reo o tona Vaerua—
2 I te na ko anga e: Ka akakite atu au, ko te Atu, kia kotou i taku i anoano ia kotou kia rave mei teia taime atu e tae uatu ki te tuatau o te uipaanga maata ki mua, ko te ka raveia oki ki Missouri, ki runga i te enua taku ka akatapu atu ki toku iti tangata, koia te toenga o Iakoba, e no ratou te ka rauka kia mono, kia tau ki te koreromotu.
3 No reira, tika tikai taku e karanga atu nei kia kotou, kia tere viviki atu taku nga tavini ko Iosepha Timeti, Tamaiti, e Sidney Rigdon me papa raua no te akaruke i to raua ngutuare, e kia aere atu raua ki te enua ko Missouri.
4 E mei te mea e e akarongo mou to raua kiaku, ka akakiteia atu kia raua i ta raua ka rave;
5 E ka pera katoa, mei te mea e e akarongo mou to raua, ka akakiteia atu kia raua te enua o to kotou ipukarea.
6 E me kare ra raua e tu akarongo, ka tipu ke ia raua ki vao, mei taku i anoano, e tei tau katoa oki iaku.
7 E pera katoa, tika tikai taku e karanga atu kia kotou, kia aere taku tavini a Lyman Wight, e taku tavini katoa ko John Corrill ki to raua aerenga ma te viviki;
8 E pera katoa ki taku tavini ko John Murdock, e taku tavini ko Hyrum Smith, kia aere atu raua ki taua ngai rai na te mataara atu i Detroit.
9 E kia aere atu raua mei reira atu i te tutuanga i te tuatua na te arataa, e kare a raua tuatua ke atu, mari ua ra ko ta te au peroveta e ta te au aposetolo i tata, e tei apiiia mai kia ratou e te Akapumaana na roto i te pure akarongo.
10 Kia aere oki ratou tatakirua i te aerenga, e kia apii atu ratou na te arataa i roto i te au putuputuanga katoatoa, ma te bapetizo atu ki te vai, e pera katoa ki te tukuanga rima i te pae nia vai.
11 Te karanga maira oki te Atu e, ka akapoto au i taku angaanga na roto i te tuatuatika, e ka tae mai oki te rā ka tuku atu ei au i te akavaanga kia kitea te autuanga.
12 E kia matakite oki taku tavini ko Lyman Wight, no te mea te anoano nei oki a Satani kia ruru iaia mei te ota e ruruia ra.
13 E i na, koia tei akarongo uatu rai, ka akariroia aia ei tutara ki rungaʼo i te au mea e manganui.
14 E pera katoa, ka oronga atu au i tetai akaraanga kia kotou no te au mea katoatoa, kia kore oki kotou e vare; no te mea, te aere ra a Satani i runga i te enua nei, e te aere nei oki aia i te akavare aereanga i te iti tangata—
15 No reira, ko tei pure, ma te vaerua akaaka, ka ariki au iaia, mei te mea e ka akono aia i taku au angaanga oroa tapu.
16 Ko tei tuatua mai ma te vaerua akaaka, e te reo maru, no te Atua tikai ïa, mei te mea e akono aia i taku au angaanga oroa tapu.
17 E pera katoa, ko tei ruketekete i raro ake i toku mana ka akamaroiroiia aia, e ka apai mai oki i te ua o te akapaapaa e te pakari, kia tau oki ki te au eeuanga e te tuatua-mou taku i oronga atu kia kotou.
18 E pera katoa, ko tei autuia e kare i apai mai i tetai au ua, kia tau ki teia akaraanga, kare aia e noku.
19 No reira, na roto i teia akaraanga nei e kite ei kotou i te au vaerua i roto i te au mea ravarai i raro ake i te rangi katoa.
20 E kua tae mai te au rā; e kia tau ki te akarongo o te tangata nei ka tupu ei kia ratou.
21 I na, kua orongaia atu teia akaueanga nei ki te au ereta katoatoa taku i iki.
22 E pera katoa, tika tikai taku e karanga atu kia kotou, ka aere atu oki taku tavini a Thomas B. Marsh, e pera taku tavini ko Ezra Thayre kia tutu aere i te tuatua na taua mataara ra ki teia enua rai.
23 E pera katoa, ka aere atu taku tavini a Isaac Morley e taku tavini katoa ko Ezra Booth na taua mataara rai i te tutuanga i te tuatua ki teia enua rai.
24 E pera katoa, ka aere katoa taku tavini ko Edward Partridge e Martin Harris ma taku nga tavini ko Sidney Rigdon e Iosepha Timeti, Tamaiti.
25 Ka aere katoa taku nga tavini ko David Whitmer e Harvey Whitlock ka tutu aere na taua mataara rai ki teia enua ra.
26 E ka aere katoa atu oki taku nga tavini ko Parley P. Pratt e Orson Pratt na taua mataara rai ki teia enua rai.
27 E ka aere katoa atu oki taku nga tavini ko Solomon Hancock e Simeon Carter ki teia enua rai, e kia tutu aere na taua mataara rai.
28 E ka aere katoa atu oki taku nga tavini, ko Edson Fuller e Jacob Scott.
29 E ka aere katoa atu oki taku nga tavini ko Levi W. Hancock e Zebedee Coltrin.
30 E ka aere katoa atu oki taku nga tavini ko Reynolds Cahoon e Samuel H. Smith.
31 E ka aere katoa atu taku nga tavini ko Wheeler Baldwin e William Carter.
32 E ka akataonga katoa ia taku nga tavini, ko Newel Knight e Selah J. Griffin, e kia aere atu katoa raua.
33 Ae, tika tikai taku e karanga atu nei, ka aere pouroa teia aronga nei ki te ngai okotai, na te au mataara keke, e kare oki tetai tangata e patu ki rungaʼo i to tetai uatu tango, e kare katoa oki e aere atu na to tetai arataa.
34 Ko tei tu akarongo ra, ka akonoia ïa e ka akameitakiia ki te ua maata.
35 E te karanga akaou atu nei au kia kotou, kia aere taku nga tavini ko Joseph Wakefield e Solomon Humphrey ki te tuanga enua i te pae itinga;
36 Ka angaanga raua ki reira ma to raua kopu tangata, e kare a ratou mea ke atu e akakite, mari ua ra ko ta te au peroveta e ta te au aposetolo, e ta ratou oki i kite mata e ta ratou katoa i akarongo, e tei irinaki papu tikai, kia tupu oki i reira te au totou tei totouia mai.
37 No te aati ture oki, ka rave ke ia tei tukuia ana ki rungaʼo ia Heman Basset, e kia tukuia atu ki rungaʼo i te upoko o Simonds Ryder.
38 E pera katoa, tika tikai taku e karanga atu kia kotou, kia akataongaia a Jared Carter ei taunga, e pera katoa kia akataongaia a George James ei taunga.
39 Kia riro oki te toenga o te au ereta ei tiaki i te au akonoanga, ma te akakitekite atu i te tuatua ki taua tuanga enua e pini uake ia ratou; e kia angaanga oki ratou ma to ratou uaorai rima, kia kore oki e morimori idolo e tupu mai, pera katoa te kino.
40 I te au mea katoatoa e akamaara uatu rai i te putaua e tei ngere, tei maki e tei mamae, e ko tei kore e rave i teia au mea nei, kare ïa i te pipi naku.
41 E pera katoa, kia apai oki taku au tavini ko Iosepha Timeti, Tamaiti, e Sydney Rigdon e pera katoa a Edward Partridge i tetai pepa akatikaanga mei te akonoanga atu. E kia rauka katoa mai tetai na taku tavini ko Oliver Cowdery.
42 No reira, kia pera oki mei taku i tuatua atu nei, me tu akarongo kotou ka uipa kotou ki te ngai okotai kia rekareka i te enua ko Missouri, koia te enua o to kotou ipukarea, e i teianei oki ko te enua ïa o to kotou au enemi.
43 E, i na ra, ka rapurapu au ko te Atu i te patu i te oire i te tuatau tau, e ka akakorona au i te aronga akarongo ki te rekareka e te pereperekavana.
44 I na, ko Iesu Mesia Au, te Tamaiti a te Atua, e ka akatu mai au ia ratou i te rā openga. Koia ïa. Amene.