Akakiteanga Tuatua A Te Aronga Mana—1
Kia ratou te ka mareka mai:
No te mea kua tukuia atu tetai tuatua akakite na roto i te nuti no te au akakoroanga poritiki, mei Salt Lake City, tei totoa atu ki te au ngai katoa, i te tataanga, e ko te Utah Commission, i roto i ta ratou repoti i oti uake nei ki te Tekeretere o te Interior, kua karanga e te raveia nei rai te au akaipoipoanga kia maata te vaine e mei te ā ngauru e te maata atu teia au akaipoipoanga tei raveia i Utah mei Tiunu i topa me kore ra i roto i te mataiti i topa akenei, e i roto i te au tuatuaanga ki te katoatoa kua apii atu te au arataki o te Akonoanga, ma te Akamaroiroi e te pati kia rave uatu rai te akaipoipoanga kia maata te vaine—
No reira, ko au, te Peresideni o Te Akonoanga a Iesu Mesia o te Aronga Tapu i te Au Rā i Muri Nei, e na roto i te tu tapu tikai, te akakite atu nei au e kua tarevakē teia au akaapaanga. Kare matou e apii ana kia akaipoipo kia maata atu i te okotai vaine, kare katoa e akatika nei i tetai tangata kia rave i teia, e te patoi nei au i te tuatua e e ā ngauru, me kore ra e maata atu te au akaipoipoanga akapera tei raveia i roto i te reira tuatau i roto i tetai uatu iero me kore ra i tetai uatu ngai i roto i teia Tuanga Enua.
E tai akaipoipoanga tei akakiteia mai, e kua karanga nga tangata e kua raveia taua akaipoipoanga ki roto i te Are Orongaanga Tapu, i roto ia Salt Lake City, i te Tuatau Tupu Ou o 1889, i na ra, kare i rauka iaku kia kite e naai i rave i te reira angaanga; e noatu e eaa tei raveia no runga i teia angaanga, kare au i kite. Na roto i teia akaapaanga tei tupu, kua kirikiritia viviki ia atu te Are Orongaanga Tapu ki raro na roto i taku akaueanga.
I te mea e kua tikaia teia au ture e te Kavamani i te araianga i te akaipoipo e maata te vaine, koia te au ture tei akakiteia mai e te akavaanga teitei e kua tika, te akakite atu nei au e ka kauraro au ki taua au ture ra, e ka taangaanga au i toku mana kia akaariu mai i te au mema o te Akonoanga taku e akaaere nei, kia rave ratou mei te reira tikai.
Kare takiri o roto i taku au apiianga ki te Akonoanga, me kore ra kia ratou taku e piri nei, i te taime i taikuiaʼi, te ka riro ei tumu tika tikai no te turu atu, me kore ra no te akamaroiroi i te tangata kia noo kia maata te vaine; e ko tetai uatu Ereta o te Akonoanga te ka oronga atu i te apiianga mei te reira kua kiritiia aia. E teianei te akakite atea ua nei au i taku tuatua ki Te Aronga Tapu i te Au Rā i Muri Nei koia oki e auraka e rave i tetai akaipoipoanga tei kore e tikaia e te ture enua.
Wilford Woodruff
Peresideni o Te Akonoanga a Iesu Mesia
o te Aronga Tapu i te Au Rā i Muri Nei.
Teia ta te Peresideni Lorenzo Snow i tuatua mai:
“Te akakeu nei au e, no te mea kua ariki tatou ia Wilford Woodruff ei Peresideni no Te Akonoanga a Iesu Mesia o te Aronga Tapu i te Au Rā i Muri Nei, e koia anake te tangata i runga i te enua nei i teia taime e mou nei i te au taviri no te topirianga o te au angaanga oroa, e te ariki nei matou iaia e te mou nei aia i te au mana katoatoa na roto i tona taonga kia akakite atu i te au Akakiteanga tei tatauia mai kia rongo matou, e kua tataia te reira i te rā 24 o Tepetema, 1890, e ko te reira ta te Akonoanga i rave i roto i te Uipaanga Maata, e kua ariki matou i tana akakiteanga no runga i te au akaipoipoanga e maata te vaine, ei mea mana tikai e te pirimou.”
E kua ariki te katoatoa i te reira tumu tuatua na roto i te voutianga.
Tei Salt Lake City, Utah, i te rā 6 o Okotopa, 1890.
Te Au Tuanga Tei Ikiia Mei Roto Mai E
Toru O Te Au Akamaroioi A Te
Peresideni Wilford Woodruff
No Runga I Te Akakiteanga
Kare rava te Atu e akatika iaku, me kore ra tetai uatu tangata te ka tu ei Peresideni o teia Akonoanga kia arataki ke ia kotou. Kare te reira i roto i te porokarama. E kare katoa i roto i te manako o te Atua. E me ka timata au i te rave i te reira, ka akaatea te Atu iaku mei toku ngai, e no reira, ka akapera aia i tetai uatu tangata te ka tamata i te arataki ke i te tamariki a te tangata nei mei te au eeuanga a te Atua, e pera katoa mei ta ratou angaanga. (Ki te ono ngauru ma tai Uipaanga Maata o te Akonoanga, Monite, i te rā 6 o Okotopa 1890, tei Salt Lake City, Utah. Tei akakiteia mai na roto i te nuti, Deseret Evening News, i te rā 11 o Okotopa, 1890, kapi 2.)
Kare e manatā ana e koai te ora nei, e koai tei mate, e koai tei kapikiia kia arataki i teia Akonoanga, kia rave ratou i te aratakianga na roto i te akauruanga a te Atua Mana Katoatoa. Me kare ratou e rave na te reira mataara, kare rava e rauka ia ratou. …
Te vai nei rai iaku tetai au eeuanga kare i roa akenei, e au mea puapinga tikai kiaku, e ka akakite au kia kotou i ta te Atu i tuatua mai kiaku. Kua inangaro au kia akamārama ki te tangata e eaa tei tuatuaia, e ko te akakiteanga tuatua. …
Kua tuatua mai te Atu kiaku, kia pati atu au i Te Aronga Tapu i te Au Rā i Muri Nei i tetai uianga, e kua tuatua katoa mai aia kiaku, e me ka akarongo ratou i taku i akakite atu kia ratou e te pau mai i te uianga tei tukuia kia ratou, e na roto i te Vaerua e te mana o te Atua, ka pau aiteite ua mai ratou, e ka irinaki kapipiti ratou i teia mea nei.
Teia te uianga: Ko teea te kaveinga tano rava no Te Aronga Tapu i te Au Rā i Muri Nei kia aru—kia rave tamou ua rai i te angaanga akaipoipo kia maata te vaine, noatu e ka patoi te au ture o te enua i te reira, e te patoianga katoa a te au tangata e ono ngauru mirioni, e kia raveia e kia ngaro te au Iero katoatoa, e te akakoreangaia te au angaanga oroa o roto i reira, e to te aronga ora, e te aronga mate katoa, e te uriangaia o te Ruru Peresideni Mua e te Tino Ngauru Ma Rua e te au upoko o te kopu tangata i roto i te Akonoanga ki roto i te are auri, e te rave ke anga ia te au apinga a te tangata (ko tei kore e akatika kia akakoreia teia tu akaipoipoanga); me kore ra, noatu e kua tumatetenga tatou na roto i to tatou tu akono i te akatupuanga i teia tumu tuatua-tika, ka akamotu tatou i te reira angaanga ma te kauraro i te ture, me ka akapera ka vai rai i reira te au Peroveta, te au Aposetolo, e te au metua kia noo ki te kainga, kia apii i te au tangata e kia rave i te au angaanga a te Akonoanga, e kia vai ua rai te au iero ki roto i te rima o te aronga tapu, kia rave ua rai ratou i te au angaanga oroa o te Evangelia, no te aronga ora e no te aronga katoa i mate?
Kua akaari papu mai tikai te Atu kiaku i te orama e te eeuanga i te ka tupu me kare tatou e akamotu i teia angaanga. Naringa kare tatou i akamotu, kare i reira o kotou inangaro … no tetai o teia au tangata i roto i teia iero i Logan; no te mea, ka akamotuia te au angaanga oroa katoatoa i roto i te enua ko Ziona. E tauetonoanga maata te ka tupu i roto ia Iseraela, e e manganui oki te au tangata ka tukuia atu ki roto i te are auri. Ka tupu tikai teia manamanata ki runga i te Akonoanga katoatoa, e ka akaueia tatou kia akamotu takiri i teia angaanga. I teianei, teia te uianga, e mea tau ainei kia akamotuia na roto i teia tu, me kore ra na roto i te mataara ta te Atu i eeu mai kia tatou, kia riro to tatou au Peroveta e te au Aposetolo e te au metua tane ei au tangata rangatira, te au iero ki roto i te rima o te au tangata, e kia rauka kia akaoraia mai tei mate. E manganui tei akaora takereia mai mei roto i te are auri i roto i te ao vaerua e teia au tangata, e ka rave uatu rai ainei i te angaanga, me ka akamotu? Ko te uianga teia taku ka tuku ki mua i te Aronga Tapu i te Au Rā i Muri Nei. Na kotou uaorai e akava. Ka inangaro au e na kotou tikai e pau. Kare au e pau i te reira; te karanga atu nei au kia kotou e ko te turanga tikai te reira ta tatou, ta te tangata ka noo, naringa kare tatou i aru i teia mataara e aruia nei e tatou.
… Kua kite tikai au e eaa te ka tupu mai e naringa kare i raveia tetai angaanga. Kua noo tinamou ana teia vaerua ki rungaʼo iaku no tetai tuatau roa. I na ra, te anoano nei au i te tuatua atu i teia: Ka tuku tikai au i te au iero ki vao mei roto atu i to tatou au rima; ka aere katoa atu tikai au ki roto i te are auri; e pera katoa te au tangata, naringa kare te Atua i akaue mai iaku kia rave i taku i rave; e kia tae te ora i akaueia mai ei au kia rave i te reira, kua mārama pu ua te reira iaku. Kua aere au ki mua i te Atu, e kua tata au i ta te Atu i akakite mai kiaku kia tata. …
Te akaruke nei au i teia kia kotou, kia akamanako e kia uriuri kotou i te reira. Te angaanga nei te Atu e matou. (Uipaanga Maata na te Titi i Cache, Logan, Utah, Sabati, i te rā 1 o Noema, 1891. Tataia i roto i te nuti, Deseret Weekly, i te rā 14 o Noema, 1891.)
E teianei ka akakite atu au kia kotou e eaa tei eeuia mai kiaku, e eaa ta te Tamaiti a te Atua i rave i roto i teia apinga. … Pouroa teia au mea katoatoa ka tupu te reira, e ora nei oki te Atua Mana Katoatoa, naringa e kare taua Akakiteanga i orongaia mai. No reira, kua inangaro te Tamaiti a te Atua kia orongaia te reira ki te Akonoanga, e ki te ao nei no te akakoroanga i roto i tona ngakau. Kua akataka te Atu i te akamouangaia o Ziona. Kua akataka aia i te akaotianga o teia iero. Kua akataka aia e ko te akaoraanga o te aronga e ora nei e tei mate kia raveia te reira ki roto i te au ō o teianei au maunga. E kua akataka oki te Atua Mana Katoatoa e kare e rauka i te diabolo kia akakore i te reira. Me te mārama maira koe i tera, ko tona taviri te reira. (Ko tetai manga tuatua teia o te uipaanga ono o te akatapuanga o te Iero Salt Lake, Aperira 1893. Mei roto mai i te tataanga akatapuanga e vai nei i roto i te Ngai Akapapaanga Tua o te Akonoanga, tei Salt Lake City, Utah.)