Tuanga 13
Te akataongaangaia a Iosepha Timeti e Oliver Cowdery ki te Kautaunga o Aarona, i te pae i te nia kauvai o Susquehanna i vaitata ki Harmony, Pennsylvania, i te rā 15 o Me, 1829 (History of the Church, 1:39–42). Kua raveia te akataongaanga i raro ake i te rima o tetai angela, ko tei akakite mai iaia e ko Ioane, ko taua Ioane rai tei karangaia e ko Ioane Bapetizo i roto i te Koreromotu Ou. Kua akakite mai oki teia angela e i aere mai nei aia i raro ake i te akaaereanga a Petero, Iakobo, e Ioane ko te au aposetolo taito, ko tei mou i te taviri o te kautaunga teitei, ko tei karangaia e ko te Kautaunga o Melekizedeka. Kua orongaia te taputouanga kia Iosepha e Oliver e kare e roa atu ana, kua akataongaia raua ki te Kautaunga o Melekizedeka. (Akara ki te Tuanga 27:7, 8, 12.)
Kua akatakaia te taviri e te mana o te Kautaunga o Aarona.
1 Ei rungaʼo ia korua e taku nga tavini, na roto i te ingoa o te Mesia te oronga atu nei au i te Kautaunga o Aarona, ko tei mou i te au taviri o te matuapuruanga angela, e o te evangelia o te tataraara, e o te bapetizo taruku no te akakoreanga o te au ara; e kare rava teia e rave akaou ia mei te ao nei, e tae uatu ki te tuatau e oronga akaou mai ei te au tamaroa a Levi i ta ratou atinga ki te Atu na roto i te tika.