1 E akarongo mai, e te au ereta o taku akonoanga, e ariu mai to kotou au taringa ki te reo o te Atua ora; e akarongo ki te reo o te pakari ko te ka orongaia atu kia kotou, kia tau oki ki ta kotou rai i pati e no runga i te akonoanga katoa, e pera katoa ki te vaerua tei aere atu i te enua nei.

2 I na, tika tikai taku e karanga atu kia kotou, e manganui oki te au vaerua, koia te au vaerua pikikaa, ko tei aere mai i te enua nei i te akavareanga i te ao.

3 E kua tamata katoa oki a Satani i te akavare ia kotou, kia rauka oki iaia kia autu ki rungaʼo ia kotou.

4 I na, kua akara oki au ko te Atu ki runga ia kotou, e kua kite oki i te au angaanga viivii i roto i te akonoanga tei irinaki ki toku ingoa.

5 I na ra, kia akameitakiia ratou ko tei vai akarongo tikai e te akakoromaki, me i roto i teia oraanga nei, me kore i te mate, ka rauka oki ia ratou te ora mutukore.

6 Aue ra oki te aronga tei akavare e tei pikikaa, no te mea kua karanga mai te Atu e, ka apai mai au ia ratou ki te akavaanga.

7 I na, tika tikai taku e karanga atu kia kotou, te vai ra tetai aronga pikikaa i rotopu ia kotou, ko tei akavare i tetai pae, ko tei oronga i te mana ki te diabolo; i na ra, ko ratou ka akono akaou ia mai;

8 I na ra, ko te aronga pikikaa ka kiteia ratou e ka tipu ke ia, i teia oraanga nei, me kore ra i te mate, mei taku i anoano; aue ra oki ratou tei tipuia ki vao mei roto i taku akonoanga, kua autu te ao nei ki rungaʼo ia ratou.

9 No reira, kia matakite te au tangata tatakitai, ko te rave aea aia i te mea tuatua-mou kore e te tika kore ki mua iaku.

10 I teianei e aere mai, te tuatua maira te Atu, na roto i te Vaerua, ki te au ereta o tana akonoanga, e kia uriuri kapiti tatou, kia mārama oki kotou;

11 Kia uriuri tatou mei te tu o tetai nga tangata e uriuri tuatua ra tetai ki tetai, te mata e te mata.

12 I teianei, me uriuri manako tetai tangata ka māramaia mai aia e te tangata, no te mea te uriuri ra aia mei ta te tangata rai; e ka pera katoa au, ko te Atu, ka uriuri atu au kia kotou kia mārama oki kotou.

13 No reira, te ui atu nei au ko te Atu i teia uianga—no te aa kotou i akataongaiaʼi?

14 Kia tutu i taku evangelia ma te Vaerua, koia te Akapumaana tei tonoia atu kia apii i te tuatua-mou.

15 Ei reira, i ariki ei kotou i tetai au vaerua tei kore rava kotou i mārama, e kua ariki kotou ia ratou e mei ko mai i te Atua; e kua tika ainei ta kotou i manako?

16 I na, ka pau mai kotou uaorai i teia au uianga; noatu oki te reira, e ka aroa atu rai au ia kotou; e ko tei apikepike i rotopu ia kotou na ka akamaroiroiia aia.

17 Tika tikai taku e karanga atu kia kotou, ko tei akataongaia e au ra e tei tonoia atu kia ako i te reo o te tuatua-mou na roto i te Akapumaana, i roto i te Vaerua o te tuatua-mou, ka tutu ainei aia i reira na roto i te Vaerua a te tuatua-mou, me na roto i tetai ravenga ke?

18 E mei te mea e ka na tetai ravenga ke atu, kare ïa e na te Atua.

19 E i na, ko tei ariki i te reo o te tuatua-mou, kua ariki ainei aia i te reira mei ko mai i te Vaerua o te tuatua-mou, me na roto i tetai ravenga ke?

20 Mei te mea e na tetai ravenga ke atu, kare ïa e na te Atua.

21 No reira, eaa i kore ei kotou e mārama ma te kite, e koia tei ariki i te tuatua na roto i te Vaerua o te tuatua-mou, kua ariki aia i te reira mei tei akoia mai e te Vaerua o te tuatua-mou ra?

22 No reira, koia tei ako atu e koia tei ariki mai, kua mārama raua tetai e tetai, e kua puapinga e kua mataora kapiti oki raua.

23 E ko te au mea te kare e riro mai ei meitaki, kare ïa e no te Atua, e poiri oki ïa.

24 Ko to ko mai i te Atua, e mārama ïa; e ko tei ariki mai i te mārama, e rave tamou uatu rai i ta te Atua, ka maata mai tona mārama; e ko taua mārama ra ka maata atu ïa e tae uatu ki te rā apakore.

25 E pera katoa, tika tikai taku e karanga atu kia kotou, e naku e tuatua atu nei kia kite kotou i te tuatua-mou, e kia rauka oki ia kotou i te tuaru atu i te poiri mei rotopu atu ia kotou;

26 Koia tei akataongaia e te Atua e kua tonoia atu, koia rai ïa tei ikiia ei ngateitei maata, noatu e koia te mea meangiti e te tavini o te katoatoa rava.

27 No reira, nona te au mea katoatoa; e nana e akaaere i te au mea katoatoa, i te rangi e te ao katoa nei, te ora e te mārama, te Vaerua e te mana, tei tukuia mai e te Metua na roto ia Iesu Mesia, tana Tamaiti.

28 I na ra, kare rava e tangata e rauka iaia te au mea katoatoa mari ua ra kia tiamā aia, e kua tamāia mei te au ara katoatoa.

29 E me tiamā kotou e kua tamāia mei te au ara ravarai, ka rauka ia kotou i te pati, noatu eaa ta kotou e anoano na roto i te ingoa o Iesu Mesia, e ka rauka te reira.

30 I na ra, e akamaara i teia, ka orongaia atu kia kotou i ta kotou ka pati; no te mea kua ikiia kotou ei akaaere, e na kotou e akaaere i te au vaerua katoatoa.

31 No reira, ka tae akera, e me kite akera kotou i tetai vaerua e kare kotou e mārama, e kare oki kotou i ariki atu i taua vaerua ra, ka pati atu kotou ki te Metua na roto i te ingoa o Iesu; e me kare aia e oronga atu i taua vaerua ra kia kotou, ka kite kotou i reira e kare e na te Atua.

32 E ka orongaia atu kia kotou te mana ki rungaʼo i taua vaerua ra; e ka patoi atu kotou i taua vaerua ra ma te reo maata i te na ko anga e kare e na te Atua—

33 Auraka e na roto i te akaapaapaanga akakino, kia kore oki to reira e autu ki rungaʼo ia kotou, auraka katoa ma te akaparau e ma te rekarekaanga, ko te peke atu kotou ki te reira.

34 Ko tei arikiia mai mei ko mai i te Atua, e akakite rai aia e na te Atua te reira; kia rekareka aia no te mea kua tau aia i te Atua kia ariki i teia orongaanga.

35 E na roto i te uapouanga e te rave katoa anga i teia au mea nei tei rauka ia kotou, e pera te au mea ta kotou ka rauka a muri atu—e kua oronga mai te Metua i te basileia kia kotou, e te mana kia autu ki rungaʼo i te au mea katoatoa tei kore i ikiia e ïa—

36 E i na, tika tikai taku e karanga atu kia kotou, kia akameitakiia kotou e akarongo mai nei i taku au tuatua mei roto mai i te vaa o taku tavini, e kua akakoreia ta kotou au ara.

37 E tuku i taku tavini ia Joeph Wakefield, ko taku i mareka rava, e i taku tavini ia Parley P. Pratt, kia aere atu ki rotopu i te au akonoanga ma te akamaroiroi atu ia ratou na roto i te tuatua akoanga;

38 E pera katoa taku tavini ko John Covill, e pera katoa ki te maataanga o taku au tavini ravarai tei akataongaia ki teia taonga, kia angaanga ratou ki roto i te kainga vine; e auraka rava oki e tangata e patoi atu ia ratou i te raveanga i taku i akataka ia ratou kia rave—

39 No reira, i roto i teia au mea nei, kare taku tavini a Edward Partridge i tau; e kareka ra, kia tataraara e ka akakoreia mai tana ara.

40 I na, e au tamariki meariki ua kotou e kare e tika ia kotou i te akakoromaki i te au mea katoatoa i teianei; kia tupu ra kotou i roto i te aroa ua e te kite o te tuatua-mou.

41 Auraka e mataku, e taku au tamariki meariki, naku oki kotou, e kua autu au i te ao nei, e ko kotou tetai o ratou ta toku Metua i oronga mai;

42 E kare rava tetai o ratou ta toku Metua i oronga mai e ngaro.

43 Ko te Metua oki e au, okotai ïa maua. Tei roto oki au i te Metua, e tei roto te Metua iaku; e mei te mea e kua ariki mai kotou iaku, tei roto ïa kotou iaku e au i roto ia kotou.

44 No reira, tei rotopu au ia kotou, e ko au te tiaki mamoe meitaki, e te toka o Iseraela. Ko tei patuaia ki runga i teia toka, kare rava ïa e inga.

45 E ka tae mai te rā e rongo ei kotou i toku nei reo, e kite mai ei iaku, e kite ei e ko au tikai teia.

46 Kia matakite, e kia noo teateamamao kotou. Koia ïa. Amene.