Tuanga 69
Te eeuanga tei orongaia mai na roto ia Iosepha Timeti te Peroveta, i Hiram, Ohio, Noema 1831 (History of the Church, 1:234–235). Kua akatikaia te putuputuanga o te au eeuanga, tei akakoroia no te nenei vave anga ia i roto i te uipaanga maata i te rā 1 o Noema. I te rā 3 o Noema, ko te eeuanga tei kiteaia mai e ko te Tuanga 133, kua topiriia te reira ki roto i te puka ei tataanga openga. Na roto i te raveanga o te uipaanga maata, kua akatakaia a Oliver Cowdery kia apai i te tataanga o te eeuanga e te au akaueanga ki Independence, Missouri, kia neneiia. Ka apai katoa oki aia i tetai moni tei orongaia mai ei akatupu i te Akonoanga i Missouri. No te ka aere aia na roto i te enua tei kore i maata te tangata e noo ana ki reira e tae atu ki te kotinga o te enua, kua anoanoia tetai tokorua nona.
1–2, Kia aru kapiti a John Whitmer ia Oliver Cowdery ki Missouri; 3–8, Kia ako katoa aia e kia akaputuputu, akapapa e te tata i te au tua e tupu nei.
1 E akarongo mai kiaku, te tuatua maira te Atu to kotou Atua, ei meitaki no taku tavini ko Oliver Cowdery. Kare oki i tau i roto iaku kia apai aia i te au akaueanga e te moni tana ka apai atu ki te enua ko Ziona, mari ua ra kia aru tetai iaia tei tu tika e te akarongo katoa.
2 No reira, te anoano nei au ko te Atu, kia aere taku tavini ko John Whitmer ma taku tavini ko Oliver Cowdery;
3 E kia tata uatu rai aia ma te maani i te tua o te au mea puapinga katoatoa tana ka akara e ka kite no runga i taku akonoanga;
4 E pera katoa kia rauka mai oki te akamārama e te tauturu mei ko mai i taku tavini ko Oliver Cowdery, e tetai atu.
5 E pera katoa, ki taku au tavini i runga i te tua o te enua nei, kia tuku mai oki ratou i te tuatua o to ratou tuanga angaanga ki te enua ko Ziona;
6 No te mea ko te enua ko Ziona, ka riro ïa ei nooanga, e ei ngai ariki mai e te rave katoa i teia au mea ravarai.
7 Kareka ra, ka aere taku tavini ko John Whitmer i te au taime e manganui, mei tetai ngai ki tetai ngai, e mei tetai akonoanga ki tetai akonoanga, kia rauka ngoie ua tona kite e kia maata katoa—
8 I te akoanga, e te akakiteanga, te tataanga, te kapianga, te ikianga, e te arikianga mai i te au mea ravarai te ka riro ei meitaki no te akonoanga, e no te au uki te ka tupu mai ki runga i te enua ko Ziona, kia noo ei mei tetai uki ki tetai uki, e tuatau e tuatau uatu. Amene.