Tuanga 67
Te eeuanga tei orongaia mai na roto ia Iosepha Timeti te Peroveta, i Hiram, Ohio, Noema 1831 (History of the Church, 1:224–225). Ko te akakoroanga, koia oki tetai uipaanga maata, e ko te neneiangaia o teia au eeuanga tei ariki takere ia mai mei ko i te Atu na roto i te Peroveta, e kua tamanakoia e kua raveia (akara i te upoko o te Tuanga 1). Kua tamanakoia e kia apai atu a Oliver Cowdery e John Whitmer i te au tataanga rima o te au eeuanga ki Independence, i reira a W. W. Phelps ka nenei ei ko te “Puka o te au Akaueanga.” E manganui oki te au taeake tei akapapu i to ratou au kite e ko te au eeuanga tei akaputuia no te nenei atu, kua tika tikai te reira, mei tei akakiteia mai kia ratou e te Vaerua Tapu ko tei noo ki rungaʼo ia ratou. Kua tata te Peroveta e i muri ake i te arikiangaia mai o te Tuanga 1, kua rauka mai tetai au tuatua akavaavaa no runga i te reo tei taangaangaia i roto i te au eeuanga. Ko teia te eeuanga tei aru mai.
1–3, Ka akarongo te Atu i te au pure e ka akara mai i rungaʼo i te au ereta; 4–9, Ka timata aia i te tangata kite pakari kia akaaite mei tana eeuanga meangiti; 10–14, Ka akaoraia te au ereta akarongo maata e te Vaerua kia kite i te mata o te Atua.
1 I na, e akarongo mai, e te au ereta o taku akonoanga, tei akaputuputu mai ia kotou ki te ngai okotai, kua akarongo oki au i ta kotou au pure, e kua kite oki au i to kotou ngakau, e kua tae mai oki to kotou anoano ki mua iaku.
2 I na e i na ra, tei runga toku nga mata ia kotou, e tei roto oki te enua nei e te rangi katoa i toku nei rima, e ko te apinga nui o te mutukore, naku te reira e oronga atu.
3 Kua tauta kotou kia irinaki e ka rauka ia kotou te akameitakianga tei tukuia atu kia kotou; e i na ra, tika tikai taku e karanga atu kia kotou kua vai te mataku i roto i to kotou ngakau, e no reira tikai i kore ei i rauka ia kotou.
4 E teianei, te oronga atu nei au, ko te Atu, i te kite papu kia kotou no runga i te tika o teia au akaueanga e vai nei i mua ia kotou.
5 Tei runga oki to kotou mata i taku tavini ia Iosepha Timeti, Tamaiti, e kua kite oki kotou i tona reo, e kua kite oki kotou i tona au tarevakē; e kua kimi kotou i roto i to kotou uaorai ngakau i te kite kia takarape mai i tona reo; kua kite katoa kotou i te reira.
6 E teianei, e kimi kotou ki roto i te Puka o te au Akaueanga, i te mea meangiti rava atu i roto i te reira, e ma te iki atu iaia ko tei pakari atu i rotopu ia kotou;
7 E me kore, me te vai ra tetai i rotopu ia kotou te ka rauka kia aite atu mei te reira rai te tu, kua tau i reira ia kotou kia karanga e kare kotou i kite e kua tika te reira;
8 I na ra, me kare e rauka ia kotou i te tata tetai kia aite kiaia, tei raro kotou i te akaapaanga me kare kotou e akakite atu e kua tika ratou.
9 Kua kite oki kotou e kare rava e mea tika kore i roto ia ratou, e ko te au mea tika, no runga mai te reira, mei ko mai i te Metua o te au mārama.
10 E pera katoa, tika tikai taku e karanga atu kia kotou e ko to kotou tikaanga teia, e te oronga atu nei au i tetai taputouanga kia kotou tei akataongaia ki teia angaanga nei, mei te mea e ka akaatea mai kotou ia kotou mei te vareae e te mataku, ma te taakaaka ia kotou uaorai ki mua iaku, no te mea kare i rava meitaki to kotou taakaakaanga, ka veveteia i reira te arai e ka kite mai kotou i reira iaku, e ka kite kotou e ko au teia—kare na roto i te manako tangata ua nei, eiaa katoa i te manako natura, na roto ra i te manako vaerua.
11 No te mea, kare rava e tangata i kite ana i te Atua i tetai uatu taime i te kopapa nei, mari ra kia akakeuia e te Vaerua o te Atua.
12 E kare katoa oki e tangata natura ua nei e mou ki mua i te aroaro o te Atua, kare katoa na te manako ua nei.
13 Kare oki kotou e rauka kia noo ki mua i te aroaro o te Atua i teianei, kare katoa i te matuapuruanga o te au angela; no reira, ei akakoromakianga roa to kotou, kia apakore rava kotou.
14 Auraka oki to kotou manako e oki ki muri; e me tau ake kotou, i te tuatau e tau iaku, ka kite oki kotou i tei tukuia atu ki rungaʼo ia kotou e taku tavini ko Iosepha Timeti, Tamaiti, Amene.