1 Tika tikai, te tuatua maira te Atu: Ka tae akera e ko te au tangata te ka akaruke i ta ratou au ara e ka aere mai kiaku nei, e kua kapiki i toku ingoa, e kua kauraro i toku reo, e kua akono i taku au akaueanga, ka kite ratou i toku mata, ka kite ratou e te vai nei au;

2 E ko au taua mārama tika ra te ka turama i te tangata katoatoa te ka aere mai ki te ao nei;

3 E tei roto au i te Metua, e tei roto te Metua iaku, e ko te Metua e au e okotai ïa—

4 Ko te Metua no te mea kua oronga mai aia i tona kīanga kiaku, e te Tamaiti no te mea tei roto au i te ao nei e kua anga i te kopapa ei puakapa noku, e kua noo ki rotopu i te au tamaiti a te tangata nei.

5 No roto ana au i te ao nei e kua arikiia e toku Metua, e te au angaanga nana ra e māramarama ua te akakiteangaia mai.

6 Kua akara oki a Ioane e kua akapapu i te kīanga o toku kakā, e ko te katoaanga o te akapapaanga a Ioane ka eeuia te reira a muri ake.

7 E kua akapapu maira aia, na ko maira: Kua kite au i tona kakā, e i vai ana aia i te kapuaanga, i mua ake i te ao nei;

8 No reira, i vai ana te Logo i muatangana ra, e koia oki te Logo, koia te karere o te akaoraanga—

9 Te mārama e te Akaora o te ao; te Vaerua o te tuatua-mou, tei aere mai ki te ao nei, no te mea nana i anga i te ao, e tei roto iaia te ora o te tangata nei e te mārama o te tangata nei.

10 Nana i anga i te au ao; nana i anga i te tangata nei; kua angaia te au mea ravarai e ïa, e na roto iaia, e iaia anake.

11 E ko au, ko Ioane, te akakite papu nei au e kua kite au i tona kakā, mei te kakā o te Tamaiti Anau Tai a te Metua ra, tei kī i te aroa ua e te tuatua-mou, koia te Vaerua o te tuatua-mou, tei aere mai e kua noo i te kopapa nei, e kua noo ki rotopu ia tatou.

12 E kua kite oki au, ko Ioane, e kare i rauka iaia te kīanga i te akamataanga, i na ra kua rauka iaia te aroa ua e te aroa ua;

13 Kare i rauka ana iaia te kīanga i mua na, kareka kua tupu aia mei te aroa ua ki te aroa ua, e rauka uatu iaia te kīanga;

14 No reira aia i karangaiaʼi e e Tamaiti na te Atua, no te mea kare i rauka ana iaia te kīanga i te akamataanga.

15 E te akakite papu nei au ko Ioane, e i na, e kua tuera mai te rangi, e kua eke mai te Vaerua Tapu ki rungaʼo iaia mei te tu rai o te kukupa, e kua noo ki rungaʼo iaia, e kua mama maira te reo no te rangi mai i te na ko anga e: Ko taku Tamaiti akaperepere teia.

16 E te akakite papu nei au, ko Ioane, e kua rauka iaia te kīanga o te kakā o te Metua;

17 E kua rauka iaia te au mana katoatoa, to te rangi e to te enua, e tei aia te kakā o te Metua, no te mea te noo ra aia ki roto iaia.

18 E ka tae akera, e me e tu akarongo mou toou ka rauka ake ia koe te kīanga o te tataanga a Ioane.

19 Te oronga atu nei au kia kotou i teia ikuikuanga ei mārama no kotou e kia kite kotou e ka naea te akamorianga, e kia kite e eaa ta kotou e akamori ra, e raukaʼi kia aere mai kotou ki te Metua na roto i toku ingoa, i te tuatau tau kia rauka oki tona kīanga.

20 Me akono kotou i taku au akaueanga, ka rauka ia kotou tona kīanga, e ka akakakāia i roto iaku e mei iaku i roto i te Metua; no reira, te tuatua atu nei au kia kotou, ka rauka ia kotou te aroa ua e te aroa ua.

21 E teianei, tika tikai taku e karanga atu nei kia kotou, i vai ana au i muatangana ki te Metua ra, e ko au te Tama Mua;

22 E pouroa te aronga tei anauia na roto iaku, ka rauka katoa ia ratou taua kakā ra, e ko ratou oki te akonoanga a te Tama Mua.

23 I vai ana oki kotou i muatangana ra i te Metua ra; koia oki ko te Vaerua, taua Vaerua o te tuatua-mou;

24 E ko te tuatua-mou ko te kite ïa o te au mea o teia nei, e mei mua mai, e te ka aere mai;

25 E ko tetai uatu i maata atu me kore ra i meangiti mai ko te reira tikai te vaerua o taua tangata kino ra koia te tangata pikipikikaa mei muatangana mai.

26 Ko te Vaerua o te tuatuamou no te Atua ïa. Ko au te Vaerua o te tuatua-mou, e kua akakite mai te tataanga a Ioane noku nei, i te na ko anga e: Kua rauka iaia te kīanga o te tuatuamou, ae, koia ïa, o te au tuatuamou katoatoa;

27 E kare rava atu e rauka i tetai tangata te kīanga mari ua ra kia akono aia i tana au akaueanga.

28 Koia te ka akono i tana au akaueanga kua ariki aia i te tuatua-mou e te mārama, e tae uatu ki tona akakakāangaia na roto i te tuatua-mou e kua kite i te au mea katoatoa.

29 I vai ana oki te tangata i muatangana i te Atua ra. Ko te kite, me kore ra ko te mārama o te tuatua-mou, kare oki te reira i te mea angaia me kore i te mea maaniia, e kare katoa ïa e rauka.

30 Ko te au tuatua-mou katoatoa e tuanga tatakake to ratou i te turanga ta te Atua i tuku atu, kia angaanga nona uaorai, mei te au kite katoa; me kare e pera, kare rava ïa e vai.

31 I na, ko teia te tikaanga iki o te tangata, e ko teia te akaapaanga o te tangata; no te mea ko te au mea mei muatangana mai kua akaari meitaki ia atu kia ratou, e kare ratou i ariki mai i te mārama.

32 E ko te au tangata katoatoa e kare to ratou vaerua e ariki i te mārama tei raro ake ïa i te akaapaanga.

33 E vaerua oki te tangata. Ko te au mea i angaiaʼi te rangi e te enua nei, e mea openga kore te reira, e ko te vaerua e taua au mea ra, e pirianga okotai ia, e raukaʼi te kīanga o te rekareka;

34 E me akatakakeia, kare e rauka i te tangata te kīanga o te rekareka.

35 Ko taua au mea ra ko ratou te nao o te Atua; ae, ko te tangata te nao o te Atua, e au iero; e ko tetai uatu iero te ka taviiviiia, ka takore te Atua i te reira iero.

36 Ko te kakā o te Atua ko te kite ïa, me kore ra, ka tuatuaia, ko te mārama e te tuatua-mou.

37 Ko te mārama e te tuatuamou ka akaruke i taua tangata kino ra.

38 E mea tiamā te au vaerua tangata i muatangana; e kia akatu mai te Atua i te tangata mei te ingaanga, kua riro akaou mai te au tangata, i roto i to ratou tu tamariki, ei mea tiamā i mua i te aroaro o te Atua.

39 E ko taua tangata kino ra ka aere mai e ka apai ke atu i te mārama e te tuatua-mou, na roto i te kauraro kore, mei ko mai i te au tamariki a te tangata nei, no te au peu a to ratou au ui tupuna.

40 I na ra kua akaue atu au kia kotou kia angai i ta kotou au tamariki i roto i te mārama e te tuatua-mou.

41 I na ra tika tikai taku e tuatua atu kia koe, e taku tavini e Frederick G. Williams, e kua aere ua rai koe ki raro ake i teia akaapaanga;

42 Kare koe i apii i taau au tamariki i te mārama e te tuatuamou, kia tau ki te au akaueanga; e e mana oki to taua tangata kino ra, i teianei, i rungaʼo ia koe, e ko teia oki te tumu o toou tumatetenga.

43 E teianei ka oronga atu au i tetai akaueanga kia koe—me ka akaoraia koe kia akatano i toou uaorai ngutuare, e maata oki te au mea te kare i tano i roto i toou ngutuare.

44 Tika tikai, te tuatua atu nei au ki taku tavini ko Sidney Rigdon, e i roto i tetai au mea kare aia i akono i te au akaueanga no runga i tana au tamariki; e no reira, na mua koe i te akatano i toou ngutuare.

45 Tika tikai, te tuatua atu nei au ki taku tavini kia Iosepha Timeti, Tamaiti, me kore ra, ka kapiki au ia kotou ei au oa, no te mea e au oa kotou noku, e e nooanga ipukarea to kotou iaku nei—

46 Kua kapiki au ia kotou ei au tavini no te ao nei, e ko kotou oki to ratou au tavini noku nei—

47 E teianei, tika tikai te tuatua atu nei au kia Iosepha Timeti, Tamaiti—Kare koe i akono i te au akaueanga, e ka anoanoia koe kia akoia ki mua i te aroaro o te Atu;

48 Ka anoanoia toou ngutuare tangata kia tataraara e kia akaruke i tetai au mea, e kia akarongo meitaki atu ki taau au tuatua, me kore ra ka akaateaia atu ki vao i to ratou ngai.

49 Ko taku ka tuatua atu ki e tai ka tuatua au ki te katoatoa; e pure putuputu ko te mana mai taua tangata kino ra i roto ia koe, e ka akaatea atu ia koe ki vao i toou ngai.

50 Ko taku tavini ko Newel K. Whitney katoa, e episekopo o taku akonoanga, ka anoano katoa ia kia akoia, e kia akatano i tona ngutuare tangata, e kia akara e kia maata atu to ratou maroiroi e te manako ki te ngutuare, ma te pure putuputu, ko te akaateaia ratou ki vao i to ratou ngai.

51 E teianei, te tuatua atu nei au kia kotou, e taku au oa, e tuku i taku tavini ia Sidney Rigdon kia aere ki tona tere, e ma te rapurapu atu, e kia akakite i te mataiti tei arikiia o te Atu, e te evangelia o te akaoraanga, mei taku ka oronga atu kiaia i te tuatua; e na roto i ta kotou pure o te akarongo ma te tika okotai ka turu au iaia.

52 E ko taku nga tavini ia Iosepha Timeti, Tamaiti, e Frederick G. Williams kia aere viviki katoa atu, e ka orongaia atu kia raua kia tau i te pure o te akarongo; e mei ta korua e akono i taku au tuatuaanga kare korua i reira e taakamaia i roto i teia ao, kare katoa i roto i te ao te ka aere mai.

53 E, tika tikai taku e karanga atu nei kia koe, e ko toku anoano teia e akaviviki koe i te akauri i taku au irava tapu, e kia rauka te kite o te au tupuanga e te au tua, e to te au enua, e te au basileia, o te au ture a te Atua e te tangata, e ko teia au mea no te akaoraanga o Ziona. Amene.