1 Ei topiri i te kite papu o teia puka nei e to te Puka a Momoni, te akakite atu nei matou i te tāiaanga o Iosepha Timeti te Peroveta, e Hyrum Smith te Pateriarika. Kua puiaia raua i roto i te are auri i Carthage i te rā 27 o Tiunu, 1844 i te ora rima i te aiai, e tetai pupu tangata kino—peiniia ki te kerekere—mei te 150 ki te 200 tangata o taua pupu ra. Ko Hyrum te mea mua i puiaia, e topa atura ki raro, ma te na ko anga e: E tangata mate au! Kua rere maira a Iotepa mei ko mai i te māramarama, e puia maira kia mate, e kua na ko akera aia e: E te Atu taku Atua! Kua puiaia raua i muri ake i to raua mateanga, e mea rikarika tikai, e ā oki o raua puta.

2 Ko John Taylor e Willard Richards, ko nga tokorua o te Tino Ngauru Ma Rua, te nga tangata anake i roto i taua pia ra i taua taime ra; kua puia katoa te mea mua e ā puta i taua tu rikarika ra, kua ora mai ra; e ko to muri mai kua ora na roto i te aroa ua o te Atua, e kare okotai puta i roto i tona kakau.

3 E angaanga maata tikai ta Iosepha Timeti te Peroveta e te Akara o te Atu i rave, e kare atu, mari ua ko Iesu, ko tei rave i te angaanga no te akaoraanga o te tangata i te ao nei, e maata atu oki tana i rave i ta tetai uatu tangata tei noo ana i te ao nei. I roto i teia tuatau poto ua e rua ngauru mataiti, kua rauka iaia kia akaoki mai i te Puka a Momoni tei akauriia oki e ïa na roto i te orongaanga ua e te mana o te Atua, e na roto i teia i tae ei teia neneianga ki runga i nga enua e rua; e kua akaoki mai i te kīanga o te evangelia mutukore, tei tae ki nga pore e ā o te ao nei, ko tei akaoki mai i te eeuanga e te au akaueanga koia teia puka nei ko te Apiianga e te Au Koreromotu, e te au pepa pakari e te au akamāramaanga ei meitaki no te tamariki a te tangata nei; e ko tei akaputuputu i te tauatinianga o te Aronga Tapu i te Au Rā i Muri Nei, e tei akatupu mai i tetai oire maata, e kua akaruke mai oki i tetai tuatua rongonui e te ingoa te ka kore rava e tamateia. E oraanga ngateitei tona, e mateanga ngateitei katoa tona i roto i te mata o te Atua e tona iti tangata; e mei te maataanga oki o to te Atua aronga akatainuia i taito, kua topiri i tana angaanga evangelia e tana angaanga katoa ki tona uaorai toto; e kua pera katoa tona tuakana ko Hyrum. Kare rava raua i takake ana i to raua oraanga, e kare katoa oki raua i takake i te mateanga!

4 I to Iosepha aereanga atu ki Carthage kia oronga atu iaia uaorai ki te au tikaanga tika kore o te ture, e rua me kore ra e toru rā i mua ake ka puiaiaʼi aia teia tana i tuatua atu: “Te aere nei au mei te mamoe ki te ngai tā anga, i na ra, kua aite tikai au ki tetai popongi maanaana te maru; e kare o toku ngakau apaanga ki te Atua, e ki te au tangata katoatoa nei. Ka mate au ma te apakore, e ka tuatuaia au e—kua tāia oraora ua ia aia.”—I taua popongi rai, i muri ake i to Hyrum teateamamaoanga no te aere—Ka karangaia ainei e ki te ngai tāanga? Ae, koia mou—kua tatau oki aia i teia irava nei i vaitata atu ki te openga o te pene tai ngauru ma rua o te puka a Etera, i roto i te Puka a Momoni, e kua uri atura i taua kapi ra ki raro:

5 E, kua pure atura au ki te Atu kia oronga mai i te aroa ua ki te Etene, kia rauka ia ratou te aroa. E kua na ko maira te Atu kiaku nei: Me kare o ratou aroa, auraka koe e manamanata, kua akarongo meitaki koe e kua mā toou kakau. E no te mea, kua kite koe i toou paruparu, ka riro koe ei mea pakari, e ka noo oki koe i te ngai taku i akapapa i roto i te are o toku Metua ra. E teianei, te tuatua nei au ki te Etene; kia orana, ae, e ki toku au taeake taku i aroa, e kia aravei akaou tatou ki mua i te akavaanga o te Mesia, ei reira e kite ei te au tangata katoatoa e, e kare toku kakau i tou i to kotou toto. Kua mate teia nga tangata nei, e kua pakari tikai oki to raua kiteanga papu.

6 E ā ngauru ma ā oki o Hyrum Smith mataiti i roto ia Peperuare 1844, e ko Iosepha Timeti, e toru ngauru ma varu ona i roto ia Titema, 1843; e ka vai oki to raua ingoa mei reira atu ki roto i te akapapaanga o te aronga i tāia no te evangelia; e ka akamaaraia rai oki te au tangata te ka tatau i roto i te au iti tangata e ko te Puka a Momoni e teia puka ko te Apiianga e te Au Koreromotu o te akonoanga nei, kua okoia mai te reira e te toto puapinga rava atu o te anereanga mataiti tai ngauru ma iva, tei oronga mai i te akaoraanga no teia ao kino nei; e me ka rauka oki te aʼi i te takino atu i tetai pu rakau mata no te kakā ua nei o te Atua, e ka ngoie ua oki te au pu rakau maro kia kā kia tamā atu i te kainga vine i te viivii. I ora raua no te kakā, e kua mate raua no te kakā; e ko te kakā oki ta raua tutaki mutukore. E ka vai oki to raua ingoa i roto i te au uki no te au uanga ei poe ki tei akatapuia.

7 Kare oki raua i apa ana mei tei akapapuia i roto i to raua au akaapaanga i mua ana, e kua topiriia atu raua ki roto i te are auri na roto i te akakoro kino a te aronga kino e te aronga pikikaa; e kua riro oki to raua toto ara kore i runga i te taʼua o te are auri ko Carthage ei topirianga atea i runga i te akonoanga “Momoni” e kare rava e rauka i tetai akavaanga i te ao nei kia patoi atu, e ko to raua toto ara kore i runga i te ngai akamaaraanga o te Enua o Illinois, e te taputou o taua Enua tei aatiia, koia tei taputouia e te kavana, kua akapapu mai e kua tika te evangelia mutukore te kare rava e rauka i te ao nei kia akatarevakē; e kua riro to raua toto ara kore mei te tou i runga i te reva o te au, e i runga katoa i te magna charta o Marike, ei karere no te evangelia a Iesu Mesia, e ka amiri i te au ngakau o te au tangata tiratiratū i roto i te au enua katoatoa; e ko to raua toto ara kore, e te toto ara kore o te katoatoa tei tāia i raro i te atarau ta Ioane i kite, ka pati akatenga mai ki te Atu o te katoatoa e tae uatu ki tona akaokoanga i taua toto ra i runga i te enua nei. Amene.