1 Ko te tupuanga o te Akonoanga a te Mesia i teia au rā openga nei, ko te mataiti tai tauatini e varu anere e toru ngauru teia mei te taeanga mai o to tatou Atu ko te Akaora ia Iesu Mesia i te kopapa nei, e kua akatumuia oki ma te akatinamouia kia tau oki ki te au ture o to tatou enua, na roto i te anoano e te au akaueanga a te Atua, i te marama ā, i te ono o te rā i te marama ia Aperira—

2 E kua orongaia atu te reira au akaueanga kia Iosepha Timeti, Tamaiti, ko tei kapikiia e te Atua, e tei akataongaia ei aposetolo na Iesu Mesia, kia riro oki e koia te ereta mua o teia akonoanga;

3 E kia Oliver Cowdery oki tei kapiki katoa ia rai aia e te Atua, ei aposetolo na Iesu Mesia, kia riro oki e koia te rua o te ereta o teia akonoanga, e kua akataongaia oki i raro ake i tona rima;

4 Kua tupu oki teia kia tau ki te aroa ua o to tatou Atu ko te Akaora ko Iesu Mesia, e tei aia oki te kakā katoatoa, i teianei e tuatau uatu. Amene.

5 I muri ake i akakiteia mai ei ki teia ereta mua e kua rauka iaia te akakoreanga o tana au ara, kua taii akaou aia ki roto i te puapinga kore o te ao nei;

6 I na ra, i muri ake i te tataraaraanga, e te taakaakaanga iaia ma te tika tikai, na roto i te akarongo, kua matuapuru te Atua iaia na roto i tetai angela tapu, e mei te uira rai tona tu, e ko tona kakau e tiamā tikai te reira e te teatea atu i te au mea teatea katoatoa;

7 E kua oronga atu kiaia i te au akaueanga tei riro ei akanauru iaia;

8 E kua oronga mai i te mana kiaia mei runga mai, i te au mea tei akonokonoia takere i mua ake, no te akaurianga i te Puka a Momoni;

9 Tei roto oki i reira tetai akapapaanga o tetai iti tangata tei topa, e ko te kīanga o te evangelia a Iesu Mesia ki te Etene e te ngati Iuda katoa;

10 Ko tei orongaia mai na roto i te akauruanga, e kua akatinamouia oki ki etai ke na roto i te matuapuruanga angela, e na ratou oki i akakite ki to te ao nei—

11 I te akapapuanga atu ki to te ao nei e kua tika te au irava tapu nei, e ka akauru mai rai oki te Atua i te tangata e ma te kapiki ia ratou ki tana angaanga tapu i roto i teia tuatau e teia uki nei, e pera katoa i te au uki tangata i taito;

12 E na teia mataara e akaari mai ei aia e okotai rai o te Atua tu, i nanai, i teia rā, e tuatau uatu. Amene.

13 No reira, e maata oki te au kite, e na ratou oki e akava i to te ao nei, e pera katoa i to muringake me kite ake ratou i teia angaanga.

14 E ko tei ariki i te reira na roto i te akarongo, e ma te angaanga i te tuatua-tika, ka rauka ia ratou te korona o te ora mutukore;

15 I na ra, ko tei akaketaketa i to ratou ngakau ma te kore e irinaki, e ma te patoi atu i te reira, ka riro te reira ei akaapa ia ratou—

16 No te mea na te Atu oki ko te Atua i tuatua mai i te reira; e ko matou, ko te au ereta o te akonoanga, kua akarongo matou e te akakite papu nei matou i te kite o te tuatua a te Ariki Teitei i te rangi, tei aia te kakā e tuatau e tuatau uatu. Amene.

17 Na roto i teia au mea e kite ei matou e e Atua tetai i te ao ra, e openga kore e te mutukore, mei tupua roa mai e tuatau uatu, e Atua akatuke kore ïa, tei anga i te rangi e te enua nei, e te au mea katoatoa i roto ra;

18 E kua anga aia i te tangata, te tane e te vaine, ki tona tu tikai, e i anga aia ia raua kia aite ki tona uaorai tu;

19 E kua oronga atu i te au akaueanga kia raua kia inangaro iaia ma te tavini iaia, te Atua ora okotai e te tika, e koia anake ta raua ka akamori.

20 I na ra, na roto i te aatianga i teia au ture tapu nei, kua riro mai i reira te tangata nei ei aronga anoano kopapa e te akamori diabolo, e kua inga ïa.

21 No reira, kua oronga mai te Atua Mana Katoatoa i tana Tamaiti Anau Tai, mei tei tataia oki i roto i te irava tapu tei orongaia mai e ïa.

22 Kua akakoromaki aia i te au timataanga, i na ra, kare rava aia i ariu uatu kia ratou.

23 Kua akasatauroia aia, kua mate, e kua tu akaou mai i te toru o te rā;

24 E kua oki atu ki te rangi, kia noo ki te rima katau o te Metua, kia tutara ma te mana katoatoa kia tau ki te anoano o te Metua;

25 E ko ratou ravarai te ka irinaki e ka bapetizoia na roto i tona ingoa tapu, e vai akarongo uatu e tae uatu ki te openga, ka ora ïa—

26 Kare oki e ko ratou anake ua tei irinaki i muri ake i te tuatau i i aere mai ei aia i rotopu tikai i te au tuatau, mari ra ko te aronga katoatoa mei muatangana mai, koia oki ko ratou katoa i mua ake i tona aerenga mai, tei irinaki ki te au tuatua a te au peroveta tapu, tei tuatua i tei akauruia e te orongaanga o te Vaerua Tapu, ko tei akapapu meitaki mai iaia i te au mea katoatoa, ka rauka ïa te ora mutukore,

27 E pera katoa ki te ka aru mai i muringake, ko te ka irinaki i roto i te au orongaanga aroa e te au kapikianga a te Atua na roto i te Vaerua Tapu, ko tei akakite mai i te tuatua o te Metua e te Tamaiti;

28 Ko te Metua oki, te Tamaiti, e te Vaerua Tapu e okotai oki ïa Atua, te openga kore e te mutukore, e kare e opengaanga. Amene.

29 E kua kite oki matou e ka tataraara te au tangata katoatoa e ka irinaki ki te ingoa o Iesu Mesia e tikaʼi ma te akamori i te Metua na roto i tona ingoa, e vai akarongo uatu rai ki tona ra ingoa e tae ki te openga, e me kare, kare ratou e ora i roto i te basileia o te Atua.

30 E kua kite oki matou e ko te akatikaanga na roto mai i te aroa ua o to tatou Atu ko te Akaora ko Iesu Mesia, e mea tika te reira e te tarevakē kore;

31 E kua kite katoa oki matou e, ko te akatapuanga na roto i te aroa ua o to tatou Atu ko te Akaora ko Iesu Mesia, e tika oki te reira e te tarevakē kore, ki te katoatoa rava tei inangaro e tei tavini i te Atua ma to ratou maroiroi katoa, te manako, e te ririnui.

32 I na ra, ka rauka i te tangata kia aere ke mei te aroa ua e ka aere ke mei te Atua ora;

33 No reira, kia matakite te akonoanga ma te pure putuputu uatu rai kia kore ratou e topa ki roto i te au timataanga;

34 Ae, e pera katoa, kia matakite katoa rai tei akatapuia.

35 Te kite nei matou e e tika teia au mea nei, kia tau oki ki te au eeuanga a Ioane, kare e tuatua ke e kapiti iatu, me kore ra, e kiriti ke iatu mei te totou anga o tana puka, te au irava tapu, me kore ra te au eeuanga a te Atua te ka tae mai a muri ake na roto i te orongaanga e te mana o te Vaerua Tapu, te reo o te Atua, me kare ra te matuapuruanga o te au angela.

36 E kua tuatua mai oki te Atu ko te Atua; kia orongaia te akangateitei, te mana e te kakā ki tona ingoa tapu, i teianei e tuatau uatu. Amene.

37 E teianei, ko te akaueanga ki te akonoanga no runga i te ravenga o te bapetizoanga—Ko te aronga katoatoa tei taakaaka ia ratou ki mua i te Atua, e tei anoano kia bapetizoia, e kua aere mai ratou ki mua ma te ati ngakau e te vaerua maru, ei akapapu i mua i te akonoanga e kua tataraara tikai ratou i ta ratou au ara katoatoa, e te inangaro nei oki ratou i te tuku ki rungaʼo ia ratou i te ingoa o Iesu Mesia, ma te inangaro kia kauraro iaia e tae uatu ki te openga, e kua akakite mai tikai oki ratou na roto i ta ratou angaanga e kua rauka ia ratou te Vaerua o te Mesia i te akakoreanga i ta ratou au ara, ka arikiia na roto i te bapetizoanga ki roto i tana akonoanga.

38 Te tuanga angaanga a te au ereta, taunga, puapii, diakono, e te au mema o te akonoanga a te Mesia—Ko te aposetolo e ereta aia, e ko tona kapikianga ïa kia bapetizo;

39 E kia akataonga katoa i tetai au ereta, taunga, puapii e te diakono;

40 E kia akameitaki i te varaoa e te uaina—ko te akaraanga i te kopapa e te toto o te Mesia—

41 E kia akatinamou katoa i tei bapetizoia ki roto i te akonoanga, na roto i te tukuanga rima no te bapetizoanga ki te aʼi e te Vaerua Tapu, kia tau ki te au irava tapu;

42 E kia apii atu, kia akamārama, kia akamaroiroi, kia bapetizo, e kia tiaki katoa i te akonoanga;

43 E kia akatinamou i te akonoanga na roto i te tukuanga rima, e te orongaanga o te Vaerua Tapu;

44 E kia akaaere i te au uipaanga katoatoa.

45 Ka akaaere te au ereta i te au uipaanga, mei tei aratakiia e te Vaerua Tapu, kia tau ki te au akaueanga e te au eeuanga a te Atua.

46 Ko te tuanga angaanga a te taunga, koia oki, kia tutu aere, kia apii, kia akamārama, kia akamaroiroi, e kia bapetizo, e kia akameitaki katoa i te oroa,

47 E kia atoro atu i te ngutuare o te au mema tatakitai, e ma te akamaroiroi ia ratou kia pure muna e ma te reo maata, e kia rave katoa i te au tuanga angaanga katoatoa a te kopu tangata.

48 E ka rauka katoa oki iaia i te akataonga i tetai au taunga, puapii, e te diakono.

49 E tei aia te akaaere i te uipaanga me kare e ereta i reira;

50 I na ra, me e ereta tetai i reira, ka ako ua aia, ka apii, ka akamārama, ka akamaroiroi, e ka bapetizo atu,

51 E kia atoro atu i te ngutuare o te au mema tatakitai, e ma te akamaroiroi ia ratou kia pure muna e ma te reo maata, e kia rave katoa i te au tuanga angaanga katoatoa a te kopu tangata.

52 Ka tauturu oki te taunga i te ereta i roto i teia au angaanga katoatoa me ka inangaroia.

53 Ko te tuanga angaanga a te puapii, koia oki, kia tiaki ua rai i te akonoanga, ma te noo kia ratou e te akamaroiroi atu ia ratou;

54 E kia akara katoa e kare e tarevakē i roto te akonoanga, e kare te kinokino tetai ki tetai, e kare te pikikaa, te urutoe, e kare oki te tuatua kino katoa;

55 E kia akara katoa e te uipaanga putuputu ra te akonoanga, e kia akara katoa e te rave ra te au mema ravarai i ta ratou tuanga angaanga.

56 E nana oki e akaaere i te uipaanga me kare te ereta e te taunga i tae mai—

57 E ka tauturu putuputu oki te au diakono iaia i roto i tana au tuanga angaanga o te akonoanga, me ka inangaroia.

58 Kare ra o te au puapii, me kore ra, te au diakono tikaanga kia bapetizo, kia akameitaki i te oroa, me kare, kia rave i te tukuanga rima;

59 I na ra, ka ako oki ratou ma te akamārama, te akamaroiroi atu, e te apii atu ma te pati katoa atu ki te katoatoa rava kia aere mai ki te Mesia.

60 Ko te au ereta, te au taunga, te au puapii, me kore ra te au diakono, ka akataongaia ratou kia tau ki te orongaanga e te kapikianga a te Atua kiaia; e ka akataongaia aia e te mana o te Vaerua Tapu tei vai ki roto i te tangata tei akataonga iaia.

61 Ko te au ereta o teia akonoanga a te Mesia, ka aravei ratou i roto i tetai uipaanga maata e tai taime i roto i te au marama e toru, e me kore ra mei tetai tuatau ki tetai tuatau, e na te uipaanga maata e akaaere, me kore ra e akataka;

62 Ko te reira au uipaanga maata oki, ka rave i te angaanga a te akonoanga tei tau kia raveia i te reira taime.

63 Ka rauka oki i te au ereta to ratou akatikaanga mei tetai atu au ereta e tikaʼi, na roto i te voutianga a te akonoanga i piri ana ratou, e me kore ra no roto mai i te au uipaanga maata.

64 Ko tetai uatu taunga, puapii, me kore ra diakono tei akataongaia e te taunga, ka rave ratou i tetai pepa akapapu mei ko mai iaia i taua taime, e ko taua pepa akapapuanga ra, me orongaia atu ki te ereta, ka rauka i reira iaia te akatikaanga, te ka akatika iaia kia rave i te au tuanga angaanga o tona kapikianga, me kore ra ka rauka mai ïa iaia mei roto mai i tetai uipaanga maata.

65 Kare rava e tangata e akataongaia ki tetai taonga i roto i teia akonoanga, me e manga rai tetai tei akatumu takere ia, e ma te kare e voutianga a te akonoanga;

66 I na ra, ko te au ereta akaaere, te au episekopo teretere aere, te au konitara teitei, te au taunga teitei, e te au ereta, e tikaanga to ratou kia akataonga, mei te mea e kare e manga o te akonoanga kia rave i tetai voutianga.

67 Ko te au peresideni o te au kautaunga teitei (me kore, e ereta akaaere), te episekopo, te konitara teitei, e te taunga teitei, ka akataongaia ratou na roto i te akaaereanga a te pupu konitara teitei, e me kore ra na roto i te uipaanga maata.

68 Te tuanga angaanga a te au mema i muri ake i to ratou arikiangaia na roto i te bapetizoanga.—Ko te au ereta, me kore ra ko te au taunga, kia rava to ratou taime ei akamārama atu kia ratou i te au mea katoatoa no runga i te akonoanga a te Mesia, kia marama mai ei ratou, i mua ake ka kai ei ratou i te oroa e ka akatinamouiaʼi na roto i te tukuanga rima a te au ereta, mako tau ei te raveangaia o te au mea katoatoa.

69 E ka akaari oki te au mema ki mua i te akonoanga, e ki mua katoa i te au ereta, na roto i to ratou aereanga e te tuatuaanga mei te Atua rai, e kua tau ratou no te reira, e kia vai oki te au angaanga e te akarongo kia tau ki te au irava tapu—i te aereanga ma te tapu tikai ki mua i te Atu.

70 Ko te au mema katoatoa o te akonoanga a te Mesia me e tamariki ta ratou, kia apai atu ia ratou ki mua i te au ereta o te akonoanga, e ka tuku oki ratou i to ratou rima ki rungaʼo ia ratou na roto i te ingoa o Iesu Mesia, e ma te akameitaki atu ia ratou na roto i tona ingoa.

71 Kare rava e tangata e arikiia ki roto i te akonoanga a te Mesia, mari ua ra kua tae tona mataiti no te bapetizo i mua i te Atua, e ka rauka kia tataraara.

72 Ko teia te ravenga tikai o te bapetizoanga te ka raveia kia ratou katoatoa te ka tataraara—

73 Ko te tangata tei kapikiia e te Atua e e mana tona no ko mai ia Iesu Mesia kia bapetizo atu, ka eke raua ko te tangata te ka bapetizoia ki roto i te vai, e ka na ko aia ma te kapiki i tona ingoa e: Kua akamanaia au e Iesu Mesia e te bapetizo nei au ia koe na roto i te ingoa o te Metua, e no te Tamaiti, e no te Vaerua Tapu. Amene.

74 I reira aia ka taruku atu ei iaia ki roto i te vai, e ka tu mai ei ki runga mei raro mai i te vai.

75 E mea tau rava oki kia aravei putuputu te akonoanga kia kai i te varaoa ma te inu katoa i te uaina ei akamaaraanga i te Atu ko Iesu;

76 E na te ereta, me kore ra na te taunga, e akameitaki i te reira; mei teia te tu tana ka rave—ka tuturi aia ma te akonoanga e ka pati ei ki te Metua na roto i te pure akaaka i te na ko anga e:

77 E te Atua, e te Metua Mutukore, te pati atu nei matou kia koe na roto i te ingoa o taau Tamaiti ko Iesu Mesia, kia akameitaki, e kia akatapu mai i teia varaoa nei, no te au vaerua o te aronga katoa te ka rave i te reira, kia kai ratou, ei akamaaraanga i te kopapa o taau Tamaiti, e kia akakite atu ratou kia koe, e te Atua e te Metua Mutukore, e te akatika nei ratou i te tuku mai ki rungaʼo ia ratou i te ingoa o taau Tamaiti, ma te akamaara ua atu rai iaia, ma te akono i tana au akaueanga, tana i tuku mai kia ratou, kia noo ua mai rai tona Vaerua ia ratou. Amene.

78 Ko te tu o te raveanga o te uaina—ka rave aia i te kapu ma te na ko anga e:

79 E te Atua, e te Metua Mutukore, te pati atu nei matou kia koe, na roto i te ingoa o taau Tamaiti ko Iesu Mesia, kia akameitaki e kia akatapu mai i teia uaina nei no te au vaerua o te aronga katoa te ka inu i te reira, e kia rave ratou i te reira, ei akamaaraanga i te toto o taau Tamaiti tei maringi mai no ratou, e kia akakite ratou kia koe, e te Atua e te Metua Mutukore, e te akamaara ua atu rai ratou iaia, e kia noo ua mai rai tona Vaerua ia ratou. Amene.

80 Kia aati tetai mema i te ture o te Akonoanga a te Mesia, me kore ra kia rokoia e te apa, ka raveia mei ta te au irava tapu i akakite mai.

81 Ko te tuanga angaanga a te au manga, i roto i te akonoanga a te Mesia, koia oki, kia tono tetai o to ratou au puapii ki te au uipaanga maata e raveia e te au ereta o te akonoanga,

82 Ma tetai akapapaanga ingoa o te au mema tei kapiti mai ki te akonoanga mei te uipaanga mai i topa; e me kore ra na tetai taunga e apai mai; kia akonoia tetai akapapaanga ingoa tika tikai o te akonoanga katoatoa ki roto i te puka e tetai ereta, e na te au ereta e iki iaia mei tetai tuatau ki tetai tuatau;

83 E pera katoa, me kua oparaia tetai mei te akonoanga, kia tangaro ke ia to ratou ingoa mei roto i te puka ingoa o te akonoanga.

84 Ko te au mema katoatoa ka aere atu ratou ki tetai ngai ke noo ei, e me ka aere atu ratou ki te pure e kare te tangata o reira i kite ia ratou, ka apai ratou i tetai pepa akapapuanga e e au mema tinamou ratou e te turanga meitaki, e ko teia pepa nei kia tainaia e tetai uatu ereta me kore ra te taunga, e me kua kite meitaki teia ereta me kare taunga, i teia mema, me kore ra kia tainaia e te au puapii me kore ra te au diakono o te akonoanga.