Tuanga 18
Te eeuanga kia Iosepha Timeti te Peroveta, kia Oliver Cowdery, e kia David Whitmer, tei orongaia i Fayette, New York, Tiunu 1829 (History of the Church, 1:60–64). I te orongaangaia mai o te Kautaunga o Aarona, kua taputou katoa ia mai te Kautaunga o Melekizedeka. (Akara ki te upoko o te Tuanga 13). No te anoano kia rauka mai tetai kite maata atu i teia, kua oronga mai te Atu i teia eeuanga.
1–5, Kua akaari mai te au irava tapu e ka naea te akatuanga i te Akonoanga; 6–8, Kua kī te ao nei i te viivii maata; 9–16, Ko te puapinga o te vaerua tangata, e mea maata ïa; 17–25, Kia rauka te akaoraanga, ka apai tikai te tangata i te ingoa o te Mesia ki rungaʼo iaia; 26–36, Kua eeuia mai te kapikiangaia o te Tino Ngauru ma Rua e ta ratou angaanga; 37–39, Na Oliver Cowdery e David Whitmer e kimi i te Tino Ngauru ma Rua; 40–47, Kia rauka te akaoraanga, ka tataraara te au tangata, ka bapetizoia, e ka akono i te au akaueanga.
1 I teianei, i na, e taku tavini e Oliver Cowdery, no taua mea taau i anoano i te kite iaku, ko teia taku au tuatua kia koe:
2 I na, kua akakite atu ana au kia koe na taku vaerua e manganui uatu te taime, e ko te au mea tei tataia e koe, e tika te reira; no reira kua kite mai koe e kua tika ïa.
3 E mei te mea e kua kite koe e kua tika, i na, te oronga atu nei au i tetai akaueanga, kia irinaki koe ki te au mea tei tataia;
4 E tei roto oki i te au mea katoatoa tei tataia no te akatumuanga o taku nei akonoanga, taku evangelia, e taku papa.
5 No reira, me ka patu koe i taku akonoanga ki rungaʼo i te tango o taku nei evangelia e taku papa katoa, kare te au ngutupa o ade e autu ki rungaʼo ia koe.
6 I na, kua kī to te ao nei i te ara; e ka akaoriia te tamariki a te tangata nei kia tataraara e tikaʼi, e pera katoa te au Etene e te ngutuare o Iseraela.
7 No reira, i te mea oki e kua bapetizoia koe e te rima o taku tavini ko Iosepha Timeti, Tamaiti, kia tau ki taku i akaue atu kiaia, kua akatupu aia i reira i taku i akaue atu iaia kia rave.
8 I teianei, auraka e poitirere i te mea e kua kapiki au iaia no toku uaorai akakoroanga, ko te akakoroanga oki ïa e vai i roto iaku nei; e no reira, me maroiroi aia i te akonoanga i taku au akaueanga, ka akameitakiia aia ki te ora mutukore; e ko tona ingoa ko Iosepha.
9 I teianei, e Oliver Cowdery, te tuatua atu nei au kia koe, e pera katoa kia David Whitmer, ma te akaueanga; e, i na, te akaue atu nei au ki te au tangata i te au ngai katoatoa kia tataraara, e te tuatua atu nei au kia korua, mei taku rai i tuatua ana kia Paulo taku aposetolo, kua kapikiia koe ki taua kapikianga ra tei kapikiiaʼi aia.
10 E akamaara, kua puapinga rava te au vaerua tangata i mua i te mata o te Atua;
11 E, i na, kua mamae oki to kotou Atu ko te Akaora i te mate o te kopapa nei; e no reira kua apai aia i te mamae o te au tangata katoatoa, kia rauka oki i te tangata i te tataraara e kia aere mai kiaia.
12 E kua tu akaou mai oki aia mei te mate mai, kia rauka oki iaia i te arataki mai i te au tangata katoatoa kiaia na roto i te ravenga o te tataraara.
13 E rekareka maata tikai tona i te tangata te ka tataraara!
14 No reira, kua kapikiia korua kia apii atu i te tataraara ki teia iti tangata.
15 E mei te mea oki e, ka angaanga korua i te au rā katoatoa o to korua oraanga i te akakiteanga atu i te tataraara ki teia iti tangata, e kia apai mai, e okotai uake vaerua kiaku, e rekareka maata tikai to korua ma ïa katoa i roto i te basileia o taku Metua!
16 I teianei, me maata to korua rekareka i te vaerua okotai ta korua i apai mai kiaku ki roto i te basileia o taku Metua, kare e aiteia to korua rekareka maata me manganui uatu te au vaerua ta korua ka arataki mai kiaku!
17 I na, tei mua ia korua taku evangelia, e taku papa, e taku akaoraanga.
18 E pati ki te Metua na roto i toku ingoa ma te akarongo, e ma te irinaki e ka rauka mai ia korua, e i reira ka rauka mai ia korua te Vaerua Tapu, ko te ka akakite mai i te au mea katoatoa tei tau no te tamariki a te tangata nei.
19 E me kare o korua akarongo, te manakonako, e te aroa ua, kare e rauka ia korua i te rave i tetai uatu mea.
20 Auraka e taumaro atu ki tetai uatu akonoanga, mari ua ra ko te akonoanga a te diabolo.
21 E apai ki rungaʼo ia korua i te ingoa o te Mesia, e kia tuatua i te tika ma te akono meitaki.
22 E ko ratou ravarai tei tataraara e kua bapetizoia ki roto i toku ingoa, koia a Iesu Mesia, ma te vai maroiroi uatu rai e tae uatu ki te openga, ka ora ïa.
23 I na, ko Iesu Mesia oki te ingoa ta te Metua i oronga mai, e kare atu e ingoa ke tei orongaia e oraʼi te tangata nei;
24 No reira, kia apai te tangata katoatoa ki rungaʼo ia ratou i te ingoa tei orongaia mai e te Metua e tikaʼi e ka kapikiia oki ratou ki taua ingoa ra a te rā openga;
25 No reira, me kare ratou i kite i te ingoa i kapikiiaʼi ratou, kare o ratou ngai i roto i te basileia o taku Metua.
26 E teianei, te vai ra tetai pae tei kapikiia kia akakite i taku evangelia, ki te Etene e ki te ngati Iuda katoa;
27 Ae, e tino ngauru ma rua; e ko te Tino Ngauru Ma Rua oki taku au pipi, e ka apai oki ratou ki rungaʼo ia ratou i toku ingoa, e ko te Tino Ngauru Ma Rua tei anoano i te apai ki rungaʼo ia ratou i toku ingoa ma te ngakau tae tikai.
28 E me kua anoano oki ratou i te apai ki rungaʼo ia ratou i toku ingoa ma te ngakau tae tikai, ka kapikiia ratou kia aere ki roto i te ao katoa nei kia tutu i taku evangelia ki to te ao katoa.
29 E ko ratou oki tei akataongaia e au kia bapetizo na roto i toku ingoa, e kia tau oki ki tei tataia;
30 E tei mua oki ia korua tei tataia; e no reira, ka rave korua i te reira kia tau ki te au tuatua tei tataia e tikaʼi.
31 E teianei te tuatua atu nei au kia kotou, e te Tino Ngauru Ma Rua—I na, ko toku aroa ua, e rava ua ïa no kotou; e aere tiratiratū kotou e tikaʼi ki mua iaku e auraka e ara.
32 E, i na, ko kotou oki tei akataongaia e au kia akataonga atu oki kotou i te au taunga ma te au puapii; kia akakite i taku evangelia kia tau ki te mana o te Vaerua Tapu i roto ia kotou, e kia tau katoa ki te au kapikianga e te au orongaanga a te Atua ki te tangata nei;
33 E naku oki na Iesu Mesia, to kotou Atu e to kotou Atua, i tuatua atu i te reira.
34 Ko teia au tuatua, kare e na te au tangata ua nei, mari ra, naku; e no reira, ka akapapu kotou e e au tuatua teia naku, e kare e na te tangata nei.
35 E ko toku reo oki teia e tuatua atu nei i te reira kia kotou; e kua orongaia atu te reira e toku Vaerua kia kotou, e na roto i toku mana e tatau ei kotou i te reira tetai ki tetai; e naringa e kare toku vaerua, kare e rauka mai te reira ia kotou;
36 No reira, ka rauka ia kotou i te akapapu e kua rongo kotou i toku reo, e kua kite katoa i taku au tuatua.
37 E teianei, i na, te akaue atu nei au kia koe e Oliver Cowdery, e kia koe katoa e David Whitmer, kia kimi korua i te Tino Ngauru Ma Rua, ko te ka anoano i te rave i taku i tuatua ake nei;
38 E na roto i to ratou au inangaro e ta ratou au angaanga katoa e kite ei korua ia ratou.
39 E kia kitea e korua ratou, e akaari atu i teia au mea kia ratou.
40 E ka akatopa atu korua ki raro, ma te akamori atu i te Metua na roto i toku ingoa.
41 E tutu tikai korua ki to te ao nei, i te na ko anga atu e: Kia tataraara kotou e kia bapetizoia na roto i te ingoa o Iesu Mesia;
42 Kia tataraara katoatoa te au tangata e kia bapetizoia e tikaʼi, kare oki e ko te au tane anake, ko te au vaine, e te au tamariki tei tae to ratou mataiti no te bapetizo.
43 E teianei, i muri ake i te raukaanga ia korua teia, e akono korua i taku au akaueanga i te au mea ravarai e tikaʼi;
44 E na roto i to korua rima e rave ei au i tetai angaanga umere ki rotopu i te tamariki a te tangata nei, na roto i te akaariangaia kia kite ratou e manganui i ta ratou au ara, e raukaʼi kia tataraara ratou, e aere mai ei ratou ki te basileia o taku Metua.
45 No reira, ko te au akameitakianga taku e oronga atu kia korua, tei rungaʼo ïa i te au mea katoatoa.
46 E i muri ake ka raukaʼi ia korua teia, me kare korua e akono i taku au akaueanga, kare korua e ora i roto i te basileia o taku Metua.
47 I na, ko au ko Iesu Mesia, to korua Atu e to korua Atua, e to korua Akaora, e na roto i te mana o toku Vaerua i tuatua atu ei i te reira. Amene.