1 Ko au te Alepha e te Omega, te Mesia ra te Atu; ae, ko au ïa, te momua e te akaopenga, te Akaora o te ao nei.

2 Ko au, tei rave e tei akaoti i te anoano ona no reira mai au, koia te Metua, no runga iaku—e kua oti oki te reira iaku kia tuku au i te au mea katoa ki raro iaku—

3 Kua mou oki iaku te mana katoatoa no te takoreangaia o Satani e tana au angaanga i te openga o te ao nei, e te rā openga e te maata o te akavaanga taku ka akatupu ki te aronga e noo ki reira, i te akavaanga i te au tangata tatakitai kia tau ki te au angaanga tana i rave.

4 E mea tau kia tataraara te au tangata tatakitai, me kore ra ka aue, no te mea ko au, ko te Atua openga kore.

5 No reira, kare au e akakore i te akavaanga taku ka oronga atu, i na ra, ka tupu te aue, te irieaanga, te mii e te pakatianga nio, ae, ki te aronga oki i toku rima kaui.

6 Kareka ra, kare i tataia e kare e openga ki teia mamae, i na ra, kua tataia e e mamae openga kore.

7 E teianei, kua tata akaou ia oki e e akaapaanga mutukore; e no reira e maata atu ïa i ta te akamāramaanga a tetai au irava tapu ke, kia angaanga oki te reira ki roto i te au ngakau o te au tamariki a te au tangata, ei akakakā i toku nei ingoa.

8 No reira, ka akamārama atu au kia kotou i teia mea muna nei, no te mea e mea tau kia kite kotou i teia, mei taku au aposetolo rai.

9 Te tuatua atu nei au kia kotou tei ikiia ki roto i teia mea nei, mei te tu okotai, kia o oki kotou ki roto i toku akangaroianga.

10 E, i na, ko te mea muna o te pae Atua, e mea maata ïa! E i na, kare oku openga, e ko te akautungaanga tei orongaia atu mei toku nei rima atu e akautungaanga openga kore, no te mea, e Openga Kore oki toku ingoa. No reira—

11 E akautungaanga mutukore ta te Atua akautungaanga.

12 E akautungaanga openga kore ta te Atua akautungaanga.

13 No reira, te akaue atu nei au ia koe kia tataraara, e ma te akono i te au akaueanga tei rauka ia koe na roto i te rima o taku tavini ko Iosepha Timeti, Tamaiti, na roto i toku nei ingoa;

14 E i na roto oki i toku mana katoatoa i raukaʼi ia koe te reira;

15 No reira te akaue atu nei au ia koe kia tataraara—e tataraara, ko te pāpā aea au ia koe ki te rakau a toku nei vaa, e na roto oki i toku riri otooto, e toku riri, e ka mamae no toou au tumatetenga—Ko te mamae, kare koe e kite; ko tona pakari, kare koe i kite, ae, ko te teimaa i te apai anga, kare oki koe e kite.

16 E i na, ko au, ko te Atua, kua mamae tikai au i teia au mea no te katoatoa rava, kia kore ratou e mamae me tataraara ratou;

17 I na ra, me kore ratou e tataraara ka mamae ratou mei iaku rai i mamae;

18 E ko teia mamae tei tukuia kiaku, koia te Atua, tei maata i te au mea katoatoa, kua ruketekete au no te mamae, e kua tae mai te toto na te au putaputa katoatoa o te pakiri, e kua mamae te kopapa e te vaerua katoa—e kare oki au i anoano kia inu i taua kapu kavangu ra, e emi atu ra—

19 Kareka ra, kia akakakāia te Metua, e kua rave au e kua oti taku akateateamamaoanga ki te tamariki a te tangata nei.

20 No reira, te akaue akaou nei au ia koe kia tataraara, kia kore ra, ka taakaaka au ia koe ki toku mana ngateitei; e kia aaki rava mai koe i taau au ara, kia kore ra, ka mamae aea koe i teia au akautungaanga i taikuia e au, e i te tu meangiti, ae, i te tuanga meangiti rava atu taau i tongi ana i te tuatau i kiriti ke ei au i toku Vaerua.

21 E te akaue atu nei au ia koe e kare atu aau mea ke e ako atu mari ua ra, ko te tataraara, e auraka oki e akaari atu i teia au mea ki to te ao nei kia rauka rava ra te tika iaku.

22 Kare e rauka ia ratou kia kai i te kiko i teianei, ei u ra ka orongaia atu na ratou, e no reira, auraka ratou e kite i teia au mea nei, ko te mate aea ratou.

23 E apii no runga iaku, ma te akarongo mai i taku au tuatua; e aere na roto i te tu maru o toku Vaerua, e ka rauka ia koe te au i roto iaku.

24 Ko Iesu Mesia au; kua aere mai au i te tika a toku Metua, e te rave nei au i tona anoano.

25 E teianei, te akaue akaou atu nei au kia koe e auraka rava koe e morimori i te vaine a to tangata tupu; e auraka katoa oki e kimi atu e tamate i toou tangata tupu.

26 E te akaue akaou atu nei au ia koe e auraka rava koe e morimori i taau uaorai apinga, i na ra, kia tuku ua atu koe i te reira no te neneianga o te Puka a Momoni, tei roto i reira te tuatua-mou e te tuatua a te Atua—

27 Koia oki, ko taku tuatua ki te Etene, e kare e roa atu ana ka tae ki te Iuda, no reira mai oki te toenga o te ngati Lamana, kia irinaki ratou i te evangelia, e kare e akara akaou atu ki tetai Mesia te ka tae mai, ko tei tae takere mai.

28 E teianei, te akaue atu nei au ia koe kia pure koe ma te reo maata, e kia pure katoa i roto i toou ngakau; ae, ki mua i to te ao e i te ngai muna katoa, me e tangata ke tetai, e pera katoa me ko koe anake.

29 E ka akakite oki koe i te karere mataora, ae, e akakite ïa ki runga i te au maunga, e ki runga i te au ngai teitei, e ki rotopu i te au tangata katoatoa taau ka akatikaia kia kite.

30 E rave oki koe ma te akaaka tikai, ma te irinaki mai kiaku, auraka e akakino atu ki tei akakino mai.

31 Auraka e tuatua no runga i te au apiianga mārama ngata, e akakite ra koe i te tuatua o te tataraara e te akarongo ki te Akaora, e te akakoreanga o te ara na roto i te bapetizoanga, e na roto i te aʼi, koia oki te Vaerua Tapu.

32 I na, ko teia tetai akaueanga maata e te openga taku ka oronga atu kia koe no runga i teia tuanga angaanga nei; ka rava ua teia no te au rā tatakitai taau ka aaere e tae roa atu ki te openga o toou oraanga.

33 E ka aue koe me tuku ua koe i teia au akoanga kia ngaro ke, ae, ka takoreia koe e taau au apinga.

34 E oronga atu i tetai tuanga o taau apinga, ae, e tetai tuanga katoa o toou enua, e te katoatoaanga, mari ra ei tuanga no te tauturu i toou kopu tangata.

35 E tutaki i te kaiou taau i papau ki te tangata nenei. E akaatea mai ia koe mei te tuikaaanga.

36 E akaruke i toou ngutuare, mari ua ra kia anoano rava koe i te kite i toou kopu tangata;

37 E tuatua mataora ua atu ki te katoatoa rava; ae, e ako, e akamaroiroi, e akakite i te tuatuamou, ma te reo maata, ma te reo rekareka, i te kapikianga e—Hosana, hosana, kia akameitakiia te ingoa o te Atu ko te Atua!

38 E pure putuputu uatu rai, e ka riringi atu au i toku Vaerua ki rungaʼo ia koe, e akameitakianga maata tikai toou i reira—ae, e maata atu ïa i te au apinga nui taau ka rauka mai o te ao nei e pe atu ra.

39 I na, ka rauka ainei ia koe kia tatau i teia ma te kore e rekareka maata e ma te akateitei i toou ngakau no te mataora?

40 Me kare, ka rauka ainei ia koe kia oro mamao aere mei te arataki matapo rai?

41 Me kare, ka rauka ainei ia koe kia akaaka e te maru, ma te akaaere tau ia koe i mua iaku? Ae, e aere mai kiaku nei toou Akaora. Amene.