Tuanga 90
Te eeuanga kia Iosepha Timeti te Peroveta, tei orongaia mai i Kirtland, Ohio, i te rā 8 o Mati, 1833 (History of the Church, 1:329–331). Ko teia eeuanga nei ko tetai takainga ïa i roto i te akamouanga o te Ruru Peresideni Mua (akara ki te upoko tuatua o te Tuanga 81); e mei roto mai i teia i reira kua akataongaia te au konitara, ko tei taikuia atu, i roto ia Mati i te rā 18, 1833.
1–5, Kua orongaia atu te au taviri o te basileia kia Iosepha Timeti e na roto iaia ki te Akonoanga; 6–7, Ko Sidney Rigdon e Frederick G. Williams ka angaanga raua ki roto i te Ruru Peresideni Mua; 8–11, Kia tutuia te evangelia ki te iti tangata o Iseraela, ki to te au Etene, e ki te ngati Iuda, e ki te au tangata katoa e akarongo mai ra i roto i tona uaorai reo; 12–18, Kia akanoonoo meitaki a Iosepha Timeti e tona nga konitara i te Akonoanga; 19–37, Tuketuke te au tangata ta te Atu i apii atu kia aere ma te tiratiratū e kia angaanga ki roto i tona basileia.
1 I na, te tuatua maira te Atu, tika, tika tikai taku e karanga atu kia koe e taku tamaiti, kua akakoreia taau au ara, kia tau ki toou patianga, ko taau pure e te pure a to au taeake kua tae rava te reira ki roto i toku nga taringa.
2 No reira, kua akameitakiia koe mei teianei atu tei mou i te au taviri o te basileia tei orongaia atu kia koe; e ka oki mai oki taua basileia no te taime openga.
3 Tika tikai taku e karanga atu kia koe; kare rava te au taviri o teia basileia e apaina ke ia mei ia koe, ia koe i te ao nei, e kare katoa i te ao a muri ake;
4 Kareka ra, na roto oki ia koe te orongaangaia atu o te au eeuanga ki tetai ke, ae, ki te akonoanga oki.
5 E ko te au tangata katoatoa tei rauka ia ratou te au eeuanga a te Atua, kia matakite ratou i te mouanga i te reira ko te manako aea ratou e e mea mama ua, e ko te riro ïa mai ratou ki raro i te akaapaanga, e ka turori e ka inga me tae mai te uriia, e te matangi katoa i te aangianga mai, e te ua katoa i te topaanga mai ki runga i to ratou are.
6 E pera katoa, tika tikai taku e karanga atu ki toou nga taeake, kia Sidney Rigdon ma Frederick G. Williams, kua akakoreia ta raua au ara, e kua aiteite raua kia koe i te mouanga i te au taviri o teia basileia openga nei;
7 E na roto katoa i ta kotou au akatereanga te au taviri o te apii a te au peroveta, taku i akaue atu kia akatinamouia;
8 Ei reira oki ratou e apakore ei i roto i ta ratou angaanga no te akaoraanga o Ziona, e te iti tangata o Iseraela, e te au Etene katoa, ko ratou ravarai te ka irinaki;
9 E na roto i ta kotou akatereanga ka rauka mai ia ratou te tuatua, e na roto i ta ratou akatereanga ka aere atu te tuatua ki mua e tae rava atu ki te openga o te enua nei, ki te au Etene na mua, e oti, i na, ka uri mai ratou ki te ngati Iuda.
10 E ka tae mai i reira te rā e eeuia mai ei te rima o te Atu na roto i te mana i te akaariuanga i te au iti tangata, te au iti tangata etene, te ngutuare o Iotepa, no te evangelia o to ratou akaoraanga.
11 E ka tae akera i taua rā ra, ka rongo oki te au tangata tatakitai i te kīanga o te evangelia kia tau ki tana uaorai tuatua, e i roto i tona uaorai reo, na roto i te aronga tei akataongaia ki teia mana, na roto i te akatereanga a te Akapumaana, tei tukuia mai ki rungaʼo ia ratou no te eeuanga a Iesu Mesia.
12 E teianei, tika tikai taku e karanga atu kia kotou, te oronga atu nei au i tetai akaueanga kia kotou kia rave uatu rai kotou ki roto i te angaanga e te ruru peresideni.
13 E me oti ia koe teia akaurianga nei a te au peroveta, ka riro koe mei reira atu ei akaaere ki rungaʼo i te angaanga a te akonoanga e te apii katoa;
14 E mei tetai au tuatau ki tetai tuatau, kia tau ki ta te Akapumaana ka akakite atu, ka rauka mai tetai au eeuanga kia eeu mai i te au mea muna o te basileia;
15 E akamako meitaki i te au akonoanga, ma te apii e te tamou, e kia matau tikai ki te au puka memeitaki katoatoa, e te au tuatua, te au reo, e te au tangata.
16 E ko teia oki ta kotou kimianga e ta kotou angaanga i roto i to kotou oraanga katoatoa, kia akaaere i roto i te pupu konitara, e kia akamako i te au angaanga puapinga katoatoa o teia akonoanga e te basileia katoa.
17 Auraka e akama, e auraka katoa e maitu; i na ra, kia matakite i roto i to kotou au manako teitei e te parau, no te mea ka riro mai oki te reira ei puereere i to kotou au vaerua.
18 E akamako meitaki i to kotou au ngutuare; e akaatea mamao atu i te tu kope e te au mea tiamā kore mei ia kotou.
19 E teianei, tika tikai taku e karanga atu kia koe, kia akatakaia tetai ngai, i te viviki ua anga i te rauka mai, no te kopu tangata o toou konitara e te tata tuatua, koia a Frederick G. Williams.
20 E kia tika i taku tavini ruaine, ko Iosepha Timeti, Metua, kia noo rai ki te ngai tana e noo ra e tona kopu tangata katoa; e auraka rava oki kia okoia atu e tae rava atu ki te taime e tuatua mai ei te Atu.
21 E kia noo rai oki toku konitara, ko Sidney Rigdon, ki te ngai tana e noo nei i teianei e tae uatu ki te taime e tuatua mai ei te vaa o te Atu.
22 E kia kimi pu tikai te episekopo i tetai mata, e kia riro aia ei tangata apinganui i te vairanga—ei tangata no te Atua, e te akarongo maroiroi tikai—
23 E kia raukaʼi oki iaia i te tutaki i te au kaiou; kia kore oki te are vairanga o te Atua e akaraanga taukore ki mua i te mata o te tangata nei.
24 E kimi pu tikai, e pure putuputu uatu rai, e ma te irinaki tikai, e ka meitaki te au mea ravarai noou, me ka aere tiratiratū koe ma te akamaara i te koreromotu ta kotou i papau tetai ki tetai.
25 Kia meangiti ua to kotou au kopu tangata, ko koe tikai e taku tavini ruaine e Iosepha Timeti, Metua; ko te aronga oki e kare e no to kotou au kopu tangata ratou;
26 E ko te au mea tei orongaia noou, no te akatupuanga i taku angaanga, auraka rava te reira kia apaina ke ia mei ia koe e orongaia atu ki tetai ke kare e tiamā ana—
27 Ko te ka araiia aea koe i te rave i te au mea taku i akaue atu ia koe.
28 E pera katoa, tika tikai taku e karanga atu kia koe, kua tau rava iaku kia rauka i taku tavini vaine ko Vienna Jaques tetai moni kia tutaki i tana okoanga, e kia aere atu ki te enua ko Ziona;
29 E ko te toenga o te moni kia akatapuia mai te reira kiaku, e ka tutakiia aia i te tuatau i tau iaku.
30 Tika tikai taku e karanga atu kia kotou, kua tau rava oki i roto i toku mata, kia aere atu aia ki te enua ko Ziona, e kia ariki mai i tetai ipukarea no ko mai i te rima o te episekopo;
31 Kia noo aia ma te au kia tau ki tona tu akarongo, e auraka oki kia noonoo ua i tona au rā mei reira e aere atu ki mua.
32 E i na, tika tikai taku e karanga atu kia koe, kia tata koe i teia akaueanga, e ma te akakite atu ki toou au taeake i Ziona, na roto i te araveianga aroa, kua kapiki katoa oki au ia kotou kia akaaere ki rungaʼo ia Ziona i roto i toku uaorai tuatau.
33 No reira, kia akamutu ratou i te tamanamanata mai iaku no runga i teia mea nei.
34 I na, te karanga atu nei au kia koe e kua akamata to au taeake i Ziona i te tataraara, e kua rekareka te au angela ia ratou.
35 Kareka ra, kare au i mareka rava i tetai au mea e manganui; e kare katoa oki au i mareka i taku tavini ia William E. McLellin, e pera katoa ki taku tavini ko Sidney Gilbert; e pera katoa te episekopo, e tetai pae atu e maata oki te au ara ta ratou ka tatara.
36 I na ra, tika tikai taku e karanga atu kia koe, ka taumaro oki au, ko te Atu, kia Ziona, e ma te pati akatenga atu ki tona aronga ririnui, ma te ako atu iaia e tae uatu ki te tuatau e tiamā mai ei aia ki mua iaku.
37 Kare oki aia e akaateaia mei tona ngai. Naku, na te Atu i tuatua atu i te reira. Amene.