1 E akarongo mai, e te au ereta o taku akonoanga, e ariu mai to kotou taringa ki taku tuatua, e akarongo mai ki taku e anoano nei ia kotou, e i teia enua taku i tuku atu kia aere kotou.

2 Tika tikai taku e karanga atu kia kotou, kia akameitakiia tei akono i taku ra au akaueanga, me i teia oraanga nei, e me kore ra i te mate; e ko tei tu akarongo tikai i roto i te au manamanata ra, ka maata atu tona tutaki i roto i te basileia o te ao ra.

3 Kare oki kotou e kite ki to kotou mata kopapa, i teia taime nei, i te au manako a te Atua no taua au mea te ka tupu a muri ake, e te kakā te ka aru mai i muri ake i te manamanata maata.

4 I muri ake i te au manamanata maata, ka rauka mai i reira te au akameitakianga. No reira, ka tae mai te rā e akakoronaiaʼi kotou ki te kakā maata; kare ra oki i tae ake te ora, te vaitata mai nei ra oki.

5 E akamaara i teia, taku e akakite atu nei kia kotou i mua ake ka tupu ei, kia tuku kotou i te reira ki roto i to kotou ngakau, e ma te ariki i te ka aru mai.

6 I na, tika tikai taku e karanga atu kia kotou, no teia tumu nei i tono atu ei au ia kotou—kia kauraro kotou, e kia papa katoa oki to kotou ngakau i te akapapuanga atu i to kotou kite no te au mea te ka tae mai;

7 E pera katoa kia akangateitei katoa ia oki kotou, i te akamouanga i te tango, e te akakiteanga atu i te tuatua o te enua te ka akatuia te Ziona o te Atua;

8 E pera katoa kia akapapa katoa ia tetai umukai e te au kai memeitaki na te aronga putaua; ae, e umukai o te au kai meimeitaki e te uaina i runga i te ota i akaareare meitakiia ra, kia kite oki to te enua nei e kare te vaa o te au peroveta e pikikaa;

9 Ae, e kaikaianga no te are o te Atu, tei akapapa meitaki ia, e ka patiia te au iti tangata katoatoa kia aere ki reira.

10 Te mea mua, ko te aronga apinganui e te kite, te pakari e te ngateitei;

11 E i muri ake i reira e tae mai ei te rā o toku mana; ei reira te putaua, te pirikoki, e te matapo, e te taringa turi, e aere mai ei ki te akaipoipoanga o te Punua Mamoe, e ka kaikai ei i te kai a te Atu, tei akateateamamaoia no te rā maata te ka tae mai.

12 I na, naku oki, na te Atu, i tuatua atu.

13 E kia aere atu oki te kite mei Ziona atu e, ae, mei te vaa atu o te oire o te ipukarea o te Atua—

14 Ae, e no teia akakoroanga nei i tono atu ei au ia kotou i konei, e kua iki i taku tavini ia Edward Partridge, e kua akataka katoa atu i tana angaanga ki teia enua.

15 I na ra, me kare aia e tataraara i tana au ara, koia oki te irinaki kore e te ngakau poiri katoa, kia matakite aia ko te inga aea aia.

16 I na, kua orongaia tana angaanga kiaia, e kare oki e oronga akaou ia atu.

17 E ko tei orongaia atu kiaia teia angaanga nei, kua akatakaia aia ei akava i Iseraela nei, mei to te tuatau taito rai, e kia tua i te au enua o te ipukarea o te Atua ki tana au tamariki;

18 E kia akava i tona iti tangata na roto i te kite papu o tei apakore, e na roto katoa oki i te tauturu a tona nga konitara, kia tau ki te au ture o te basileia tei orongaia mai e te au peroveta o te Atua.

19 Tika tikai taku e karanga atu kia kotou, ka akonoia taku au ture i runga i teia enua.

20 Auraka tetai tangata e manako e e tutara aia; i na ra, na te Atua e akaaere iaia te akava nei, kia tau ki te apiianga o tona anoano, koia oki, ko te ka apii atu me kore ko te ka noo ki runga i te nooanga akavaanga.

21 Auraka rava tetai tangata e aati i te au ture o te enua, no te mea ko tei akono i te au ture a te Atua kare rava ratou e anoanoia kia aati i te au ture o te enua.

22 No reira, kia kauraro atu ki tei akamanaia, e tae uatu ki te tuatau e tutaraʼi aia te tutara tikai, e tuku ei i te au enemi ki raro i tona nga vaevae.

23 I na, ko te au ture ta kotou i ariki mai mei toku rima atu, ko te au ture te reira no te akonoanga, e na roto i teia mārama ka akaari ei kotou i te reira ki mua. I na, teia oki te pakari.

24 E teianei, mei taku i tuatua atu no runga i taku tavini ia Edward Partridge, e enua nooanga teia nona, e no ratou tana i iki ei konitara nona; e pera katoa ei enua nooanga nona taku i iki ei akono i taku are vairanga;

25 No reira, kia apai mai ratou i to ratou au kopu tangata ki teia enua, e ka uriuri oki ratou kia ratou uaorai e pera kiaku.

26 E i na, kare oki e tau kia akaue au i roto i te au mea katoatoa; ko tei maroia i roto i te au mea katoatoa, e tavini kope ïa e kare i te tavini pakari; e no reira, kare ona tutaki.

27 Tika tikai taku e karanga atu, kia maroiroi te tangata i te rave i te au akakoroanga meitaki, e kia rave i te au mea e manganui ma te kore e akaueia, e kia akatupu i te au mea tuatuatika e manganui;

28 No te mea tei roto oki ia ratou te mana, i riro ei ratou ei pu kia ratou uaorai. E me rave te tangata nei i te meitaki, kare rava to ratou tutaki e ngaro ke.

29 I na ra, ko tei kore rava e rave i tetai mea, mari ua kia akaue rava ia, e tei ariki katoa i te akaueanga ma te ngakau ekoko, e tei akono i te reira ma te kope, ka akaapaia ïa.

30 Ka akapeea au nei tei anga i te tangata, te tuatua maira te Atu, i te karangaanga e kua apakore aia me kare aia i akono i taku au akaueanga?

31 Ka akapeea au nei, te tuatua maira te Atu, tei taputou e kare i akatupu?

32 Kua akaue atu au, e kare ra te tangata nei i akono mai; no reira kua akakore au e kare i rauka ia ratou te akameitakianga.

33 E kua karanga iora ratou i roto i to ratou ngakau e: Kare teia i te angaanga na te Atu, no te mea kare oki tana au taputou i tupu. I na ra, aue oki ratou, no raro mai oki to ratou tutaki, e kare e no runga mai.

34 I teianei, te oronga atu nei au kia kotou i tetai atu au akamāramaanga no runga i teia enua.

35 E pakari oki to roto iaku, kia riro taku tavini a Martin Harris ei akaraanga no te akonoanga, i te tukuanga i tana moni ki mua i te episekopo o te akonoanga.

36 E pera katoa, ei ture katoa oki teia ki te au tangata tatakitai te ka aere mai ki teia enua, kia rauka tetai ipukarea nona; e ka oronga aia i tana moni kia tau ki ta te ture e arataki ana.

37 E e pakari katoa oki kia okoia mai tetai enua i Independence, ei ngai no te are vairanga, e pera katoa ei are neneianga.

38 E tetai au akaaereanga no runga i taku tavini ia Martin Harris, ka orongaia atu te reira kiaia e te Vaerua, kia rauka iaia tona ipukarea tei tau iaia;

39 E kia tataraara aia i tana au ara, no te mea te kimi ra oki aia i te akameitaki a to te ao nei.

40 E pera katoa ka rave rai taku tavini a William W. Phelps i te taonga taku i akataka iaia, e ma te ariki atu i tona ipukarea i runga i te enua;

41 E pera katoa e tau oki aia kia tataraara, no te mea kare oki au, ko te Atu, e mareka ana iaia, no te mea kua kimi oki aia i te akateitei iaia uaorai e kare oki i maru tikai ki mua iaku.

42 I na, ko tei tataraara i tana au ara, ka akakoreia ïa, e kare au, ko te Atu, e akamaara akaou atu i te reira.

43 Na teia e kite ei kotou e kua tataraara tetai tangata i tana au ara—i na, ka aaki mai aia i te reira ma te akaruke takiri atu i te reira.

44 E teianei, tika tikai taku e karanga atu no runga i te toeanga o te au ereta o taku akonoanga, kare i tae ake te tuatau, e manganui te au mataiti, kia rauka ia ratou to ratou ipukarea i roto i teia enua nei, mari ua ra kia kimi na roto i te pure akarongo, e kia tau anake ki ta te Atu i iki kia ariki mai.

45 E, i na, ka opara mai ratou i te tangata ki te ngai okotai mei te au ope katoa o te ao nei.

46 No reira, e akaputuputuia kotou ki te ngai okotai; e ko tei kore i ikiia kia noo ki roto i teia enua, kia tutu ratou i te evangelia ki roto i te au ngai e pini uake; e i muri ake i reira kia oki atu ratou ki to ratou au ngutuare.

47 E apii atu ratou na te arataa, e ma te akapapu i te kite o te tuatua-mou ki roto i te au ngai ravarai, e kapiki atu ki te aronga apinganui, tei teitei e tei akaaka, e tei putaua katoa kia tataraara.

48 E kia akatu ratou i te au akonoanga, mei te mea e kua tataraara te au tangata o te ao nei.

49 E kia ikiia tetai mata e te reo o te akonoanga, no te akonoanga i Ohio, kia ariki mai i te moni no te oko mai i te au enua i Ziona.

50 E te oronga atu nei au ki taku tavini ko Sidney Rigdon i tetai akaueanga, kia tata aia i tetai tuatua akamāramaanga no te enua ko Ziona, e tetai akakiteanga no te anoano o te Atua, te ka akakiteia atu oki e te Vaerua kiaia;

51 E kia tataia atu tetai episetole e te tuatua akamāramaanga ki te au akonoanga ravarai kia rauka mai tetai moni, e kia tukuia atu ki roto i te rima o te episekopo, me koia me kore ra ko te mata, i tei tau meitaki iaia, me kore ra i tana ka akataka, ei oko enua ei ipukarea no te tamariki a te Atua.

52 E, i na, tika tikai taku e karanga atu kia kotou, ko te anoano o te Atua, koia oki, kia akatuera mai te au pipi e te tamariki katoa a te tangata nei i to ratou ngakau, kia oko mai te reira au ngai katoatoa o teia enua nei, e kia rave vaveia te reira.

53 I na, teia te pakari. Kia rave ratou i teia ko te kore aea o ratou ipukarea e rauka mai, mari ua na roto i te akamaringianga toto.

54 E pera katoa, mei te mea e ka rauka mai tetai enua, kia tukuia atu te au tangata angaanga, te au tu ravarai ki teia enua nei, kia angaanga no te aronga tapu o te Atua.

55 Kia raveia teia au mea katoatoa ma te mako; e kia akakiteia mai te au turanga o te enua nei mei tetai tuatau ki tetai tuatau e te episekopo, me kore e te mata o te akonoanga.

56 E auraka oki te angaanga o te akaputuputuanga e rapurapu ua ia, e auraka katoa kia akaruke ke atu; mari ra kia raveia mei ta te au ereta o te akonoanga ka akakite atu i roto i te uipaanga maata, kia tau ki te kite tei rauka ia ratou mei tetai tuatau ki tetai tuatau.

57 E kia tika i taku tavini ia Sidney Rigdon kia akatapu e kia akatinamou i teia enua nei, e pera katoa i te ngai no te iero, ki te Atua.

58 E kia raveia tetai uipaanga maata; e i muri ake i te reira, kia oki atu taku nga tavini a Sidney Rigdon e Iosepha Timeti, Tamaiti, e pera katoa kia aru atu a Oliver Cowdery ia raua, kia akaoti i te toenga o te angaanga taku i akataka atu na ratou i roto i to ratou uaorai enua, e te toenga na te uipaanga maata e akaiti i te reira.

59 E auraka rava oki e tangata e oki mei teia enua, mari ua ra kia akakite aia i te tuatua na te arataa, o tana i kite e tana i irinaki papu tikai.

60 E ko tei tukuia atu ana kia Ziba Peterson, ka rave ke ia te reira mei iaia; e kia tu ua aia mei te mema rai i roto i te akonoanga, e kia angaanga ma tona uaorai rima, ma te au taeake, e tae uatu ki te taime e ravaʼi te akautunga i tana au ara; no te mea kare oki aia i aaki ana i te reira, e kua manako oki aia i te uuna i te reira.

61 E ko te toenga o te au ereta o teia akonoanga, te ka aere mai ki teia enua nei, e ko tetai pae kua akameitaki maata ia ratou i te au mea katoatoa, kia rave katoa ratou i tetai uipaanga maata ki teia enua nei.

62 E na taku tavini na Edward Partridge e akaaere i te uipaanga te ka raveia e ratou.

63 E ka oki atu ratou katoa ma te tutu aere i te evangelia na te arataa, i te akakiteanga i te au mea tei eeuia mai kia ratou.

64 E tika tikai, ka tae te rongo mei teia ngai atu e tikaʼi ki to te ao katoa nei, e tae uatu ki te openga o te enua nei—kia tutuia te evangelia ki te au tangata ravarai e tikaʼi, e ka aru katoa te au akairo ia ratou tei irinaki.

65 E i na te aere mai nei te Tamaiti a te Tangata. Amene.