1 Tika tikai taku e tuatua atu kia kotou tei akaputuputu mai ki te ngai okotai kia kite kotou i toku anoano no runga i te akaoraanga o toku iti tangata i takingakinoia—

2 I na, te tuatua atu nei au kia kotou, naringa kare te aatianga ture a toku iti tangata, no runga tikai i te akonoanga e kare e no te tangata tatakitai, ka akaoraia tikai paa ratou i teianei.

3 E i na, kare i rauka ia ratou kia kauraro ki te au mea tei inangaroia e au mei to ratou au rima, kua kī ra i te au tu kino ravarai, e kare i tuʼatu i to ratou au apinga, mei te aronga tapu rai, no te putaua e tei rokoia e te tumatetenga i rotopu ia ratou;

4 Kare oki ratou i okotai kia tau ki te taokotaianga tei anoanoia e te ture o te basileia tiretiera;

5 Kare rava a Ziona e akatuia mari ra ei te ture o te basileia tiretiera; me kore ra kare au e ariki iaia kiaku.

6 E mea tau kia akoia toku iti tangata, e kite uatu ratou i te kauraro, me ka anoanoia no te au mea i tumatetengaʼi ratou.

7 Kare au e tuatua na no runga i te aronga tei ikiia ei arataki i toku iti tangata, koia oki te au ereta mua o taku akonoanga, kare ratou pouroa i raro ake i teia akaapaanga;

8 I na ra te tuatua nei au no runga i taku au akonoanga i vao mai—e manganui te ka tuatua e: Teiea to ratou Atua? I na, e akaora aia ia ratou i te tuatau manamanata, me kare, kare tatou e aere ki Ziona, ka tapū tatou i ta tatou au moni.

9 No reira, no te au aati ture a toku iti tangata, e mea tau iaku kia tapapa taku au ereta no tetai tuatau poto no te akaoraanga o Ziona—

10 E kia papa katoa ratou, e kia apii meitaki ia taku iti tangata, kia rauka te mārama o te aereanga, e kia kite meitaki i te rave i ta ratou angaanga, e te au mea taku ka inangaro mei to ratou au rima.

11 Kare teia e rauka kia akatapu rava ia taku au ereta ki te mana mei runga mai.

12 E i na, kua akateateamamao au i tetai orongaanga tapu maata o te iero e te akameitakianga kia riringiia atu ki rungaʼo ia ratou, me ka tu akarongo ratou e te akaaka ki mua i toku nei aroaro.

13 No reira e mea tau kiaku e kia tiaki poto ana taku au ereta no tetai tuatau poto, no te akaoraanga o Ziona.

14 E i na, kare au e inangaro mei to ratou au rima e na ratou e tamaki i te au tamakianga a Ziona; no te mea, mei taku oki i tuatua atu i te akaueanga mua, ko taku ïa ka akatupu—Naku oki e tamaki i ta kotou au tamakianga.

15 I na, ko te akapou taku i tono na mua kia takore e kia akatanea i toku au enemi; e kare e roa atu te au mataiti kare ratou e akaruke akaou ia kia akaviivii i toku ipukarea, e kia akaiki puapinga kore ua i toku nei ingoa i runga i te au enua taku i akatapu no te akaputuputuanga mai i toku aronga tapu ki te ngai okotai.

16 I na, kua akaue au i taku tavini ia Iosepha Timeti, Tamaiti, kia tuatua ki te ririnuianga o toku ngutuare, toku aronga tamaki oki, toku au tangata ou, e te au uki i rotopu, kia akaputuputu ki te ngai okotai no te akaoraanga i taku iti tangata, e kia uri ki raro i te punanga o toku au enemi, e kia akapueurikiriki i to ratou au tiaki;

17 I na ra, kare ra te maroiroi o toku nei ngutuare i akarongo mai ana i taku tuatua.

18 I na ra, me e aronga tetai tei akarongo i taku au tuatua, kua teateamamao au i tetai akameitakianga e te orongaanga tapu o te iero no ratou, me tamou ua ratou i te akarongo.

19 Kua akarongo au i ta ratou au pure, e ka ariki au i ta ratou atinga; e kua tau tikai ïa iaku kia tere ua mai rai ratou kia timataia to ratou akarongo.

20 E teianei, tika tikai taku e karanga atu kia kotou, e oronga atu au i tetai akaueanga kia kotou, ko ratou ravarai tei aere mai ki konei, e te ka noo ki teia ngai e pini uake, e noo rai ratou;

21 E ko te aronga te kare e rauka kia noo, e e kopu tangata to ratou i te itinga, kia noo poto ratou no tetai tuatau, mei ta taku tavini ta Iosepha ka oronga kia ratou;

22 Naku oki e apii iaia no runga i teia au mea nei, e ko te au mea katoatoa tana ka akataka no ratou ka tupu te reira.

23 E ko taku aronga katoatoa te ka noo ki te reira au tuanga e pini uake, kia tu akarongo tikai ratou, e te pure tuku moe kore, e te taakaaka ki mua iaku, ma te kore e eeu atu i te au mea tei eeuia e au kia ratou, e tae ua atu ki te taime e manako ei au e kia eeuia te reira.

24 Auraka e tuatua no te au akavaanga, auraka e akapaapaa i te akarongo eiaa katoa i te au angaanga umere, i na ra, e akaputuputu marie mai rai ki te ngai okotai, kia maata atu te ngai ka rauka i te tuanga okotai, kia tau rai ki te manako o te au tangata;

25 E i na, ka oronga atu au i te aroa kia kotou e te aroa ua i roto i to ratou mata, kia akangaroi kotou ma te au e te ora ia koe e tuatua ra ki te tangata: E rave i te akavaanga e te tikaanga no matou kia tau ki te ture, e kia tutaki ia matou no ta matou au takingakinoangaia.

26 Teianei, i na, te tuatua atu nei au kia kotou, e toku au taeake, ko te mataara teia e akaraanga meitaki ei kotou i roto i te mata o te tangata, e tae uatu ki te ririnuianga o te vaeau o Iseraela.

27 E naku e akaparuparu i te au ngakau o te au tangata, mei taku i rave i te ngakau o Pharao, mei tera tuatau ki tera tuatau, e tae uatu ki te tuatau o taku tavini ia Iosepha Timeti, Tamaiti, e taku au ereta taku i iki, kia rava te tuatau i te akaputuputu mai i te maroiroi o toku ngutuare,

28 E kia oti te aronga pakari i te tonoia kia akatupu i taku i akaue no runga i te okoanga mai o te au enua i Jackson county, e i roto i te au tuanga i piri mai i te reira au ngai.

29 Ko toku anoano tikai teia kia okoia mai teia au enua; e kia oti oki i te okoia ei roto ïa i te rima o toku aronga tapu kia tau oki ki te ture o te akatapuanga taku i oronga atu.

30 I muri ake i te okoangaia o teia au enua, kare au e akaapa i te au vaeau o Iseraela i te raveanga i to ratou uaorai enua, mei ta ratou i oko mai i mua ana ki ta ratou uaorai moni, e te urianga ki raro i te punanga o toku au enemi tei noo ki runga i reira, e te akapueurikirikianga i to ratou au tiaki, e te tutakianga mai i toku au enemi mei te toru ki te ā o te uki o ratou tei makitakita mai iaku.

31 Na mua ra kia maroiroi rava toku au vaeau, e kia akatapuia ratou ki mua iaku, kia kakā ratou mei te rā e te make mei te mārama, e kia riro tona reva ei mea rikarika ki te au pa enua;

32 Kia maroia oki te au basileia o te ao nei kia kite e ko te basileia o Ziona, koia tikai ïa te basileia o to Atua e tana Mesia; no reira, kia kauraro tatou ki tana au ture.

33 Tika tikai taku e karanga atu kia kotou, e mea tau iaku e ko te au ereta mua o taku akonoanga kia rauka to ratou orongaanga tapu mei runga mai i roto i toku ngutuare, tei akaueia e au kia akatuia ki toku ingoa i te enua ko Kirtland.

34 E tuku i te reira au akaueanga taku i oronga atu no runga ia Ziona e tana ture kia taangaangaia e kia akatupuia, i muri ake i tona akaoraangaia.

35 I vai ana te rā kapikianga, kua tae maira te atianga no te rā ikianga; e ko te aronga ka ikiia, ei aronga tiamā.

36 E akakiteia te reira ki toku tavini, e te reo o te Vaerua, te aronga tei ikiia; e ka akatapuia ratou;

37 E me aru ratou i te tuatua tei rauka ia ratou, ka rauka to ratou mana i muri ake i te au rā e manganui no te akaotianga i te au mea katoatoa no runga ia Ziona.

38 E pera katoa te tuatua akaou atu nei au kia kotou, e kimi i te au, auraka ki te tangata anake tei takingakino ia kotou, mari ra ki te au tangata katoatoa;

39 E akateitei i te reva no te au, e tutu oki i te au ki te au openga o te enua nei;

40 E papau oki i te au ki te aronga tei takingakino mai ia kotou kia tau ki te reo o te Vaerua i roto ia kotou, e ka angaanga te au mea katoatoa no to kotou uaorai meitaki.

41 No reira, kia tu akarongo mou kotou; e i na, e teianei, ei vaitata uaorai au ia kotou e tae uatu ki te openga. Koia ïa. Amene.