1 Ka ui aere te au openga o te ao nei i toou ingoa, e ka tuatua aviri te au neneva ia koe, e ka riri a ade ia koe;

2 Kareka te aronga ngakau mā, e te pakari, e te ngateitei, e te tiamā, te kimi ua mai rai i te ako e te tikaanga, e te au akameitakianga katoa mei kona mai i toou ra rima.

3 E kare rava oki toou iti tangata e patoi mai ia koe no te kite o te aronga tuatua pikikaa.

4 E noatu oki e ka riro to ratou kite pikikaa ei titiri ia koe ki roto i te manamanata, e ki rotopu i te auri e nga patu, ka noo ngateitei rai koe; e i na ra, no tetai tuatau poto ua ka riro oki toou reo ei mea pakari tikai ki rotopu i to au enemi mei te liona āe ra te tu, no toou tu tika; e ka tu oki to Atua ki te pae ia koe e tuatau e tuatau uatu.

5 Me ka kapikiia koe kia na roto i te manamanata; e me tei roto koe i te kino i rotopu i to ai taeake pikikaa; e mei tei rotopu koe i te au aronga keikeia; e mei tei rotopu koe i te kino o te enua me kore ra o te tai;

6 Me ka akakinoia koe ki te au tu tapepeanga ravarai; e me tamaki mai to au enemi ia koe; e me ka akaatea ratou ia koe mei te taokotaianga o to metua tane e to metua vaine e te au tungane ma te au tuaine; e mei te mea e na roto i te koke te akaateaanga a to au enemi ia koe mei te kopu mai o to vaine, e toou uanga katoa, e taau tama mua katoa, noatu oki e e ono rai ona mataiti, ka mou mai ki toou kakau, e ka na ko mai ei e, E taku metua, e taku metua, eaa i kore ei koe e noo mai kia matou? Aue, e taku metua e, eaa ta teia au tangata ka rave kia koe? e me ka opara ke ia atu aia mei ia koe atu ki te koke, e ka kikaia koe ki roto i te are auri, e ka koropini mai to au enemi ia koe mei te au ruko rai te tu no te toto o te mamoe;

7 E me ka tiriaia koe ki roto i te vaarua, e me kore ra ki roto i te rima o te aronga tā tangata, ka tukuia mai te utunga mate ki rungaʼo ia koe; e me ka tiriaia koe ki roto i te ngai oonu; e me tae mai te ngaru maata ki rungaʼo ia koe; me riro ake te au matangi ririnui ei enemi noou; e me akapoiri mai te rangi, e kua kapiti te au mea i angaiaʼi te ao nei ei arai i te mataara; e pera katoa, mei te mea e amama mai te vaa o ade kia koe, kia kite koe e taku tamaiti e, ka riro teia au mea katoatoa ei kite noou, e ka riro oki ei meitaki noou.

8 Kua eke mai oki te Tamaiti a te Tangata ki raro ake i teia au mea katoatoa. Ko koe ainei tei maata atu iaia?

9 No reira, e mou tamou ki toou ra aerenga, e ka vai rai oki te kautaunga kia koe; no te mea kua akakotingaia ratou, kare rava ïa e peke ke. Kua kiteaia to au rā, e kare e rauka kia akameangitiia to au mataiti; e no reira, auraka e mataku i ta te tangata nei ka rave kia koe, ka noo oki te Atua kia koe e tuatau e tuatau uatu.