1 Tika tikai taku e karanga atu kia koe, no runga i toou au taeake tei akakinoia, e tei takingakinoia, kua tuaruia ki vao mei te enua o to ratou ipukarea—

2 Naku, na te Atu, i tuku mai i te tumatetenga ki rungaʼo ia ratou, i takingakinoiaʼi, no ta ratou au aatianga ture;

3 I na ra ka riro ratou iaku, e naku oki ratou a taua rā ra, e aere mai ei au e akaputu i taku au mea puapinga tikai.

4 No reira, e mea tau kia akoia e kia timataia ratou, mei ia Aberahama katoa rai, tei akaueia kia akaatinga i tana tamaiti okotai.

5 No te mea e ko ratou katoatoa te kare e akakoromaki i te akoanga, e kua uuna ra iaku, kare ratou e akatapuia.

6 I na, te tuatua atu nei au kia koe, kua tupu te tauetonoanga, e te maro, e te vareae, e te pekapeka, te au manako viivii e te morimori i rotopu ia ratou; no reira, na roto i teia au mea nei kua taviivii ratou i to ratou ipukarea.

7 Kua marie ratou i te akarongo i te reo o te Atu to ratou Atua; no reira, kua marie rai to ratou Atua i te akarongoanga ki ta ratou au pure, i te pauanga atu i te rā o to ratou tumatetenga.

8 I te au rā o to ratou au, e mama ua to ratou inangaro ki taku tuatua; i na ra, me tae maira te rā tumatetenga, ka kimi roa ïa ratou iaku.

9 Tika tikai taku e karanga atu kia koe, noatu ta ratou au ara, kua kī toku ngakau i te aroa ia ratou. E kare rava au e akaatea ke takiri ia ratou; e i te rā o toku riri ka akamaara au i te aroa.

10 Kua taputou oki au, e kua aere atu te reira akaue ki vao na roto i te akaueanga taku i oronga atu kia koe, e ka akatopa atu au i te koke o toku riri otooto no toku nei iti tangata; e mei taku katoa i tuatua, ka tupu te reira.

11 Te vaitata mai nei toku riri otooto i te maringi atu e kare e aiteia ki rungaʼo i te au pa enua; ko taku teia ka rave me kī ta ratou kapu i te ara.

12 E i taua rā ra, ko te aronga katoatoa e tiaki i te are teitei ra, koia oki, ko taku Iseraela katoatoa, ka ora ïa.

13 E ko ratou oki tei pueu ra ka akaputuputuia mai.

14 E ko ratou ravarai tei aue ana ka akapumaanaia ratou.

15 E ko ratou ravarai i tuku i to ratou oraanga no toku nei ingoa ka akakoronaia.

16 No reira, kia pumaana to kotou ngakau no runga ia Ziona; tei roto oki i toku nei rima te au kopapa katoatoa; e akamuteki ua, kia kite kotou e ko au te Atua.

17 Kare a Ziona e akaateaia i tona ngai, noatu oki e kua akapueu ke ia tana au tamariki.

18 Ko ratou te ka toe mai, e e ngakau mā to ratou, ka oki ïa, e ka aere mai ki to ratou ipukarea, ko ratou e ta ratou au tamariki, ma te imene rekareka openga kore, ei patu akaou i te au ngai tanea o Ziona—

19 E ko teia au mea katoatoa nei, kia akatupuia te au peroveta.

20 E, i na, kare atu e ngai ke i ikiia mari ra ko taku i iki ke na; e kare atu rai e ngai ke e ikiia mari ua te ngai taku i iki, no te angaanga o te akaputuputuanga o toku aronga tapu—

21 E tae uatu te rā kare atu e ngai no ratou; i na, e ngai ke atu rai tetai taku ka iki no ratou i reira, ka tuatuaia ratou e e au titi, no te au paruru me kore ra no te maroiroi o Ziona.

22 I na, ko toku anoano te reira, e ko te aronga katoatoa e kapiki i toku ingoa, e kua akamori iaku kia tau ki taku evangelia openga kore, kia akaputuputuia ratou ki te ngai okotai, ma te tu ki te au ngai tapu;

23 Ma te teateamamao no te eeuanga te ka tae mai, i te eeuanga i te arai, tei tapoki i toku iero, i roto i toku puakapa, tei uuna i te enua, ei reira te au kopapa pouroa e kite mai ei iaku.

24 E ko te au mea viivii pouroa, o te tangata, o te au manu vaevae ā o te kainga, o te au manu o te reva, me kare o te au ika o te tai, tei noo ki runga i te aro katoa o te enua nei, ka kā pouroa ïa i te aʼi;

25 E pera katoa ko te au mea i angaiaʼi te ao nei, ka tae te reira i te vera o te aʼi; e ka riro te au mea ravarai ei mea ou, kia noo oki toku kite e te kakā ki te enua nei.

26 E kia tae ki taua rā ra ko te makitakita o te tangata, te makitakita o te au manu vaevae ā, ae, te makitakita o te au kopapa ravarai, ka kore ïa mei mua i toku aroaro.

27 E i taua rā ra, noatu e eaa ta tetai uatu tangata ka pati mai, ka orongaia te reira kiaia.

28 E i taua rā ra, kare o Satani mana kia timata i tetai uatu tangata.

29 E kare e tumatetenga i reira, no te mea kare o reira e mate.

30 E i taua rā ra, kare te tamariki e mate, kia ruau rava aia, e ko tona oraanga, mei te uki o te pu rakau;

31 E me mate aia kare aia e moe, koia i te mate ki raro i te one, mari ra ka akatukeia mei te kamoanga mata rai te viviki, e ka apai ravaia atu aia ki runga, e ka riro tona akangaroianga ei mea kakā.

32 Ae, tika tikai taku e karanga atu kia koe, i taua rā ra me aere mai te Atu, ka eeu mai aia i te au mea katoatoa.

33 Te au mea tei topa, te au mea i uunaia kare tetai tangata i kite, te au mea o te enua nei, no te kapuaanga o reira, e tona akakoroanga e te openga o te reira—

34 Te au mea manea rava atu, te au mea no runga, te au mea no raro ake, te au mea i roto i te one, e i rungaʼo i te enua, e i te rangi.

35 E ko te au tangata tei takingakinoia no toku nei ingoa, e kua tapu i te akarongo, noatu e kua kapikiia ratou kia tuku i to ratou oraanga noku ka kokoti pouroa ratou i teia kakā.

36 No reira, auraka e mataku e mate uatu; kare toou rekareka e kī i teia oraanga, kareka i roto iaku ka kī meitaki toou rekareka.

37 No reira, auraka e umuumu atu i ta te kopapa, auraka katoa i te ora no te kopapa, e umuumu ra i te vaerua, e te oraanga o te vaerua.

38 E kimi putuputu i te mata o te Atu, e na roto i te akakoromaki e raukaʼi ia kotou to kotou au vaerua, e raukaʼi oki ia kotou te ora mutukore.

39 Me kapikiia te tangata nei ki taku evangelia mutukore, ma te papau ki te koreromotu mutukore, e tuatuaia ratou e ko te miti o te enua e te kakara katoa o te au tangata nei;

40 Kua kapikiia ratou ei kakara no te au tangata; no reira me mangaro te tai o te enua, i na, kare ona puapinga e ngari ake i reira kia titiriia ki vao e kia takatakaiia ki raro i te vaevae o te tangata.

41 I na, teia oki te pakari no runga i te tamariki o Ziona, e manganui tikai, kare ra e ko te katoatoaanga; kua kiteaia e aronga aati ture ratou, no reira e mea tau kia akoia—

42 Ko tei akateitei iaia uaorai, ka taakaakaia ïa; e ko tei taakaaka iaia ra, e akateiteiia ïa.

43 E teianei, e akaari atu au kia kotou i tetai parabole, kia kite kotou i toku anoano no runga i te akaoraanga o Ziona.

44 E tuanga enua to tetai tangata mana, e ngai meitaki rava ra oki; kua na ko atura aia ki tona au tavini: E aere kotou ki toku kainga, ki teia ngai meitaki tikai o toku enua, e tanu e tai ngauru ma rua pu rakau olive;

45 E tuku takapini i te au tiaki, e ka akatu i tetai are teitei, kia rauka i tetai kia akara i te enua e pini uake, ei tangata tiaki i rungaʼo i te punanga, kia kore taku au pu olive e atiati ki raro me aere mai te au enemi e takingakino, e te rave i taku ua vine na ratou.

46 I teianei, kua aere atura te au tavini kua rave mei tei akaueia e to ratou pu kia ratou, e kua tanu i te au pu olive, e kua akatu takapini i te au koro, e kua tuku i to reira tiaki, e kua akamata iora i te patu i te punanga.

47 E te tuku ra ratou i te tango, kua akamata iora ratou i te tuatua i rotopu ia ratou uaorai: Eaa ra te atu i inangaro ei i teia punanga?

48 Kua roa ratou i te kimianga, ma te tuatua ki rotopu ia ratou uaorai, eaa te tumu i inangaro ei taku atu i teia punanga nei, i te mea oki e e tuatau au teia?

49 Eaa oki teia moni i kore ei i orongaia ki te tauianga? Kare oki e inangaroia teia au mea.

50 Ia ratou e taumaro nei tetai e tetai kua varenga noo ua ratou, e kare atura i akarongo i te au akaueanga a to ratou atu.

51 E kua aere maira te enemi i te po, e kua vavai i te aua koro; kua tu akera te au tavini i te mataku, e oro ke atura; kua takore iora te enemi i ta ratou angaanga, e kua atiati atu ra ki raro i te au pu olive.

52 E tenana, ko te tangata mana, ko te atu o te kainga vine ra, kua kapiki atura i tona au tavini, na ko atura, Eaa i peraʼi! eaa te tumu o teia kino maata?

53 Kare ainei kotou i anoanoia kia rave mei taku i akaue atu ia kotou kia rave, e—i muri ake i to kotou tanuanga i te kainga vine, e te akatuanga takapini i te koro, e tuku i te tiaki ki rungaʼo i te patu—akatu katoa i te punanga, e ka tuku i te tiaki ki runga i te punanga, e ka tiaki i taku kainga vine, e kare e vareae e te moe, no te aere mai aea te enemi kia kotou?

54 E i na, ka kite vave atu te tiaki i runga i te punanga i te enemi i te ngai mamao; ka rauka i reira ia kotou i te akateateamamao no te paruru atu ia ratou kia kore te enemi e atiati i te koro ki raro, e ka akaoraia taku kainga vine mei roto i nga rima o te akapou.

55 Kua tuatua maira te atu o te kainga vine ki tetai o tona tavini: Ka aere ka akaputuputu mai i te toenga o taku au tavini, e apai katoatoa i te au maroiroi o toku nei ngutuare, koia ko taku au tangata tamaki, taku au mapu tane, e ko ratou tei apakari i roto i taku au tavini, ko ratou oki te maroiroi o toku ngutuare, mari ua ra ko tetai ua taku i iki kia noo mai;

56 Ka aere tika atu kotou ki te enua o taku kainga vine, e akaora i taku kainga vine; naku oki te reira; e mea okoia e au ki te moni.

57 No reira, e aere tika atu kotou ki taku enua; e vavai ki raro i te patu o toku au enemi, e uri i te punanga ki raro, e akapueurikiriki i to ratou au tiaki.

58 E me ka akaputuputu mai ratou ki te ngai okotai e tamaki mai ia kotou, e tutaki akaoko atu noku i toku au enemi, e a tetai tuatau e aere atu ei au ma te toenga o toku ngutuare e ka noo i te enua.

59 Kua tuatua maira te tavini ki tona atu: Aea e tupu ei teia au mea?

60 Kua karanga maira aia ki tona tavini: Me tae toku tuatau; e aere tika koe, e rave i te au mea katoatoa taku i akaue atu kia koe;

61 Ko teia taku topirianga e te au akameitakianga ki rungaʼo ia koe—e tavini akarongo mou koe e te pakari i rotopu i toku ngutuare, e tutara oki no toku basileia.

62 E kua aere ke atura taua tavini ra, e kua rave i te au mea katoa ta tona pu i akaue iaia kia rave; e te au rā e manganui i muri mai kua akatupuia te au mea katoa.

63 Pera katoa, tika tikai taku e karanga atu kia koe, e akakite atu au kia koe i te pakari e vai i roto iaku no runga i te au akonoanga katoatoa, mei te mea e ka inangaro ratou kia aratakiia na te mataara tika e te tano no to ratou akaoraanga—

64 Kia tupu uatu rai te angaanga o te akaputuputuanga mai o taku aronga tapu, kia raukaʼi iaku i te akamaroiroi ia ratou ki toku ingoa i te au ngai tapu; no te mea kua tae te tuatau o te kokoti, kia tupu oki taku nei tuatua e tikaʼi.

65 No reira, ka akaputuputu mai au i taku iti tangata ki te ngai okotai, kia tau ki te parabole o te sitona e te zizania, kia akatakakeia mai te sitona ki te ngai vairanga kia rauka te ora mutukore, e kia akakoronaia ki te kakā tiretiera, me aere mai au ki roto i te basileia o taku Metua kia tutaki i te au tangata ravarai kia tau ki tana angaanga ka rave;

66 I te au zizania e tapekaia ra ki roto i te au ruru, kia piri meitaki te tapeka, e kia tauia atu ei ratou ki te aʼi mate kore.

67 No reira, e oronga au i tetai akaueanga ki te au akonoanga katoatoa, kia akaputuputu mai rai ratou ki te ngai okotai taku i akataka no ratou.

68 Kareka ra, mei taku oki i tuatua atu kia koe i te akaueanga mua, auraka toou akaputuputuanga ei mea rapurapu, me kore ra na roto i te mataku; mari ra, kia teateamamao meitaki ia i mua ake.

69 E kia rauka kia akapapaia te au mea katoatoa ki mua ia koe, e akono i te akaueanga taku i oronga atu no runga i teia au mea—

70 Ko tei na ko mai, me kore ra tei apii mai, e kia okoia mai te au enua katoatoa ki te moni, te ka rauka kia okoia no tetai moni, ki tetai uatu tuanga i te enua nei tei akatakaia e au e ko te enua o Ziona, no te akamataanga o te akaputuputuanga o toku aronga tapu;

71 Ko te enua katoatoa te ka rauka kia okoia i Jackson County, e te au tapere i vaitata mai, e vaioia mai te toe ki toku nei rima.

72 Teianei, tika tikai taku e karanga atu kia koe, kia akaputuputu mai te au akonoanga i ta ratou moni pouroa ki te ngai okotai; kia raveia teia angaanga i tona atianga tikai, auraka ra kia rapurapuia; ma te akara i te au mea katoatoa kia teateamamaoia i mua ia koe.

73 E kia ikiia te au tangata ngateitei, koia te aronga pakari, e tono ia ratou e oko mai i teia au enua.

74 E ko te au akonoanga i te au enua i te itinga ra, me maata mai ratou, me ka akarongo ratou ki teia tuatua ka oko mai ratou i te au enua, e ka akaputuputuia ratou ki reira; ko te ravenga teia e akatumu ei ratou ia Ziona.

75 I teia nei tikai kua rava takere to roto i te vairanga, ae, kua maata tikai, ei akaora ia Ziona, e kia akamouia tona au ngai tanea, kia kore e uriia akaou ki raro, naringa e kua anoano te au akonoanga, tei kapiki ia ratou ki toku ingoa, kia akarongo mai ki toku reo.

76 E pera katoa, te tuatua atu nei au kia koe, ko te aronga tei akapueurikirikiia e to ratou au enemi, te anoano nei au e kia pati ua rai ratou i tetai akatikatikaanga, e te akaoraanga, mei roto mai i te au rima o te au aronga tei akanooia ei au tutara, e ko ratou tei mana ki rungaʼo ia kotou—

77 Kia tau oki ki te au ture e te papa ture o te tangata, mei taku i akatika kia akamouia, e kia akonoia ei tika e ei paruru no te au kopapa, kia tau ki te tuatuatika e te au ture tapu;

78 E kia rave ei te au tangata katoatoa i te apiianga e te au ture no runga i te au mea e vai atu ki mua, kia tau ki te tikaanga iki taku i oronga atu kiaia, e kia pau mai ei te au tangata katoatoa i tana uaorai au ara i te rā o te akavaanga.

79 No reira, kare rava e tau kia tuikaa tetai tangata na tetai.

80 Ko te tumu oki teia i akamou ei au i te Papa Ture no teia enua, na roto i te rima o te au tangata kite pakari taku i taki ki runga no teia akakoroanga, e i akaoraʼi i te enua i te akamaringianga toto.

81 E teianei, e akaaite ra au i te tamariki a Ziona ki te aa? E akatau au ia ratou ki te parabole o te vaine e te akava tuatua-tika kore kia kore e matapoiriia, e mea tau oki i te au tangata katoatoa kia pure tukutuku kore, ko tei na ko mai e—

82 Te noo ra tetai akava i roto i tetai oire kare rava aia e mataku i te Atua, e kare oki i akono mai i te tangata.

83 E vaine takaua oki tei taua oire ra, e kua aere maira kiaia, na ko maira: E akatika mai koe iaku i toku nei enemi.

84 Kare ra aia i akatika vave mai, i muri mai ra kua tuatua aia ki roto iaia uaorai: Kare oki au e mataku i te Atua, e kare oki i akono i te tangata no te mea ra oki e, e riro teia vaine takaua i te akamanamanata mai iaku ka akatika au iaia, e ka riro tona aereanga putuputu mai e roiroi noku.

85 E akaaite au i te tamariki a Ziona ki te reira.

86 Kia pati akatenga ratou ki te vaevae o te akava;

87 Me kare aia e akara atu ia ratou, e pati ratou ki te vaevae o te kavana;

88 Me kare te kavana e akarongo mai ia ratou, e pati atu ki te vaevea o te peresideni;

89 E me kare te peresideni e akarongo mai ia ratou, ei reira te Atu e tu mai ei mei tona ngai pipinianga, e no tona riri, tamanamanata atura i to te au pa enua;

90 E no te vera o tona mareka kore, e tona riri otooto, i tona uaorai taime, e tipu ke iaia taua aronga kino, te akarongo kore, e te au tavini tika kore, e ka tukuia atu ei to ratou tuanga i rotopu i te aronga pikikaa, e te aronga irinaki kore;

91 Ki vao oki i te ngai poiri, tei reira oki te aue, e te mii, e te pakatianga nio.

92 No reira e pure kotou, kia puera to ratou taringa ki ta kotou aue, kia aroa atu au ia ratou, kia kore e tae mai teia kino kia ratou.

93 Ko taku i tuatua kia koe, ka tupu e tikaʼi, kia noo te au tangata ma te kotoeanga kore;

94 Kia akarongo te au tangata pakari e te au tutara e kia kite oki ratou i te au mea tei kore i manakonakoia e ratou;

95 Kia titau rai au i te apai mai i taku angaanga, ko taku angaanga tuke, e te raveanga o taku angaanga, taku angaanga tuke, ei kite no te tangata i te tuke i rotopu i te tuatua-tika e te kino maata, te tuatua maira toou Atua.

96 E tuatua akaou atu rai au kia koe, e mea tau kore ki taku akaueanga e toku anoano kia oko a Sidney Gilbert i taku are vairanga, taku i akataka no toku au tangata, ki roto i te rima o toku au enemi.

97 Auraka tei ikiia e au kia akapuapinga kore ia e toku au enemi, i te tika o te aronga tei kapiki ia ratou ki toku nei ingoa;

98 E ara mamae rava teia e te kino maata kiaku, e ki toku au tangata, no runga i te au mea taku i akaue, e te ka topa mai ki rungaʼo i te au iti tangata.

99 No reira, ko toku manako anoano teia kia mou toku iti tangata, e kia mou rai ki runga i taku i iki no ratou, noatu e kare ratou e tikaia kia noo ki reira.

100 Kareka ra, kare au e karanga atu nei e kare ratou e noo ki reira; me ka apai mai ratou i te ua e te angaanga tei tau no toku basileia ka noo ratou ki reira.

101 E patu oki ratou, kare e na tetai e noo, e tanu ratou i te kainga vine, e na ratou rai e kai i te ua o te reira. Koia ïa. Amene.