Tuanga 56
Te eeuanga tei orongaia mai na roto ia Iosepha Timeti te Peroveta, i Kirtland, Ohio, Tiunu 1831 (History of the Church, 1:186–188). Kua ikiia oki a Ezra Thayre kia aere ki Missouri raua ko Thomas B. Marsh (akara ki te Tuanga 52:22), i na ra, kare oki i rauka iaia kia aere kia akamata i tana angaanga i te taime i papaʼi a Thomas. Kare oki a Ezra Thayre i papa no te aere ki tona aerenga, no te mea kua o aia ki roto i te manamanata i Thompson, Ohio (akara ki te upoko o te Tuanga 54). Kua pau mai oki te Atu i te uianga a te peroveta no runga i teia manamanata nei na roto i te orongaanga mai i teia eeuanga.
1–2, Kia apai te aronga tapu i to ratou satauro ma te aru i te Atu kia rauka mai te akaoraanga; 3–13, Ka akaue mai te Atu e ka rave ke katoa, e ka kopae ke ia atu te aronga kauraro kore; 14–17, Aue te aronga apinga nui tei kore i tauturu i te putaua, aue oki te au putaua tei kore to ratou au ngakau i ati; 18–20, E ao tikai to te putaua tei mā to ratou ngakau, no ratou oki te enua nei.
1 E akarongo mai, e te au tangata tei aaki i toku ingoa, te tuatua maira te Atu to kotou Atua; e i na, kua maata tikai oki toku riri ki te aronga marokiakia, e ka kite oki ratou i toku rima e toku riri katoa, i te rā e aere atu ei au ma toku riri ki rungaʼo i te au iti tangata.
2 E ko te ka kore e amo i tana satauro e aru mai iaku, e kare katoa e akono i taku au akaueanga, kare rava aia e ora.
3 I na, ko au, ko te Atu, te akaue atu nei; e ko tei kore e akono mai, ka tipuia aia ki vao i te tuatau taku i manako, me aatiia te akaueanga taku i oronga atu.
4 No reira, naku, na te Atu, e akaue atu e naku katoa e akakore, i tei tau iaku; e ka tutaki katoatoa ia teia ki runga i te upoko o te aronga marokiakia, te tuatua maira te Atu.
5 No reira, te akakore nei au i te akaueanga taku i oronga atu ki taku nga tavini ko Thomas B. Marsh, e Ezra Thayre, e ma te oronga atu i tetai akaueanga ou ki taku tavini ko Thomas, e ka aere viviki atu aia ki te enua ko Missouri, e ka aere katoa atu oki taku tavini a Selah J. Griffin ka aru iaia.
6 E i na, te akakore nei au i te akaueanga tei orongaia ana ki toku nga tavini ko Selah J. Griffin e Newel Knight, no te marokiakia oki o toku iti tangata tei noo ki Thompson, e ta ratou patoitoi.
7 No reira, kia noo rai taku tavini a Newel Knight ki o ratou; e pera katoa ratou ravarai te ka inangaro i te aere, kia aere, tei akaaka tikai ki mua iaku, e kia aratakiia atu e ïa ki te enua tei akatakaia e au.
8 E pera katoa, tika tikai taku e karanga atu kia koe, kia tataraara taku tavini a Ezra Thayre i tona tu ngakau parau e tikaʼi, e tona tu karapii katoa, e kia akono i te akaueanga mua taku i oronga atu kiaia no runga i te ngai tana e noo ra.
9 E me ka rave aia i teia, e kia kore e raveia te tuaanga ki runga i te enua, ka ikiia rai aia kia aere ki te enua ko Missouri;
10 Me kore ra, ka rave mai aia i te moni tana i tutaki atu, e ka akaruke i te reira ngai, e ka tipuia oki ki vao i taku akonoanga, te tuatua maira te Atu, te Atua Sabaota;
11 E mei te mea e ka ngaro ke te rangi e te enua nei, kare ra teia tuatua e ngaro, i na ra, ka akatupuia.
12 E me ka anoanoia kia tutaki atu taku tavini a Iosepha Timeti, Tamaiti, i te moni, i na, ka tutaki akaou atu au, ko te Atu, kiaia i roto i te enua ko Missouri, e ko te aronga tei oronga atu kiaia ka tutakiia atu rai ratou kia tau ki ta ratou i rave;
13 E ka rauka mai ia ratou kia tau ki ta ratou angaanga i rave, e pera katoa ki te enua o to ratou ipukarea.
14 I na, te tuatua maira te Atu ki toku iti tangata—e maata tikai ta kotou au mea ka rave e ta kotou katoa ka tataraara; e i na, kua tae mai oki ta kotou au ara ki mua iaku, e kare i akakoreia, no te mea te inangaro nei rai kotou i te rave i ta kotou i anoano.
15 E kare oki to kotou au ngakau i mareka. E kare oki kotou i akono i te tuatua-mou, i na ra, kua mataora ua i te rave i te mea tika kore.
16 Aue oki kotou e te aronga apinganui, te kore e oronga atu i to kotou apinga na tei ngere, no te mea ka riro oki ta kotou au apinga ei akapē i to kotou vaerua; ka tupu to kotou aueanga me tae ki te rā o te atoroanga, o te akavaanga, e te riri maata: Kua oti te tuatau mou, kua ope te tuatau akaū, e kare rai toku vaerua i akaoraia!
17 Aue oki kotou e te au tangata putaua, tei kore i ati te ngakau, e te au vaerua tei kore i akaaka, e te au kopu kare i pangea, e te au rima tei kore e rauka kia tapū i te rave mai i te apinga a tetai ke, e te au mata tei kī i te noinoi, e te kore rava e angaanga ma to kotou uaorai rima!
18 I na ra, kia akameitakiia te aronga putaua tei mā te ngakau, tei ati te ngakau, e te vaerua maru, no te mea ka kite oki ratou i te basileia o te Atua i te taeanga mai na roto i te mana e te kakā maata ki to ratou akaoraangaia; no te mea tei a ratou oki te ruperupeanga o te enua nei.
19 E i na, ka aere mai oki te Atu, e ka apai mai oki i te tutaki, e ka tutaki oki aia i te au tangata katoatoa, e ka rekareka oki te aronga putaua;
20 E ka riro oki i to ratou uki te enua nei mei tetai uki ki tetai uki, e tuatau e tuatau uatu. E teianei, te akaoti nei au i te tuatua atu kia kotou. Koia ïa. Amene.