1 E akarongo mai e te au tangata o taku akonoanga; tika tikai taku e karanga atu nei kia kotou, kua tuatuaia atu ana teia au mea kia kotou, ei puapinga e ei au apiianga oki no kotou.

2 Noatu oki e kua tataia taua au mea, kua oronga takere ia ana ki te au ereta o taku akonoanga mei muatangana mai rai, e ka na reira uatu rai, kia akaaere i te au uipaanga katoatoa, mei tei tau i te akaaereanga e te akauruanga a te Vaerua Tapu.

3 Kareka ra kua akaueia kotou e auraka rava e tuaru i tetai uatu ki vao mei roto i ta kotou au uipaanga na te katoatoa, te ka raveia ki mua i to te ao nei.

4 Kua akaue katoa ia kotou kia kore e tuaru i tetai mema ki vao i ta kotou uipaanga oroa; kareka ra, me kua tarevakē tetai tangata, auraka aia kia rave i te oroa, kia tataraara rava aia.

5 E te karanga akaou atu nei au kia kotou, auraka rava kotou kia tuaru i tetai ki vao mei roto i ta kotou uipaanga oroa mei te mea e te kimi pu tikai ra aia i te basileia—Te tuatua nei au i teia no runga i te aronga kare i roto i te akonoanga.

6 E te tuatua akaou atu nei au kia kotou no runga i ta kotou uipaanga akatinamouanga, mei te mea e e aronga tetai kare e no te akonoanga, e, te kimi pu tikai nei ratou i te basileia, auraka kotou e tuaru ia ratou ki vao.

7 I na ra, kua akaueia kotou i roto i te au mea katoatoa kia pati atu ki te Atua, e ka oronga ua mai aia; e ko ta te Vaerua ka akapapu atu kia kotou, ka inangaro oki au kia rave kotou i te reira ma te tapu o te ngakau, ma te aere tiratiratū mai ki mua iaku, ma te akamanako i te openga i to kotou akaoraanga, e te raveanga i te au mea katoatoa ma te pure e te akameitakianga, kia kore oki kotou e arataki ke ia e te vaerua kino, me kore ra e te au apiianga a te diabolo, me kore ra e te au akaueanga a te tangata nei; no te mea na te tangata nei tetai pae, e na te diabolo tetai pae.

8 No reira, kia matakite ko te vare aea kotou; e kia kore kotou e vare ua, e kimi pu tikai i te au orongaanga meitaki roatu, e ma te akamaara ua rai e eaa te reira i orongaia mai ei;

9 Tika tikai taku e karanga atu kia kotou, kua orongaia atu te reira ei meitaki no te aronga tei inangaro mai iaku e tei akono i taku au akaueanga katoatoa, e no tei kimi ra kia akapera; kia meitaki oki te katoatoa tei kimi, me kare, tei pati mai kiaku, ko te ka pati mai e auraka no tetai akairo, te ka pou i te kaimoumouia no to ratou anoano tika kore.

10 E pera katoa, tika tikai taku e karanga atu kia kotou, te inangaro nei au kia akamaara ua rai kotou, ma te vai ua rai ki roto i to kotou manako e, eaa taua au orongaanga ra tei orongaia atu ki te akonoanga.

11 E kare te au orongaanga pouroa e orongaia atu ki te au tangata ravarai; e manganui oki te au orongaanga, e kua orongaia mai ki te tangata tatakitai tetai orongaanga na te Vaerua o te Atua.

12 Kua orongaia ki tetai pae tetai, e ki tetai pae kua orongaia atu tetai, kia meitaki oki te katoatoa rava.

13 E ki tetai pae kua orongaia atu e te Vaerua Tapu kia kite oki ratou e ko Iesu Mesia te Tamaiti a te Atua, e kua akasatauroia aia no te ara a to teianei ao.

14 E ki tetai pae kua orongaia kia irinaki i ta ratou au tuatua, kia rauka katoa ia ratou te ora mutukore, mei te mea e ka vai akarongo ua rai ratou.

15 E pera katoa, kua orongaia ki tetai pae e te Vaerua Tapu kia kite i te au tu akatereanga i te angaanga, te ka riro oki ei marekaanga no taua Atu ra, mei ta te Atu i anoano, kia tau ki tona aroa ua e ki te tu o te au tamariki a te tangata nei.

16 E pera katoa, kua orongaia mai e te Vaerua Tapu ki tetai pae kia kite i te au ravenga tukeke o te angaanga, e mei te mea oki e na te Atua, e kia riro oki te akakiteanga a te Vaerua i te tae ki te au tangata katoatoa ei meitaki no ratou.

17 E tika tikai, te karanga akaou atu nei au kia kotou, kua orongaia ki tetai pae e te Vaerua o te Atua, te reo o te pakari.

18 Kua orongaia ki tetai pae te tuatua o te kite, kia rauka oki kia apii i te katoatoa kia pakari e kia rauka te kite.

19 E pera katoa, kua orongaia ki tetai pae te akarongo kia akaoraia;

20 E ki tetai pae kua orongaia te akarongo kia akaora.

21 E kua orongaia ki tetai pae te raveanga o te au semeio;

22 E kua orongaia ki tetai pae kia totou;

23 E ki tetai pae te kite i te vaerua meitaki mei te vaerua kino.

24 E kua orongaia atu ki tetai pae kia tuatua i te au reo ke ke;

25 E kua orongaia atu ki tetai pae te akaurianga o te au reo ke ke.

26 E no ko mai anake teia au orongaanga nei i te Atua, ei meitaki no te tamariki a te Atua.

27 E ki te episekopo o te akonoanga, e kia ratou ta te Atua ka iki e ka akataonga ei tiaki i tana akonoanga e ei au ereta katoa no tana akonoanga, ka orongaia kia ratou te kite papu no teia au orongaanga, ko te tu mai aea tetai i rotopu ia kotou ma te totou mai, i na ra, kare oki ïa e na te Atua.

28 E ka tae akera e ko te ka pati mai na roto i te Vaerua, ka orongaia atu te reira na roto rai i te Vaerua;

29 E ka orongaia oki ki tetai pae taua au orongaanga tapu ra, kia vai oki tetai akaaere, kia riro ei meitaki no te au mema katoatoa.

30 Ko tei pati na roto i te Vaerua, kua pati aia kia tau ki te anoano o te Atua; e no reira ka rauka mei tana rai i pati mai.

31 E te karanga akaou atu nei au kia kotou, kia raveia te au mea katoatoa na roto i te ingoa o te Mesia, noatu e eaa ta kotou ka rave i roto i te Vaerua;

32 E akameitaki atu kotou i te Atua i roto i te Vaerua e tikaʼi no te au akameitakianga i akameitakiia mai ei kotou.

33 E rave uatu rai oki kotou i te tu tiamā e te tapu i mua iaku e tikaʼi. Koia ïa. Amene.