1 E te Atua e, teiea ra koe? E teiea te puakapa tei tapoki i toou ngai pipinianga?

2 Eaa te roa i te tapū ua anga i toou rima, e toou mata katoa, koia toou mata tikai, i te akaraanga mai mei te rangi mutukore i te au takinga kino ki toou iti tangata e to au tavini katoa, e te rongoanga mai to taringa i ta ratou au aue?

3 Ae, e te Atu, eaa oki te roa i to ratou akakoromakianga i teia au tarevakē e te au takingakino taukore, i mua ake ka maru mai ei toou ngakau kia ratou, e ka ariu atu ei to ngakau ma te aroa ia ratou?

4 E te Atu, te Atua Mana Katoatoa, tei anga i te rangi, te enua, te au moana, e te au mea katoa i roto ia ratou ra, ko tei akaaere ma te akaue atu i te diabolo, e te nooanga poiri katoa no Sheol—ka akatika mai ana i to rima; e ka akara tamou maina to mata; kia akateiteiia to puakapa, e auraka oki to ngai pipinianga kia tapoki akaou ia; kia akarongo mai oki to taringa; kia maru oki to pukuatu, e kia ariu oki toou ngakau i te aroa no matou.

5 Kia tupu oki toou riri no to matou au enemi; e i roto i te riri maata o toou ngakau, e akatika mai ei i te au takingakino ia matou ki taau koke.

6 E akamaara i to aronga tapu e mamae nei e to matou Atua; e ka mataora oki to au tavini ki roto i toou ingoa e tuatau uatu.

7 E taku tamaiti, ei au tei toou vaerua; ko toou mamae e toou au takingakinoangaia no tetai tuatau iti ua;

8 Ei reira, me akakoromaki ua koe, ka akaangateitei mai te Atua ia koe i runga; e ka autu oki koe ki rungaʼo i to au enemi.

9 Ka tu rai oki to au taeake ki te pae ia koe, e ka aroa akaou oki ratou ia koe ma te ngakau pumaana e te rima aroa.

10 Kare oki koe i aite ake kia Iobu; kare oki to au taeake i taumaro ake kia koe, e kare katoa oki i akaapa ake ia koe ki te aati ture, mei ta ratou i rave kia Iobu.

11 E ko tei akaapa atu ia koe ra ma te aati ture, ka takoreia to ratou manakonakoanga, e ka ngaro ke to ratou au manako mei te vai toka e tae i roto i te vera o te rā e iti ra;

12 E pera katoa kua tuku katoa mai oki te Atua i tona rima ei topiri ma te taui i te taime e te tuatau, e kia akapoiri i to ratou au manako, kia kore oki ratou e mārama i tana au angaanga umere; e kia riro ei timataanga ia ratou i roto i to ratou tu kino tikai;

13 E no te mea katoa e kua viivii to ratou au ngakau, e te au mea ta ratou e anoano ra i te apai mai ki rungaʼo i etai ke, e te inangaro katoa kia mamae atu etai ke, ka maata atu teia me tae kia ratou;

14 Kia maromaroa katoa oki ratou, e kia tipu ke ia to ratou au manakonakoanga;

15 E kare e roa atu na te au mataiti i reira, e akaatea ke ia ai ratou e to ratou uanga mei raro ake i te rangi nei, te tuatua maira te Atua, e kare oki e akatoeia tetai o ratou kia tu ki te pae i te patu.

16 Ka taumaaia oki te katoatoa rava o te aronga te ka akateitei ma te patoi i taku nei i akatainuia, te tuatua maira te Atu, e ma te akakite atu e kua ara ratou i te mea e kare oki ratou i ara ki mua iaku, te tuatua maira te Atu, i na ra, kua rave i tei tau i toku nei mata, e taku katoa oki i akaue atu kia ratou.

17 I na ra, ko te aronga te ka kapiki mai e kua aati ture, kua pera ratou no te mea e au tavini oki ratou no te ara, e te au tamariki ratou uaorai o te kauraro kore.

18 E ko te aronga tei akaapa pikikaa ua mai i toku nei au tavini, kia apainaia mai ratou ki te tuikaaanga e te mate—

19 Aue oki ratou; ko ratou tei akatarevakē i taku au anau tamariki, ka tipu ke ia ratou mei te au angaanga oroa o toku nei are.

20 Kare oki ta ratou au kete e kī, ko to ratou au ngutuare e to ratou au are vairanga apinga ka takoreia te reira, e ka akavaavaaia oki ratou e te aronga tei akapaapaa pikikaa mai ia ratou.

21 Kare o ratou tikaanga ki te kautaunga, e ta ratou uanga katoa i muri ake ia ratou mei tetai uki ki tetai uki.

22 E ngari ake kia riia tetai toka tavirianga ki runga i to ratou au kaki, e kia akamaremoia ki raro i te moana.

23 Aue oki ratou katoatoa tei kore i akapumaana atu i toku iti tangata, tei tuaru atu, e tei tamate atu ia ratou, e tei taputou pikikaa atu no ratou, te tuatua maira te Atu Sabaota; kare oki te uki tangata vipera e ora i te mate o ade.

24 I na, te kite nei oki toku mata i ta ratou au angaanga, e kua akono katoa oki au i tetai akavaanga viviki no taua tuatau ra, no ratou katoatoa;

25 E tuatau rai oki tetai i ikiia no te au tangata tatakitai kia tau ki tana angaanga ka rave.

26 Ka oronga atu oki te Atua i te kite kia koe na roto i tona Vaerua Tapu, ae, e na roto katoa i te orongaanga tuatua kore ia a te Vaerua Tapu, tei kore i eeuia mai mei te akamataanga mai o te ao nei e teia noaʼi;

27 Ta to tatou ai metua i tiaki ana ma te maroiroi tikai te ka eeuia mai i roto i te au tuatau openga, tei akara to ratou au manako na roto i te au angela, mei tei vaioia no te kīanga o to ratou kakā;

28 I te tuatau e kare rava tetai mea e uunaia, noatu me e tai Atua me kore ra e manganui te au atua, ka akakiteia mai rai.

29 Te au terono ma te au tutaraanga, te au ui ariki e te au mana katoa, ka eeuia mai e ka akamouia te reira ei rungaʼo i te aronga katoatoa tei toa i roto i te evangelia a Iesu Mesia.

30 E pera katoa, me e kotinga tetai tei tukuia ki te rangi, e me kore ra ki te moana, me ki te enua maro, me kore ki te rā, te marama, me kore ki te au etu—

31 Pouroa te au tuatau katoatoa o to ratou takaanga, te au rā i akatakaia, te au marama, e te au mataiti, e te katoaanga o te rā o to ratou au rā, te au marama, e te mataiti, e to ratou au kakā, te au ture, te tuatau i akatakaia, ka eeuia mai te reira i te au rā o te tuatau o te kīanga o te au tuatau—

32 Kia tau oki ki tei akataongaia i rotopu i te Pupu Konitara a te Atua Mutukore o te au atua keke katoatoa i mua ake ka angaiaʼi te ao nei, te ka vaioia e tae uatu ki te akaotianga e te openga katoa ona ra, ka tomo atu ei te tangata tatakitai nei ki roto i tona aroaro mutukore e ki roto katoa i tona akangaroianga matekore.

33 Eaa te roa i te tae ua anga o te vai repo? Eaa te mana te ka tapū i te rangi? Mei ta te tangata ua nei i te akatika atu i tona rima e kia tapū atu i te kauvai ko Missouri i tona taeanga, e me kore ra kia taānga i te taeanga vai ki uta, koia katoa kia kopae atu i te Mana Katoatoa kia kore e riringi mai i te kite mei te rangi mai ki raro nei ki rungaʼo i te upoko o te Aronga Tapu i te Au Rā i Muri Nei.

34 I na, e manganui oki tei kapikiia, e tokoiti ua ra tei ikiia. Eaa ra ratou i kore ei i ikiia?

35 No te mea kua mou piri to ratou ngakau ki rungaʼo i te au mea o te ao nei, e kua kimi i te anoano katoa o te tangata nei, i kore ei ratou i kite i teia apii okotai nei e—

36 Ko te tikaanga oki o te kautaunga kare te pirianga i tatakake mei te au mana o te rangi, e kare oki te mana o te rangi e rauka kia akaaereia e kia raveraveia, mari ua ra ki runga i te au ture o te tuatua-tika.

37 Kia orongaia mai oki te reira ki rungaʼo ia tatou, e tikaʼi; i na ra, me rave tatou ei tapoki i ta tatou au ara, e me kore no to tatou tu parau, to tatou au akakoroanga puapingakore, e me kore ra kia rave kia akaaere me kore ra kia tutara ki rungaʼo i te au vaerua o te tamariki a te tangata nei, na roto i tetai uatu mea tika kore, i na, ka kiriti ke to te rangi ia ratou; kua mamae ngakau te Vaerua o te Atu; e me kiriti ke ia ake, Amene rai ïa ki te kautaunga o te reira tangata.

38 I na, i mua ake ka kite ei aia e kua akarukeia aia kiaia uaorai, kia takatakai i te ko, kia takingakino i te aronga tapu, e kia tamaki atu ki te Atua.

39 Kua kite oki tatou na roto i tetai au akaraanga taitaia, e ko te tu rai ïa e te manako o te maataanga o te au tangata, me rauka ake tetai manga tikaanga nona, mei ta ratou i manako, ka akamata viviki ratou i te rave i te tutaraanga tika kore.

40 No reira e manganui oki tei kapikiia, e tokoiti ra tei ikiia.

41 Kare rava e mana, me kore ra e tikaanga e taangaangaia na roto i te kautaunga, mari ua ra na roto i te patianga maru, te akakoromakianga roa, na roto i te tu maru e te tu akaaka, e na roto katoa oki i te aroa mou tikai;

42 Na roto i te takinga meitaki, e te kite tikai, te ka akamaata mai i te vaerua ma te kore e pikikaa, e te kore e akavare—

43 I te akoanga atu ma te viviki; mei te mea e akaueia e te Vaerua Tapu; e i reira ka akaari atu ei i muringake i te maata o te inangaro kiaia taau i ako atu, kia kore oki aia e akariro mai ia koe ei enemi nona;

44 Kia kite oki aia e e ririnui atu toou akarongo i te au tapekaanga o te mate.

45 Kia kī katoa to ngakau i te aroa ua no te au tangata katoatoa, e ki te ngutuare o te akarongo, e kia tiamā ua ana rai to au manakoanga; ei reira oki koe e ririnui ei i mua i te aroaro o te Atua; e ka vai te apiianga o te kautaunga ki rungaʼo ia koe mei te au e topatapata maira mei te rangi.

46 Ka riro oki te Vaerua Tapu ei tokorua tinamou noou, e ko taau sepeta, e sepeta akatukekoreia no te tuatua-tika e te tuatua-mou; e ko toou tutaraanga e mea mutukore ïa, e ma te kare e maroanga ka vai ua rai kia koe e tuatau e tuatau uatu.