Tuanga 28
Te eeuanga tei orongaia mai na roto ia Iosepha Timeti te Peroveta, kia Oliver Cowdery, i Fayette, New York, Tepetema 1830 (History of the Church, 1:109–111). E toka tikai ta Hyrum Page, koia tetai mema no te Akonoanga, e kua akakite mai e te rauka mai nei iaia tetai au eeuanga na roto i te reira no runga i te akatuanga ia Ziona e te akanoo katoa anga i te Akonoanga. Kua vavare oki tetai au pae mema i teia au tuatua nei, e kua tarevakē katoa oki a Oliver Cowdery na roto i taua tuatua. I mua ua ake i te uipaanga maata tei akatakaia, kua pati pakari atu oki te peroveta ki te Atu no runga i teia mea nei, e kua aru mai teia eeuanga.
1–7, Tei roto i te rima o Iosepha Timeti te au taviri o te au muna katoa, e koia anake ua te ka rauka te eeuanga no te Akonoanga; 8–10, Ka tutu a Oliver Cowdery ki te ngati Lamana; 11–16, Kua akavare a Satani ia Hyrum Page e kua oronga kiaia i tetai au eeuanga tarevakē.
1 I na, te karanga atu nei au kia koe, e Oliver e, ka orongaia atu kia koe e kia rongoia mai koe e te akonoanga i roto i te au mea katoatoa taau ka apii atu kia ratou na roto i te Akapumaana, no runga i te au eeuanga e te au akaueanga taku i oronga atu.
2 E, i na, tika, tika tikai taku e karanga atu kia koe, kare e tangata ke atu e ikiia kia ariki mai i te au akaueanga e te au eeuanga i roto i teia akonoanga, mari ua ra ko taku tavini ko Iosepha Timeti, Tamaiti, no te mea ka ariki oki aia mei ia Mose te tu.
3 E kia kauraro oki koe ki te au mea taku ka oronga atu kiaia, mei ia Aarona, kia akakite atu na roto i te akarongo i te au akaueanga e te au eeuanga katoa, ma te mana e te tikaanga katoa ki te akonoanga.
4 E me akaueia ake koe i tetai uatu taime e te Akapumaana kia tuatua, me kore ra kia apii atu, e me kore ra i te au taime katoatoa na roto i te akaueanga ki te akonoanga, e rave koe i te reira.
5 I na ra, auraka rava koe e tata na roto i te akaueanga, na roto ra i te pakari;
6 E auraka rava oki koe e akaue atu i tei tutara ia koe, e tei te upoko katoa o te akonoanga.
7 No te mea kua oronga oki au kiaia i te au taviri o te au mea muna, e te eeuanga katoa tei topiriia, e tae uatu ki te tuatau e iki ei au i tetai no ratou ei mono i tona ngai.
8 E teianei, i na, te karanga atu nei au kia koe, ka aere atu koe ki rotopu i te ngati Lamana ma te tutu atu i taku evangelia kia ratou; e me ariki mai ratou i taau apiianga, ka akatumu i reira koe i taku akonoanga ki rotopu ia ratou; e ka rauka ia koe tetai au eeuanga, i na ra, auraka e tata mei te akaueanga rai te tu.
9 E teianei, i na, te karanga atu nei au kia koe e kare oki i eeuia mai ake, e kare oki e tangata i kite ake i te ngai e akatuiaʼi te oire ko Ziona, i na ra, ka orongaia mai rai. I na, te karanga atu nei au kia koe e tei te au kotinga oki ïa o te ngati Lamana.
10 Auraka rava koe e akaruke i teia ngai, mari ua ra ki muri ake i te uipaanga maata; e ka ikiia oki taku tavini ko Iosepha ei akaaere i taua uipaanga ra, na roto i te reo o te katoatoa, e ko tana ka karanga mai kia koe, e akakite koe.
11 E pera katoa, e apai koe i to taeake, ko Hyrum Page, ko korua anake ua, e ma te akakite atu kiaia e ko te au mea tana i tata mei runga mai i taua toka ra kare ïa e naku, e na Satani oki aia i akavare;
12 E, i na, kare teia mea nei i akatakaia kiaia, e kare katoa oki tetai uatu mea e akatakaia ki tetai uatu no teia akonoanga tei tau kore i te au koreromotu o te akonoanga.
13 E kia raveia te au mea katoatoa ma te mako tikai, e na roto i te akatikaanga o te manako o te katoatoa i roto i te akonoanga, e na roto i te pure o te akarongo.
14 E ka tauturu oki koe i te akanoonooanga i teia au mea katoatoa, kia tau ki te au koreromotu o te akonoanga, i mua ake ka aere ei koe ki toou tere ki rotopu i te ngati Lamana.
15 E ka orongaia atu kia koe mei te taime ka aere ei koe, e tae uatu ki te taime e oki mai ei koe, i taau ka rave.
16 E amama koe i toou vaa i te au taime ravarai e tikaʼi, i te akakiteanga i taku evangelia ma te rekareka. Amene.