Tuanga 39
Te eeuanga tei orongaia mai na roto ia Iosepha Timeti te Peroveta, kia James Covill, i Fayette, New York, i te ra 5 o Tianuare, 1831 (History of the Church, 1:143–145). Ko James Covill, koia tetai orometua no te Akonoanga Bapetizo e ā ngauru mataiti, kua koreromotu mai e ka akono aia noatu eaa te akaueanga ta te Atu ka oronga mai kiaia na roto ia Iosepha te Peroveta.
1–4, E mana to te aronga tapu kia riro ei au tamaroa na te Atua; 5–6, Ko tei ariki i te evangelia, kua ariki katoa i te Mesia; 7–14, Kua akaueia a James Covill kia bapetizoia e kia angaanga ki roto i te kainga vine a te Atu; 15–21, Kia tutu te au tavini o te Atu i te evangelia i mua ake ka tae mai ei te Oki Rua Anga Mai; 22–24, Ko te aronga tei ariki i te evangelia, ka akaputuputuia ratou i teianei ao e mutukore uatu.
1 E ariu mai e akarongo ki te reo nona tei vai mutukore ana e mutukore uatu, ko Te Vai Nei Au Maata, ko Iesu Mesia—
2 Te mārama e te ora o te ao nei; te mārama tei kakā mai ana ki te poiri, e kare oki te poiri i mārama mai;
3 Koia rai oki tei aere mai ana ki toku tikai i te tuatau i rotopu tikai i te au tuatau, e kare ra toku tikai i ariki mai iaku;
4 I na ra, kia ratou ravarai tei ariki mai iaku, kua oronga atu au i te mana kia riro mai ei au tamaroa naku; e ka pera katoa au i te orongaanga atu kia ratou ravarai tei ariki mai iaku, i te mana kia riro mai ei au tamaroa naku.
5 E tika, tika tikai taku e karanga atu kia koe, ko tei ariki mai i taku evangelia kua ariki katoa mai iaku; e ko tei kore i ariki mai i taku evangelia kare katoa oki i ariki mai iaku.
6 E ko teia taku evangelia—ko te tataraara e te bapetizoanga ki te vai, e i muri ake oki e tae mai ei te bapetizoanga ki te aʼi e te Vaerua Tapu, koia te Akapumaana, ko tei akaari mai i te au mea katoatoa, e ma te apii mai i te au mea au o te basileia.
7 E teianei, i na, te karanga atu nei au kia koe, e taku tavini e James, kua akara au i taau au angaanga e kua kite au ia koe.
8 E tika tikai taku e karanga atu kia koe, kua tika toou ngakau ki mua iaku i teia taime; e, i na, kua oronga atu au i tetai au akameitakianga maata ki runga i toou upoko;
9 Kareka ra, kua kite ana koe i tetai tumatetenga maata, no te mea kua patoi mai koe iaku i tetai au taime e manganui no te ngakau parau oki e te au anoano o te ao nei i peraʼi.
10 E, i na, kua tae mai te au rā o taau akaoraanga ra, e me ka akarongo mai koe ki toku reo, ko te ka tuatua atu kia koe e: E tu kia bapetizoia, e kia tamāia taau au ara, ma te kapikianga mai i toku ingoa, e ka rauka ia koe taku Vaerua, e tetai akameitakianga maata tei kore rava koe i kite ana i mua ana.
11 E me rave koe i teia, kua akateateamamao au ia koe no tetai angaanga maata atu. Ka tutu oki koe i te kīanga o taku nei evangelia, taku i tuku atu i teia au rā openga nei, ko te koreromotu taku i tuku atu ei akaora i toku iti tangata, no te ngutuare o Iseraela.
12 E ka tae katoa te tuatau ka noo oki ei te mana ki rungaʼo ia koe; e ka rauka ia koe te akarongo maata, e ka noo oki au kia koe e ka na mua oki au ia koe.
13 Kua kapikiia koe kia angaanga ki roto i taku kainga vine, e kia akatupu i taku akonoanga, e kia apai mai ia Ziona, kia rekareka kapiti oki i runga i te tuaivi e kia ruperupe.
14 I na, tika tikai taku e karanga atu kia koe, kare koe i kapikiia kia aere ki te tuanga itinga o te enua, i na ra, kua kapikiia koe kia aere ki te Ohio.
15 E kia akaputuputu toku au tangata ia ratou uaorai ki te Ohio, te vai nei oki iaku tetai akameitakianga tei kore rava i kiteia ana i rotopu i te tamariki a te tangata nei, e ka riringiia atu oki ki rungaʼo i to ratou upoko. E mei reira atu ka aere atu te au tangata ki te au iti tangata katoatoa.
16 I na, tika tikai taku e karanga atu kia koe, te kapiki nei rai oki te au tangata i Ohio kiaku ma te akarongo maata, i te manakoanga e ka tapū au i toku rima i roto i te akavaanga i te iti tangata, i na ra, kare e rauka iaku i te pikikaa i taku tuatua.
17 No reira, e angaanga ma toou maroiroi e ma te kapiki atu i te au aronga angaanga tei akarongo tikai ki roto i taku kainga vine, kia kokotiia oki no te taime openga.
18 E me tataraara ratou ma te ariki mai i te kīanga o taku nei evangelia, e ma te akatapuia, ka tapū au i toku rima i roto i te akavaanga.
19 No reira, e aere ki mua ma te kapiki atu ma te reo maata i te na ko anga e: Te vaitata mai nei te basileia o te ao; ma te kapikianga atu e: Hosana! kia akameitakiia te ingoa o te Atua Teitei Roa.
20 E aere e bapetizo atu ki te vai, ma te akapapaanga i te ara i mua i toku mata no te taime no toku okianga mai;
21 Te vaitata mai nei oki te taime; ko te rā e te ora kare oki e tangata e kite; i na ra, ka tae tikai mai.
22 E ko tei ariki mai i teia au mea nei kua ariki mai iaku; e ka akaputuputuia mai ratou kiaku i teia tuatau nei e mutukore uatu.
23 E, ka tae katoa te tuatau e ki runga ia ratou ravarai taau ka bapetizo ki te vai, ka tuku oki koe i toou nga rima, e ka rauka oki ia ratou te orongaanga o te Vaerua Tapu, e ka akara atu oki ki te au akairo o toku okianga mai, e ka kite oki iaku.
24 I na, ka aere vave mai au. Koia ïa. Amene.