Tuanga 74
Te eeuanga tei orongaia mai kia Iosepha Timeti te Peroveta, i Hiram, Ohio, Tianuare 1832 (History of the Church, 1:242). Kua tata te Peroveta: “I te taeanga mai o te tuatua openga a te Atu [Te Apiianga e te Au Koreromotu 73], kua akamata akaou au i te akauri i te au Irava Tapu, e kua angaanga maroiroi tikai e tae uatu ki te tuatau i mua uake i te uipaanga maata koia te ka akamata i te rā 25 o Tianuare. I teia tuatau katoa kua rauka mai iaku teia, ei akamāramaramaanga ia Korinetia 7:14 (History of the Church, 1:242).
1–5, Kua akamaroiroi a Paulo i te Akonoanga o tona tuatau kia kore e akono i te ture a Mose; 6–7, Ko te au tamariki kua tapu e kua akatapuia na roto i te tarangaara.
1 Kua tapu oki taua tane akarongo kore ra i te vaine, e kua tapu te vaine akarongo kore i te tane; naringa kare ra, kua noa ta kotou tamariki, i teianei ra, kua tapu ïa.
2 Teianei, i te au rā o te au aposetolo te vai ra te ture o te peritomi ki rotopu i te ngati Iuda tei kore i irinaki i te evangelia a Iesu Mesia.
3 E kua tae akera e kua tupu iora tetai tauetonoanga maata ki rotopu i te tangata no runga i te ture o te peritomi, kua manako oki te tane akarongo kore e kia peritomiia tana au tamariki e ka apai mai ei ia ratou ei tumu no te ture a Mose, kia tupu rai taua ture ra.
4 E i na, ko te au tamariki, tei apainaia mai ki te ture a Mose, kua akarongo rai ratou ki te au peu taito a to ratou au metua, e kare oki i irinaki atu ki te evangelia a te Mesia, e kua riro mai ratou ei aronga tapu kore.
5 No reira, no teia tumu nei, kua tata atu te aposetolo ki te akonoanga ma te oronga atu i tetai akaueanga kia ratou, kare e na te Atu, nana uaorai ra, kia kore oki tei irinaki e piri atu ki tei irinaki kore; mari ua ra, kia rave ke ia te ture a Mose i rotopu ia ratou,
6 Kia vai rai ta ratou au tamariki ma te peritomi kore ia; e kia ngaro ke oki te peu, ko tei karanga e kua noa te au tamariki meariki; kua tupu oki teia ki rotopu i te ngati Iuda;
7 I na ra, e tapu oki te au tamariki mea rikiriki, kua tapu oki na roto i te tarangaara ara a Iesu Mesia; e ko te aiteanga teia o te au irava tapu.