Tuanga 51
Te eeuanga tei orongaia mai na roto ia Iosepha Timeti te Peroveta, i Thompson, Ohio, Me 1831 (History of the Church, 1:173–174). I taua taime ra, ko te aronga tapu e tere mai ra mei te enua i te pae itinga i Marike e kua akamata ratou i te tae ki Ohio, e no reira, e mea anoanoia kia akapapa i te au mea no to ratou ngai nooanga. E ko teia tuanga angaanga, na te taonga Episekopo ïa, e kua kimi te Episekopo ko Edward Partridge i te akamāramaanga no runga i teia mea nei, e kua ui atu te Peroveta ki te Atu.
1–8, Kua ikiia a Edward Partridge ei akaaere i te au tuanga angaanga e te au apinga; 9–12, Kia tika te rave angaanga a te aronga tapu e kia aiteite ta ratou ka rauka mai; 13–15, Ko ta ratou ka rave, ko te akatu i tetai are vairanga apinga na te Episekopo ma te akaputu i te au apinga kia tau ki te ture a te Atu; 16–20, E kia riro a Ohio ei ngai akaputuputuanga no tetai nga tuatau ua.
1 E akarongo mai kiaku, te tuatua maira te Atu to kotou Atua, e ka tuatua atu au ki taku tavini ko Edward Partridge, ma te oronga atu i tetai au akaaereanga kiaia; no te mea e e mea tau oki kia rauka iaia tetai au akaaereanga kia kite e ka akapeea oki me akapupu i teia au tangata.
2 E mea tau rava oki kia akaaereia ratou kia tau ki taku au ture; me kare oki, ka tipuia ratou ki vao.
3 No reira, kia tika i taku tavini ko Edward Partridge e te au tangata tana i iki, e tei marekaia e au, kia oronga ki teia au tangata i ta ratou au tuanga, kia tau te tuanga a te au tangata ki tona ngutuare tangata, e kia tau katoa oki ki tona tu e te au mea katoa tana i inangaro e te au mea ravarai tei anoanoia nona.
4 E kia tika i taku tavini ko Edward Partridge, me oronga aia ki tetai tangata i tana tuanga, kia oronga atu i tetai tataanga kiaia no te akapapuanga i tana tuanga, e kia mou rai aia i te reira, koia taua tikaanga ra, e taua ipukarea rai i roto i te akonoanga, e tae rava atu ki te tuatau e aati ture ei aia e kare e tau akaou ei mema, na roto i te reo o te akonoanga, kia tau ki te au ture e te au koreromotu a te akonoanga.
5 E me kua ara aia ma te kore e tau akaou kia piri mai ki roto i te akonoanga, kare ona mana kia pati akaou i te tuanga tei akatapuia e ïa ki te episekopo no te aronga i ngere e tei putaua o taku nei akonoanga; e no reira, kare e vai kiaia teia orongaanga, i na ra, e tikaanga ua tona ki te tuanga tei tataia kiaia.
6 Ei reira e papu ei te au mea katoatoa, kia tau oki ki te au ture o te enua.
7 E ko te au apinga a teia au tangata nei, kia vai rai te reira kia ratou.
8 E ko te toeanga o te moni tei toe mai ki teia au tangata nei—kia ikiia tetai mata ei mou moni i rotopu i teia au tangata, kia apai i te moni ei oko kai e te kakau, e kia tau oki ki te anoano o te tangata.
9 E kia tika te rave angaanga a te au tangata katoatoa, e kia aiteite oki te au tangata katoatoa, e kia aiteite oki te raukaanga, kia riro oki kotou ei okotai, mei taku oki i akaue atu ia kotou.
10 E auraka te au apinga a teia au tangata nei e apaina ke ia e e orongaia atu ki tetai putuputuanga o tetai akonoanga ke.
11 No reira, me rauka ake i tetai akonoanga ke tetai moni no teia akonoanga atu, kia tutaki akaou mai rai ratou i ta teia akonoanga kia tau ki ta ratou i akatika;
12 E ka rauka teia i te rave na roto i te episekopo me kore ra i te mata, ko te ka ikiia e te reo o te akonoanga.
13 E pera katoa, kia akatu te episekopo i tetai are vairanga anga apinga no teia akonoanga; ei vairanga no te au apinga mei te moni e te kai, tei maata atu i te anoano o te tangata, kia vaioia te reira ki roto i nga rima o te episekopo.
14 E kia akono katoa oki aia i tetai nana uaorai, e na tona ngutuare tangata katoa, no te mea ko tana tuanga angaanga.
15 No reira te oronga atu nei au ki teia au tangata nei i tetai tikaanga kia akapupu ia ratou uaorai, kia tau ki taku au ture.
16 E kua akatapu au i teia enua no ratou no tetai tuatau poto ua, e tae uatu ki te tuatau e tuku atu ei au, ko te Atu, i tetai ravenga ke no ratou tikai, e ka akaue atu ia ratou kia aere meikonei atu;
17 E kare oki te ora e te rā i orongaia ake kia ratou, e no reira, kia angaanga rai ratou ki runga i teia enua no tetai au mataiti, e ka riro mai teia ei meitaki no ratou.
18 I na, ka riro teia ei akaraanga ki taku tavini ko Edward Partridge, i tetai au ngai, i roto i te au akonoanga.
19 E ko te kiteaia mai ei tangata akarongo tikai, e te tuatua-tika, e te tavini karape tikai, ka tomo aia ki te rekarekaanga o tona Atu, e ka rauka iaia te ora mutukore.
20 Tika tikai taku e karanga atu kia kotou, ko au ko Iesu Mesia, te ka aere viviki mai, i te ora manako kore ia e kotou. Koia ïa. Amene.