Tuanga 8
Te eeuanga tei orongaia mai na roto ia Iosepha Timeti te Peroveta, kia Oliver Cowdery i Harmony, Pennsylvania, Aperira 1829 (History of the Church, 1:36–37). Kua inangaro a Oliver kia rauka mai te orongaanga o te akaurianga. Koia tei rave atu rai i teia angaanga nei i te tataanga i te tuatua a te Peroveta i te akauriangaia o te Puka a Momoni. Kua pau mai te Atu i tana patianga na roto i te orongaanga mai i teia eeuanga.
1–5, Ka tae mai te eeuanga na te mana o te Vaerua Tapu; 6–12, Ko te au muna a te Atua e te mana o te akaurianga o te au tataanga taito, ka tae mai te reira na roto i te akarongo.
1 E Oliver Cowdery, tika, tika tikai taku e karanga atu kia koe, mei te Atu e ora nei, koia oki toou Atua e toou Akaora, ka na reira tikai oki te raukaanga ia koe te kite noatu eaa taau au mea ka pati ma te akarongo, e te ngakau tika, ma te irinaki e ka rauka ia koe te kite no runga i te au kotikotianga o te au akapapaanga taito, e mea takere oki ïa, e tei roto oki i reira tetai au tuanga o taku au irava tapu ko tei tuatuaia mai e te akakiteanga o toku Vaerua.
2 Ae, i na, ka akakite atu au ki roto i toou manako e toou ngakau na roto i te Vaerua Tapu, koia te ka tae mai ki rungaʼo ia koe, e koia te ka noo katoa ki roto i toou ngakau.
3 E teianei, i na, ko te vaerua teia o te eeuanga; i na, ko teia oki te vaerua i arataki mai ei a Mose i te tamariki a Iseraela na roto i te Tai Muramura ki te one maro.
4 No reira, ko teia taau orongaanga; e taangaanga i te reira, e kia akameitakiia koe, na te reira oki e akaora ia koe mei roto mai i te rima o toou au enemi, e naringa oki e kare, ka tamate ratou ia koe, e ka apai mai i te takoreanga ki toou vaerua.
5 Ae, e akamaara i teia au tuatua, e akono i taku au akaueanga. E akamaara, e ko teia taau orongaanga.
6 E teianei, kare e ko teia anake taau orongaanga, no te mea te vai nei tetai aau orongaanga, koia te orongaanga a Aarona; e i na, kua akakite mai teia i te au mea e manganui kia koe;
7 I na, kare atu e mana ke, mari ua ko te mana o te Atua, te ka akamou i teia orongaanga a Aarona kia koe.
8 No reira, auraka e ekoko, no te mea e orongaanga teia na te Atua; e mou ki roto i o nga rima ka rave ei koe i te au angaanga umere; e kare oki e mana ke e raukaʼi kia rave ke ia atu mei roto i to rima, ko te angaanga oki te reira a te Atua.
9 E, no reira, noatu eaa taau ka pati mai kiaku kia akakite atu kia koe no te reira tu, ko taku rai ïa ka oronga atu, e ka rauka oki ia koe te kite no runga i te reira.
10 E akamaara, me kare oou akarongo kare aau angaanga e rauka; e no reira e pati na roto i te akarongo. Auraka e tanoanoa ua i teia au mea nei; e auraka e pati i te au mea kare e tau kia pati koe.
11 E pati kia kite koe i te au mea muna a te Atua, e kia rauka oki ia koe i te akauri, e kia rauka mai ia koe te kite mei roto mai i te au tataanga taito tei uunaia, e tei tapu katoa; e na roto i toou akarongo e raukaʼi ia koe.
12 I na, ko au tei tuatua atu; e ko au rai oki ïa ko tei tuatua atu ana mei muatangana. Amene.